1.34 கோடி குடும்பங்களுக்கு அரசு மருத்துவ காப்பீட்டுத் திட்டம் துவக்கம்

சென்னை : புதிய மருத்துவ காப்பீட்டுத் திட்டமான, "முதலமைச்சரின் விரிவான மருத்துவ காப்பீட்டுத் திட்டத்தை' முதல்வர் ஜெயலலிதா, தலைமை செயலகத்தில் நேற்று துவக்கி வைத்தார்.

இதுகுறித்து அரசு வெளியிட்ட செய்திக்குறிப்பு: இக்காப்பீட்டுத் திட்டத்தை நடைமுறைப்படுத்த பொதுத்துறை நிறுவனமான, யுனைடெட் இந்தியா காப்பீட்டு நிறுவனம் தேர்வு செய்யப்பட்டுள்ளது. முதல் காலாண்டு காப்பீட்டு தவணைத் தொகையான, 183.64 கோடி ரூபாய்க்கான காசோலையை, தலைமை செயலகத்தில் நேற்று நடந்த நிகழ்ச்சியில், யுனைடெட் இந்தியா நிறுவன தலைவர் மற்றும் மேலாண் இயக்குனர் சீனிவாசனிடம், முதல்வர் ஜெயலலிதா வழங்கினார். மேலும், ஏழு பயனாளிகளுக்கு, புதிய மருத்துவ காப்பீட்டு அட்டை மற்றும் மருத்துவ சிகிச்சை மேற்கொள்வதற்கான ஒப்புதல் கடிதம் வழங்கப்பட்டன.

ரூ. 4 லட்சம் : புதிய மருத்துவ காப்பீட்டுத் திட்டத்தின் கீழ், ஒரு குடும்பத்திற்கு, ஒரு லட்சம் வீதம், நான்கு ஆண்டுகளுக்கு, நான்கு லட்ச ரூபாய் வரையும், சில குறிப்பிட்ட சிகிச்சைகளுக்கு, ஆண்டுக்கு, 1.50 லட்ச ரூபாய் வரையும் வழங்க, வகை செய்யப்பட்டுள்ளது. இந்த திட்டத்தால், 1.34 கோடி குடும்பங்கள் பயன்பெறும். இதில், பச்சிளம் குழந்தைகளுக்கான சிகிச்சை முறை உட்பட, 1,016 சிகிச்சை முறைகளுக்கும், 113 தொடர் சிகிச்சை முறைகளுக்கும், வழி செய்யப்பட்டுள்ளன. மேலும், 23 நோய் அறிதல் கண்டுபிடிப்பு முறைகளுக்கும் அனுமதி வழங்கப்பட்டுள்ளன. சிகிச்சை சம்பந்தபட்ட பரிசோதனைகளும், காப்பீடுக்காக வரையறுக்கப்பட்ட தொகையில் அடங்கும். அறுவை சிகிச்சை தேவைப்படாத பட்சத்திலும், செலவழிக்கப்பட்ட கட்டணத் தொகையை வழங்க, வழிவகை செய்யப்பட்டுள்ளது.

உடனடி சிகிச்சை : அனைத்து மாவட்டங்களிலும், மாவட்டத்துக்கு, குறைந்தது ஆறு மருத்துவமனைகள், சென்னை, கோவை, மதுரை போன்ற மாநகரங்களில், கூடுதல் மருத்துவமனைகள் என, மொத்தம், 250 மருத்துவமனைகளுக்குக் குறையாமல், தமிழகம் முழுவதும், இந்த காப்பீட்டுத் திட்டம் அங்கீகரிக்கப்படும். இத்தகைய மருத்துவமனைகளுக்கு, மருத்துவ பரிசோதனை முகாம்களை நடத்தவும், தேவையான சிகிச்சைகளை உடனடியாக அளிக்கவும் அறிவுறுத்தப்பட்டுள்ளது. இவ்வாறு செய்திக்குறிப்பில் தெரிவிக்கப்பட்டுள்ளது.

தினமலர்