கோபியில் பயங்கரம்: பிறந்த பச்சிளம் பெண் குழந்தை தலை துண்டித்து கொலை- நரபலியா?

**இளமாறன்** · **இளமாறன்** Tue Jan 17, 2012 1:39 am

கோபி, ஜன. 16-

கோபிஆண்டவர்வீதியில் பொங்கல் அன்று காலை 8.30 மணிக்கு வழக்கம்போல் அப்பகுதி சிறுவர்கள் பம்பரம்விட்டு விளையாடிக் கொண்டிருந்தனர். அப்போது அந்த பம்பரம் அங்குள்ள சாக்கடையில் விழுந்து விட்டது. உடனே சிறுவர்கள் சாக்கடைக்கு சென்று பார்த்தனர். அங்கு சாக்கடைக்குள் ஒரு குழந்தையின் தலையும், முண்டமும் தனித்தனியாக கிடந்துள்ளது.

இதை பார்த்து பயந்துபோன சிறுவர்கள் அலறி அடித்து கொண்டு ஓடினர். பின்னர் இதுபற்றி தங்கள் பெற்றோரிடம் சென்று கூறினர்.

இதையடுத்து அப்பகுதி மக்கள் திரண்டு வந்து பார்த்தனர். குழந்தையின் உடலை கண்டு அவர்கள் கண்ணீர் விட்டு கதறி அழுதனர். பின்னர் இதுபற்றி கோபி போலீசுக்கு தகவல் தெரிவிக்கப்பட்டது.

தகவல் அறிந்த இன்ஸ்பெக்டர் இளங்கோவன் மற்றும் போலீசார் சம்பவ இடம் விரைந்து வந்து குழந்தையின் உடலை வெளியே எடுத்தனர். கொலையாளிகள் அந்த பச்சிளம் பெண் குழந்தையை கொடூரமாகவெட்டி கொலை செய்துள்ளனர். தலையை வெட்டி துண்டித்து விட்டு பின்னர் குரல் வளையை அறுத்துள்ளனர்.

அந்த குழந்தை பிறந்து 7 நாட்கள் தான் இருக்கும் என போலீசார் தெரிவித்தனர். தொப்புள் கொடியும் சரியாக காயவில்லை. இந்த குழந்தையின் பெற்றோர் யார்? கொலைக்கான காரணம் என்ன என்பது பற்றி எதுவும் தெரிய வில்லை. ஆனால் தலை துண்டித்து கொலை செய்யப்பட்டு இருப்பதால் அந்த குழந்தையை நரபலி கொடுத்திருக்கலாம் என்று சந்தேகிக்கப்படுகிறது.

நரபலி கொடுத்துவிட்டு உடலை எங்காவது வீசி செல்லலாம் என்று வரும் போது ரோட்டில் ஆட்கள் நடமாடுவதை பார்த்து சாக்கடையில் போட்டுவிட்டு சென்றிருக்கலாம் என கருதப்படுகிறது.

இது கள்ளக்காதலில் பிறந்த குழந்தையாக இருக்க அதிகம் வாய்ப்பு இல்லை. கள்ளக்காதலில் பிறந்த குழந்தையை நெல் கொடுத்தோ? தலையணை வைத்து அமுக்கியோதான் கொலை செய்வார்கள். இவ்வளவு கொடூரமாக கொலைசெய்ய வாய்ப்பில்லை என்றும் போலீசார் கூறினர்.

கொலை குறித்து விசாரிக்க துணை போலீஸ் சூப்பிரண்டு சுந்தர்ராஜன் மேற்பார்வையில் தனிப்படை அமைக்கப்பட்டுள்ளது. அந்த தனிப்படை போலீசார் சுற்றுவட்டார ஆஸ்பத்திரிகளில் பிறந்த குழந்தைகளின் விபரம் சேகரித்து வருகின்றனர்.

மேலும் குழந்தைகள் ஏதும் காணாமல் போனதா? என்றும் விசாரிக்கின்றனர். மேலும் கொலையுண்ட குழந்தையின் உறுப்புகள் டி.என்.ஏ. பரிசோதனைக்கு கோவை மருத்துவ கல்லூரி ஆஸ்பத்திரிக்கு அனுப்பி வைக்கப்பட்டுள்ளதாக துணை போலீஸ் சூப்பிரண்டு சுந்தர்ராஜன் கூறினார்.

பச்சிளம் பெண் குழந்தை கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியுள்ளது.

மாலைமலர்