பாலமேடு ஜல்லிக்கட்டில் இன்று

பாலமேடு:மதுரை மாவட்டம் பாலமேட்டில், நேற்று நடந்த ஜல்லிக்கட்டில், 355 காளைகள் சீறி வந்து, ஆக்ரோஷமாக பாய்ந்தன. காளைகளை அடக்க முயன்ற, ஆறு வீரர்கள் படுகாயமடைந்தனர்; 20 பேர் லேசான காயம் அடைந்தனர். திருச்சி, பெரிய சூரியூரில், 20க்கும் மேற்பட்டோர் லேசான காயம் அடைந்தனர். பாலமேடு மஞ்சமலையாற்றில், காலை 10 மணிக்குத் துவங்கிய ஜல்லிக்கட்டு நிகழ்ச்சியில், முதலில், ஐந்து காளைகள் அவிழ்த்து விடப்பட்டன. 10.15 மணி முதல், வாடிவாசல் வழியாக மற்ற காளைகள் அவிழ்த்து விடப்பட்டன.

மாடுபிடி வீரர்கள், பச்சை நிறத்தில் சீருடை அணிந்திருந்தனர். மதுரை, திண்டுக்கல், தேனி, சிவகங்கை, திருச்சி, புதுக்கோட்டை, மாவட்டங்களில் இருந்து காளைகள் பங்கேற்றன. பாதுகாப்புப் பணியில், 1,500 போலீசார் ஈடுபட்டனர். கூரிய கொம்புகள், வெறியும் பயமும் கலந்த பார்வை, மிரட்டும் திமில்களுடன் காளைகள் களத்தில் இறங்கின. பயிற்சி பெற்ற வீரர்கள், "வந்து பார்...' என, திமில்களை பிடித்தும், காளையின் கால்களை தங்களின் கால்களால் மடக்கியும் அடக்கினர். வீரர்களுக்கு தங்கம், வெள்ளி காசுகள், மிக்சி, கிரைண்டர், சைக்கிள், பீரோ, பணம் பரிசுகளாக வழங்கப்பட்டன.பிடிபடாத மாடுகளின் உரிமையாளருக்கு, பரிசுகள் வழங்கப்பட்டன. ஊமச்சிகுளம் வினோத், சின்ன ஊர்சேரி தினேஷ், முடக்கத்தான் மணி, அரிட்டாபட்டி கருப்பணன் போன்ற வீரர்கள், சீறிய காளைகளை, லாவகமாக அடக்கி, பார்வையாளர்களை உற்சாகப்படுத்தியதுடன், பரிசுப் பொருட்களையும் அள்ளிச் சென்றனர்.கீழசின்னாளபட்டி பாஸ்கர், நான்கு மாடுகளைப் பிடித்து, பார்வையாளர்களின் பாராட்டைப் பெற்றார். மாலை 4.10 மணிக்கு ஜல்லிக்கட்டு முடிந்தது. இதில், 355 மாடுகள் பங்கேற்றன. விதி மீறல் காரணமாக, 35 மாடுகள், சோதனையின் போது தகுதியிழப்பு செய்யப்பட்டன.



மத்திய பிராணிகள் நல வாரியம், மனித உரிமை ஆர்வலர்கள், ஜல்லிக்கட்டை வீடியோவில் பதிவு செய்தனர்.

