"கமிஷன்' இல்லாத நாணயமான சேவையை டி.என்.பி.எஸ்.சி., இனி வழங்கும் : ஆர்.நட்ராஜ்

சென்னை: ""டி.என்.பி.எஸ்.சி., "கமிஷன்' இல்லாத, நாணயமான சேவையை வழங்கும். படித்த இளைஞர்கள் மத்தியில், தேர்வாணையத்தின் மீது நம்பிக்கையை ஏற்படுத்தும் வகையில், தேர்வாணையத்தின் ஒட்டுமொத்தப் பணிகளும் வெளிப்படையானதாக மாற்றப்படும். தேர்வு அறைகள், நேர்முகத் தேர்வு நடைபெறும் அறைகளில், கேமராக்கள் பொருத்தப்பட்டு, அனைத்து நிகழ்வுகளும் பதிவு செய்யப்படும்,'' என, டி.என்.பி.எஸ்.சி., புதிய தலைவர் ஆர்.நட்ராஜ் கூறினார். சென்னை, கிரீம்ஸ் சாலையில் உள்ள, டி.என்.பி.எஸ்.சி., அலுவலகத்தில், இந்த அமைப்பின் புது தலைவராக, முன்னாள் டி.ஜி.பி., நட்ராஜ், நேற்று காலை பதவியேற்றார். 11.50க்கு, உறுப்பினர்கள் முன்னிலையில், பதவியேற்பு உறுதிமொழியை எடுத்துக் கொண்டார். அதன்பின், நட்ராஜ், நிருபர்களுக்கு அளித்த பேட்டி:

அரசுக்கு நன்றி : இது ஒரு முக்கியமான பதவி; பொறுப்புள்ள பதவி. இது, எனக்கு அளிக்கப்பட்டதில் மகிழ்ச்சியடைகிறேன். எனக்கு கொடுக்கப்பட்ட பணியை, திறமையாக, நிறைவாக செய்வேன். என் மீது நம்பிக்கை வைத்து, இந்தப் பதவியை அளித்த தமிழக அரசுக்கு நன்றி.

"கமிஷன்' இருக்காது : அரசுப் பணி என்பது, தெய்வீகப் பணி. கடவுள் கொடுத்த பரிசாகவே, இதை நான் கருதுகிறேன். இந்தப் பணிக்கு வருபவர்களுக்கு, திறமை இருக்க வேண்டும். ஏற்றுக் கொள்ளும் பணியை, நிறைவாக பூர்த்தி செய்ய வேண்டும். முக்கியமாக, நேர்மை இருக்க வேண்டும். சர்வீஸ் கமிஷன், கமிஷன் இல்லாத சேவையை வழங்கும். அதாவது, நாணயம் பெறாத, நாணயமான சேவையை வழங்கும். தேர்வாணையத்தில், பல சீர்திருத்தங்களை கொண்டு வர உள்ளோம்.

சீர்திருத்தங்கள் : தேர்வுகள் நடைபெறும்பே õது, அதைச் சுற்றி ஒரு புகை மண்டலம் சூழ்ந்து கொண்டிருக்கிறது. இந்த புகை மண்டலம் நீக்கப்படும். தேர்வு என்பது புதிராக இல்லாமல், யாரை பார்க்க வேண்டும், யாரைப் பிடிக்க வேண்டும் என்ற தேவையற்ற சிந்தனையெல்லாம், விண்ணப்பதாரர்களுக்கு எழ வேண்டியது இருக்காது. அந்தளவிற்கு, தேர்வு நடைமுறைகள் அனைத்தும் வெளிப்படையாக இருக்கும்.

விடைத்தாள்களுக்கான மாதிரி வினா-விடை, தேர்வு முடிந்ததும், இணையதளத்தில் வெளியிடப்படும். இதில், விண்ணப்பதாரர்களுக்கு ஆட்சேபனை இருந்தால், அதை தெரிவிக்க, 10 நாட்கள் வாய்ப்பு அளிக்கப்படும். அவர்கள் அளிக்கும் ஆட்சேபனை குறித்து, நிபுணர் குழு ஆய்வு செய்து, உரிய விடைகளை தெரிவிக்கும். அதனடிப்படையில், தேர்வு முடிவுகள் வெளியிடப்படும்.

