மெல்லியசோகம்

கவினா · கவினா Wed Jan 25, 2012 10:04 pm

சுதந்திர தினவிழாவில் பறக்க விடுவதற்காகவே
சும்மானாச்சும் சுற்றித்திரிந்த
வெள்ளை புறாவை
வேண்டுமென்றே பிடித்து சிறைவைப்பது.

கடையிலிருக்கும் பூமாலை
எழவு வீட்டுக்கா
கல்யாண வீட்டுகாயென
முடிவாகாமலேயே
தொங்கிக் கொண்டிருப்பது.

பேசவே தெரியாத
எங்கவூரு ஊமையன்
அற்புதமாய்
புல்லாங்குழலில் பாடுவது.

மூக்கு நுனிவரை வந்த தும்மல்
அருவமின்றி
திரும்பிவிடுவது.

கடற்கரையில்
நானும் அவளும்
கட்டிவைத்துவிட்டு வந்த
மணற்கோபுரம்
மழையிலே நனைந்து
கரைந்து போய் விடுவது.

மழைவேளையில்
வெளியே செல்ல
காரணம் கிடைக்காமல்
சிறுவனாய் இருந்தபோது
நான்
மனசுக்குள்ளேயே அழுதது.

என்னை மன்னித்து விடுயென
என் கரம் பற்றிய காதலி
கடைசியாய் முத்தமிட்டது.

இவற்றையெல்லாம்
எப்படி சொல்லமுடியும்
மெல்லிய சோகமென?

யினியவன் · யினியவன் Wed Jan 25, 2012 10:27 pm

மெல்லிய சோகமா மென்மையான இந்நினைவுகள் விட்டுச் சென்றது?

நன்று சு பா

**ரா.ரா3275** · **ரா.ரா3275** Wed Jan 25, 2012 11:00 pm

சொல்லிய சோகமெல்லாம் மெல்லிய சோகமல்ல...வல்லிய சோகம்...
ஆனாலும் அதிலும் ஒரு சுகம்...
சுந்தரபாண்டி...சூப்பர் பாண்டி...

சார்லஸ் mc · சார்லஸ் mc Thu Jan 26, 2012 9:30 am

கவிதை அனைத்தும் வெகு மெல்லியசோகம் 224747944

“மழைவேளையில்
வெளியே செல்ல
காரணம் கிடைக்காமல்
சிறுவனாய் இருந்தபோது
நான்
மனசுக்குள்ளேயே அழுதது. ”

சிறுவயது அனுபவம் - என்னைப் போல இன்னும் எத்தனை பேருக்கோ...

மெல்லிய சோகம்... அடிமனதில் சிறய வலி அல்ல... பொிய வலிகளைத்தான் ஏற்படுத்துகிறது.