அடிலெய்ட் ஆடுகளமும் பவுன்ஸர்களுக்கு சாதகமானது - ஆறுதல் வெற்றியாவது கிட்டுமா?

அடிலெய்ட்: ஆஸ்திரேலிய ஆடுகளங்களில் ஏற்படும் பவுன்ஸர் பந்துகளால் இந்திய வீரர்கள் திணறி வருகின்றனர். இதனையடுத்து வரும் 24ம் தேதி கடைசிப் போட்டி நடைபெற உள்ள அடிலெய்ட் ஆடுகளமும் அதிக பவுன்ஸர்களை ஏற்படுத்தும் வகையில் அமைக்கப்பட்டுள்ளதாக ஆடுகள பரமரிப்பாளர் தெரிவித்துள்ளார்.

ஆஸ்திரேலியாவுக்கு மூத்த வீரர்களுடன் சென்ற இந்திய அணி, அங்கு முதல் முறையாக டெஸ்ட் தொடரை கைப்பற்றும் என்று எதிர்பார்க்கப்பட்டது. ஆனால் ஆஸ்திரேலியா இளம்பந்துவீச்சாளர்கள், இந்திய பேட்ஸ்மேன்களின் ரன் குவிப்பை தடுத்து நிறுத்தினர்.

ஆஸ்திரேலியா ஆடுகளங்கள் வேகபந்து மற்றும் பவுன்ஸர் பந்துகளுக்கு ஒத்துழைத்ததால், இந்திய வீரர்களால் ரன் குவிக்க முடியவில்லை. 4 போட்டிகள் கொண்ட டெஸ்ட் தொடரில் 3 போட்டிகளில் இந்திய தோல்வி அடைந்து தொடரை இழந்த நிலையில், கடைசிப் போட்டியில் ஆறுதல் வெற்றிப் பெறும் முயற்சியில் ஈடுபட்டு வருகின்றது.

இந்த நிலையில் இந்திய அணிக்கு அதிர்ச்சி அளிக்கும் வகையி்ல், கடைசிப் போட்டி நடைபெறும் அடிலெய்ட் ஆடுகளமும், பவுன்ஸர் மற்றும் வேகப்பந்துக்கு ஒத்துழைக்கும் வகையில் அமைக்கப்பட்டு வருகின்றது என்று ஆடுகளத்தின் பராமரிப்பாளர் தெரிவித்துள்ளார்.

இது குறித்து பிட்ச் பராமரிப்பாளர் டேமியன் ஹாப் கூறியதாவது,

அடிலெய்ட் ஆடுகளத்தில் அதிகளவில் புற்கள் இருப்பதால், பந்துகள் அதிக பவுன்ஸர்களாக வரும். இதனால் அடிலெய்ட் ஆடுகளமும், கடந்த 3 போட்டிகள் நடந்த ஆடுகளங்களை ஒத்திருக்கும். முதல் நாளில் வேகப்பந்துவீச்சுக்கும், 2வது மற்றும் 3வது நாட்களில் பேட்ஸ்மேன்களுக்கும், கடைசி 2 நாட்களில் பலவகையான பவுன்ஸர் பந்துகளுக்கும் ஆடுகளம் சாதகமாக செயல்படும்.

ஆடுகளத்தை பவுன்ஸர் மற்றும் வேகபந்துக்கு ஒத்துழைக்கும் வகையி்ல் அமைக்குமாறு ஆஸ்திரேலியா அணியின் தரப்பில் இருந்து யாரும் கோரிக்கை வைக்கவில்லை. வீரர்களுக்கு சவாலான ஆடுகளமாக அமைக்க வேண்டும் என்ற எண்ணத்தில் தான் பவுன்ஸர் பந்துகளுக்கு ஏற்ற வகையில் அமைக்கப்பட்டுள்ளது என்றார்.

அடிலெய்ட்டில் தட்பவெப்பநிலை 37 டிகிரியாக இருப்பதால், போட்டியின் இடையே இயற்கை குறுக்கிடாது என்று எதிர்ப்பார்க்கப்படுகின்றது.

தட்ஸ் தமிழ்