உளவுத்துறை ரகசியங்களை மீடியாவுக்கு லீக் செய்தது யார்?

முன்னாள் சி.ஐ.ஏ. அதிகாரி ஒருவர் உளவுத்துறையின் ரகசியங்களை மீடியாவுக்கு லீக் செய்தார் என்று நேற்று (திங்கட்கிழமை) கோர்ட்டில் வழக்கு தாக்கல் செய்யப்பட்டுள்ளது. சி.ஐ.ஏ.-யின் ரகசிய தகவல்கள், மற்றும் போட்டாக்களை மீடியாவுக்கு கொடுத்தது, அத்துடன் சி,ஐ,ஏ. உளவாளிகளின் அடையாளங்களை வெளியிட்டது ஆகியவை இவருக்கு எதிரான குற்றச்சாட்டுகளாக உள்ளன.




ஜான் கிரியாகோ நேற்று (திங்கட்கிழமை) கோர்ட்டுக்கு வந்தபோது..
குற்றம் சுமத்தப்பட்டுள்ள ஜான் கிரியாகோ (47) 1990-2004 காலப் பகுதியில் சி.ஐ.ஏ. அதிகாரியாகப் பணிபுரிந்தவர்.
சி.ஐ.ஏ. அமெரிக்காவுக்கு வெளியே ரகசியமாக வைத்திருந்த விசாரணை மற்றும் சித்திரவதை சிறைகள் தொடர்பான தகவல்கள் சில வருடங்களுக்குமுன் வெளியாகி பரபரப்பை ஏற்படுத்தியது உங்களுக்கு ஞாபகம் இருக்கலாம். மீடியாவில் இந்த விபரம் வெளியாகும்வரை சி.ஐ.ஏ. இப்படியான ரகசிய நடவடிக்கை ஒன்றை மேற்கொள்வது தொடர்பாக குறிப்பிட்ட சிலரைத் தவிர வேறு யாரும் அறிந்திருக்கவில்லை.

இந்த ரகசியத் தகவல்கள் மீடியாவுக்கு எப்படி லீக் செய்யப்பட்டது என்று அந்த நாட்களில் சி.ஐ.ஏ. தலையைப் பிய்த்துக்கொண்டு இருந்தது. தற்போது, ரகசிய தகவல்கள் லீக் செய்யப்பட்ட சோர்ஸ்களில் ஒருவர் ஜான் கிரியாகோ என்று வழக்கு தொடுத்துள்ளது.

2008-09 காலப்பகுதியில் நியூயார்க் டைம்ஸ் பத்திரிகை, சி.ஐ.ஏ.-யின் ரகசிய ஆபரேஷன்கள் தொடர்பாக பல கட்டுரைகளை ஆதாரங்களுடன் அடுத்தடுத்து வெளியிட்டு பரபரப்பை ஏற்படுத்தியது. சி.ஐ.ஏ.-யின் ரகசிய சிறைகளுக்கு உள்ளே எடுக்கப்பட்ட சில போட்டோக்களும் அந்த கட்டுரைகளுடன் வெளியாகின.
(அறிவிப்பு-தற்போது விவகாரம் கோர்ட்டுக்கு வந்திருப்பதால், அந்த போட்டோக்களை நாம் இங்கு வெளியிடவில்லை. Disclosure: Due to this matter is in court inquiry, we did not publish any of the related photos on viruvirupu.com as per Canadian law)

செப். 11 தாக்குதல்களுடன் தொடர்புடையவர்கள் என்ற சந்தேகத்தில் கைது செய்யப்பட்டவர்கள் மீதான சித்திரவதை போட்டோக்களை நியூயார்க் டைம்ஸ் வெளியிட்டது. மிகுந்த பாதுகாப்புடன் கூடிய ரகசியச் சிறைகளில் இந்த போட்டோக்கள் எப்படி எடுக்கப்பட்டன என்ற கேள்வி அமெரிக்க செனட்டிலும் எழுந்தது. சி.ஐ.ஏ. தலைவர் அரசியல் ரீதியாக கடும் எதிர்ப்பை சந்திக்க வேண்டியிருந்தது.

நேற்று கோர்ட்டில் தாக்கல் செய்யப்பட்டுள்ள சார்ஜ் ஷீட்டில், “2008-09 காலப்பகுதியில் நியூயார்க் டைம்ஸ், மற்றும் வேறு சில மீடியாக்களுக்கு சி.ஐ.ஏ.யின் ரகசியங்களை சி.ஐ.ஏ. முன்னாள் ஊழியர் ஜான் கிரியாகோ வழங்கினார். செப். 11 தாக்குதலை திட்டமிட்ட அல்-காய்தா உறுப்பினர்கள் அபு சுபாய்டா, காலிட் ஷேக் மொஹாமெட் ஆகியோரை சி.ஐ.ஏ. கைப்பற்றி தமது சிறையில் வைத்திருக்கிறது என்பதை சி.ஐ.ஏ. ரகசியமாக வைத்திருந்தது. இந்தக் கைதுகள் தொடர்பான ரகசியத்தையும் இவரே மீடியாவுக்கு கொடுத்தார்” என்று குற்றம் சுமத்தப்பட்டுள்ளது.

சி.ஐ.ஏ.-யால் சுமத்தப்பட்ட குற்றச்சாட்டு அப்படியே கோர்ட்டில் நிரூபிக்கப்பட்டால், அதிகபட்ச தண்டனை 30 ஆண்டுகள் சிறைவாசம்.ஆனால், இந்த வழக்கில் சில சட்ட விதிமுறைச் சிக்கல்கள் உள்ளன. முதலாவது, ரகசியங்களை தமக்கு வழங்கிய சோர்ஸ் இவர்தான் என்பதை நியூயார்க் டைம்ஸ் கோர்ட்டில் ஒப்புக்கொள்ள முன்வர வேண்டும். மீடியாக்கு தகவல் கிடைத்த சோர்ஸை வெளியிட வேண்டும் என்று அமெரிக்காவில் சட்டப்படி நிர்ப்பந்திக்க முடியாது. அவர்களாக முன்வந்து ஒப்புக் கொண்டால்தான் உண்டு.

இரண்டாவது, 2008-09 காலப்பகுதியில் நியூயார்க் டைம்ஸ் பத்திரிகையில் வெளியான விபரங்கள் தொடர்பாகவே சார்ஜ் ஷீட் போடப்பட்டுள்ளது. ஜான் கிரியாகோ, 2004-ம் ஆண்டிலேயே சி.ஐ.ஏ.-யில் இருந்து வெளியேறிவிட்டார். இந்த வகையில் ரகசியம் பிரசுரமான போது அவர் சி.ஐ.ஏ. அதிகாரி அல்ல. இவர் தம்மை ஒரு மீடியாக்காரர் என்று காட்டி, (இவர் ஒரு புத்தகம் எழுதியுள்ளார்) தனக்கு வேறு ஒரு சோர்ஸ் மூலம் தகவல் கிடைத்தது என்று வாதம் செய்யலாம்.

மொத்தத்தில் சி.ஐ.ஏ.-க்கு இந்த கேஸ், சுலபமானது அல்ல.


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
தகவல் பகிர்வு - தமிழ் வாரஇதழ் செய்திகள் மற்றும் இணையதளத்தில் கிடைத்த தொகுப்புகள்.ARRKAY BLOGSPOT
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~