விடைத்தாள்களின் நகல்கள், விண்ணப்பதாரர்கள் பார்வைக்கு தருவதுடன், அவர்களுக்கு குறைந்த கட்டணத்திலும் வழங்கப்படும்.

தேர்வாணையத்திற்கு இதுவரை, ஆண்டு செயல்பாடுகள் குறித்த தேர்வு அட்டவணை இல்லை. இனி, இது உருவாக்கப்படும். ஒரு ஆண்டில், என்னென்ன தேர்வுகள் நடக்கின்றன, இதன் முடிவுகள் எப்போது வெளியிடப்படும், தேர்வுகளின் நிலை என்ன என்பது உட்பட, ஒரு ஆண்டில் மேற்கொள்ளப்படும் அனைத்து தகவல்களும், இதில் இடம் பெற்றிருக்கும்.

பல வேலைகளுக்கு, ஒரே கல்வித் தகுதி தான் உள்ளது. ஆனாலும், ஒரு விண்ணப்பதாரர், பல வேலைகளுக்காக தனித்தனியே விண்ணப்பிக்கிறார். இதை தவிர்க்கும் வகையில், ஒருமுறை விண்ணப்பிக்கும்போது, அவருக்கு தனி குறியீடு எண் வழங்கப்பட்டு, அவர் பல தேர்வுகளை எழுத விரும்பும் பட்சத்தில், அவருக்கு வழங்கப்படும் குறியீட்டு எண்ணை, இணைய தளத்தில் பதிவு செய்தால், அதுவே விண்ணப்பமாக ஏற்றுக் கொள்ளப்படும்.

தேர்தலின்போது, ஓட்டுப் பதிவு மற்றும் ஓட்டு எண்ணிக்கை மையங்களில் கேமராக்கள் பொருத்தப்பட்டு, கண்காணிக்கப்படுகின்றன. அதே போல், டி.என்.பி.எஸ்.சி., தேர்வு நடைபெறும் அனைத்து தேர்வு மையங்கள் மற்றும் நேர்முகத்தேர்வு நடைபெறும் அறைகள் ஆகிய இடங்களில், கேமராக்கள் பொருத்தப்பட்டு, அனைத்துப் பணிகளும், பதிவு செய்யப்படும். ஏதாவது பிரச்னை, புகார் என்று வந்தால், கேமராக்களில் பதிவான காட்சிகள் முழுவதையும் ஆய்வு செய்து, மேற்கொண்டு உரிய நடவடிக்கை எடுப்போம்.

தேர்வாணையத்தின் இணையதளம் புதுப்பிக்கப்பட்டு, பல்வேறு கூடுதல் தகவல்கள் அதில் வெளியிடப்படும்.
அரசுப் பணியாளர்கள் மேற்கொள்ளும் பணிப் பொறுப்புகளை கருத்தில் கொண்டு, தேர்வுக்கான பாடத் திட்டங்களில், உரிய மாற்றங்களும், தேர்வர்களின் பகுத்தாய்வு திறனை ஆராயும் வகையிலும், தேர்வு முறையில் உரிய சீர்திருத்தங்கள் கொண்டுவரப்படும். இவ்வாறு ஆர்.நட்ராஜ் கூறினார். பேட்டியின்போது, தேர்வாணையத்தின் செயலர் உதயசந்திரன் உடனிருந்தார்.

dinamalar

இன்றிலிரிந்து கமிஷன் எனும் வார்த்தைக்கு அர்த்தம் அன்பளிப்பு, கட்சி நிதி அளிப்பு, வளர்ச்சி நிதி என்று அறியப் படுமோ? திருந்தி திருந்தச் செய்தால் நல்லாத்தான் இருக்கும்.

வார்த்தைகள் நன்றாக தான் இருக்கிறது ஆனால் செயல்முறை வடிவம் ஆகும் பொது வேறு மாதிரி ஆகாமல் இருந்தால் சரி தான்

இளமாறன் wrote:வார்த்தைகள் நன்றாக தான் இருக்கிறது ஆனால் செயல்முறை வடிவம் ஆகும் பொது வேறு மாதிரி ஆகாமல் இருந்தால் சரி தான்