6 பேர் காயம்:இப்போட்டியில், ஆறு பேர் படுகாயம் அடைந்தனர்; மேலும் 20க்கும் மேற்பட்டோருக்கு சிறு காயங்கள் ஏற்பட்டன. அவர்களுக்கு, அங்குள்ள மருத்துவ முகாமில் சிகிச்சை அளிக்கப்பட்டது.எம்.எல்.ஏ.,க்கள், முக்கிய பிரமுகர்கள் பார்வையாளர்களாகப் பங்கேற்றனர்.திருச்சி:திருச்சி திருவெறும்பூர் அருகே பெரியசூரியூரில், ஆண்டுதோறும் தை மாதம் 2ம் தேதி, மாட்டு வேடிக்கை எனப்படும் ஜல்லிக்கட்டு, கடந்த 100 ஆண்டுக்கும் மேலாக வெகு சிறப்பாக நடந்து வருகிறது.நேற்று காலை, பெரிய சூரியூர் திடலில் உள்ள நற்கடல்குடி கருப்பண்ணசாமி, சங்கிலி கருப்பு, சக்தி மாரியம்மன் கோவிலில் பெண்கள் பொங்கல் வைத்து வழிபட்டனர். முதலில் அவிழ்க்கப்பட்ட கோவில் காளையை, யாரும் அடக்கவில்லை.
காலை 11 மணிக்கு, திருச்சி எம்.பி., குமார், ஜல்லிக்கட்டை கொடியசைத்து துவக்கி வைத்தார். கலெக்டர் ஜெயஸ்ரீ, கோட்டத் தலைவர் ஞானசேகர் உட்பட பலர் பங்கேற்றனர். ஜல்லிக்கட்டில், திருச்சி, மதுரை, தஞ்சை, புதுக்கோட்டை, சேலம், திருவாரூர் உள்ளிட்ட மாவட்டங்களைச் சேர்ந்த, 230க்கும் மேற்பட்ட முரட்டுக்காளைகள் பங்கேற்றன; 300க்கும் மேற்பட்ட மாடுபிடி வீரர்கள் கலந்து கொண்டனர்.மாடுபிடி வீரர்களுக்கு, பதிவெண்ணுடன் கூடிய, கால்சட்டை, பனியன்கள் ஒரே நிறத்தில் வழங்கப்பட்டிருந்தன.சீறிப் பாய்ந்த காளைகளை அடக்க முயன்ற, 20க்கும் மேற்பட்ட மாடுபிடி வீரர்கள் லேசான காயம் அடைந்தனர். ஜல்லிக்கட்டு விழா முழுவதையும், "புளுகிராஸ்' அமைப்பினர் கண்காணித்தனர். 300க்கும் மேற்பட்ட
காளைகள் எண்ணிக்கை குறைய காரணம் என்ன?கடுமையான நிபந்தனைகள் காரணமாக, இந்தாண்டு ஜல்லிக்கட்டில்பங்கேற்ற காளைகளின் எண்ணிக்கை குறைந்தது.கடந்த, 2010ல் நடந்த ஜல்லிக்கட்டில் 520க்கும் மேற்பட்ட காளைகள் பங்கேற்றன. 2011ல், 400 மாடுகள் பங்கேற்றன. இந்தாண்டு, ஐகோர்ட்டின் கடுமையான நிபந்தனைகள் காரணமாக, 355 மாடுகளே பங்கேற்றன. கால்நடை பராமரிப்புத் துறை இணை இயக்குனர் டாக்டர் ராமகிருஷ்ணன் கூறுகையில், ""இந்த முறை, மாடுகளுக்கான பரிசோதனைகள் கடுமையாக்கப்பட்டுள்ளன. ஒன்றரை வயதுக்கு மேல் உள்ள காளைகள் மட்டுமே அனுமதிக்கப்பட்டன. பல்வேறு சோதனைகள் மேற்கொள்ள உள்ளதால், ஒரு மாட்டுக்கு செய்யப்படும் பரிசோதனை நேரமும் அதிகமாகிறது,'' என்றார்.இந்த முறை, நேரமின்மை காரணமாக, 80 மாடுகள், ஜல்லிக்கட்டில் அவிழ்த்து விடப்படவில்லை. அந்த மாடுகளுக்கு ஊர் மரியாதை செய்யப்பட்டு, உரிமையாளர்களுக்கு வேட்டி, துண்டு வழங்கப்பட்டது.
* தாலுகா அளவிலான தலையாரிகள், "உள்ளூர் போலீஸ்' என, பேட்ஜ் அணிந்து பணி செய்தனர்.

தினமலர்

கேரளாவில் யானைகள் பயன்படுத்தவும், மாட்டிறைச்சிக்காக மாடுகளை வண்டிகளில் ஏற்றி செல்வதையும் தடைசெய்ய மத்திய அமைச்சர் ஜெயராம் ரமேஷ் முன்வரவேன்டும்.