தசரதர் வழிபட்ட விருபாக்ஷீஸ்வரர்!

ஆரணி அருகே, அப்பையூர் என்கிற பையூரில் விசாலாட்சி அம்மன் சமேத விருபாக்ஷீஸ்வரர் அருள் புரிகிறார்.

அப்பைய தீட்சிதர்:

மொம்முகுட்டி என்னும் நாயக்கர் மன்னர் இப்பகுதியை ஆட்சி செய்தார். அவரது அரசவையில் அமைச்சராகப் பணிபுரிந்தவர் அப்பைய தீட்சிதர். வேத விற்பன்னரான இவருக்கு மன்னர் தானமாக அளித்த பகுதியே அப்பையூர். இங்கே விசாலாட்சி அம்மன் சமேத விருபாக்ஷீஸ்வரர் ஆலயம் மற்றும் பெருந்தேவி சமேத கரியமாணிக்க பெருமாள் ஆலயத்தை கட்டி திருப்பணி செய்தார் அப்பைய தீட்சிதர்.

விருபாக்ஷீஸ்வரர்:

சுயம்பு மூர்த்தியான விருபாக்ஷீஸ்வரர் நாகராஜாவுடன் காட்சி தருகிறார். இவரை வியாழக் கிழமைகளில் வழிபட நினைத்த காரியம் நடக்கும் என்பது பக்தர்களின் நம்பிக்கை.

விசாலாட்சி அம்மன்:

அழகான தோற்றத்துடன் காசி விசாலாட்சிக்கு இணையாக கம்பீரமாகக் காட்சி தருகிறார் விசாலாட்சி அம்மன். எல்லோருக்கும் மங்கலம் நல்கும் அன்னையை வெள்ளிக் கிழமைகளில் வழிபட திருமணத் தடைகள் நீங்கும்.

பிள்ளையார், முருகன், ஐயப்பன், நவக்கிரஹ சந்நிதிகளும் இக்கோயிலில் உள்ளன.

தசரதர் வழிபட்டார்:

இக்கோயிலுக்கு அருகே கமண்டலநாக நதியின் கரையில் வரலாற்றுச் சிறப்புமிக்க புத்திரகாமேட்டீஸ்வரர் ஆலயம் உள்ளது. புத்திர வரம் வேண்டி தசரத சக்கரவர்த்தி இங்கு மஹாயாகம் செய்தார். அப்போது அப்பையூருக்கும் வருகை தந்தவர் விருபாக்ஷீஸ்வரரையும் தரிசனம் செய்ததாக தல வரலாறு கூறுகிறது.

திருப்பணி:

சுமார் 500 ஆண்டுகள் பழமை வாய்ந்த இக்கோயிலில் இந்துசமய அறநிலையத்துறையின் ஒத்துழைப்புடன் தற்போது திருப்பணி தொடங்கப்பட்டு நடந்து வருகிறது. திருப்பணி குறித்த தகவல் அறிய விரும்புவோர் 9487234797 என்ற எண்ணில் தொடர்பு கொள்ளலாம்.

அமைவிடம்:

திருவண்ணாமலை மாவட்டம், ஆரணியிலிருந்து 4கி.மீ. தொலையில் உள்ளது பையூர். வேலூர், ஆற்காட்டிலிருந்தும் பேருந்து வசதி உள்ளது.

எஸ்.கோபி.