எட்டாம் தேதி உண்ணாவிரதம் அலறும் நடிகர்கள் தரப்பு?

எட்டாம் தேதி உண்ணாவிரதம் அலறும் நடிகர்கள் தரப்பு?

வெட்டிப்பய ஊர்ல வௌச்சலுக்கொன்னும் குறைச்சல் இல்லங்கிற மாதிரியே நடக்குதுஒவ்வொரு பிரச்சனையும். அண்டை மாநிலத்திற்கும் நமக்கும் நடக்கிற பிரச்சனையில், தமிழர்களின் வீரத்தை எழுப்பி, கூடவே கொஞ்சம் விவேகத்தையும் தூவி சிலரை உணர்ச்சி குவியலாக்கிவிட்டு, சட்டென்று காணாமல் போய்விடுவது நமது ஊர் லீடர்களுக்கு புதுசில்லை.
போராட வந்தவர்தான் மகாத்மா. வராதவர் மகா மட்டமான ஆத்மா என்கிற அளவுக்கு பிரச்சாரம் கிழியும். இப்படி பல சம்பவங்களை பல இடங்களில் கண்டு களித்த தமிழர்களுக்கு வருகிற 8-ந் தேதி இனிய நாளிது. இன்ப நாளிதுவாக மாறப் போகிறது.


முல்லை பெரியாறு அணை அருகே இயக்குனர் பாரதிராஜா தலைமையில் உண்ணாவிரதம் இருக்க முடிவு செய்துள்ளது இயக்குனர்கள் சங்கம். தனது அலுவலகம் தாக்கப்படுகிற வரைக்கும் முரட்டு பேச்சு பேசி வந்த பாரதிராஜா, அந்த சம்பவத்திற்கு பின் தன்னை நம்பி வந்த உதவி இயக்குனர்களை கூட தன் வீட்டுப் பக்கம் வரக்கூடாது என்று எச்சரித்ததை இலங்கை பிரச்சனையில் கண்ணார கண்டு அதிர்ந்தது கோடம்பாக்கம். அப்புறம் பல காலம் பேசாமலே இருந்தார் அவர்.
முதல் ஷெட்யூலிலேயே தனது படத்தில் நடிக்கும் மலையாள நடிகைகளை வீட்டுக்கு அனுப்பிவிட்டு படப்பிடிப்பையும் முடித்துக் கொண்ட பாரதிராஜா, வருகிற 8ந் தேதி முல்லை பெரியாறு அணைக்கு அருகில் உண்ணாவிரதம் இருக்கப் போகிறாராம். கலை வேறு, அணை வேறு என்று விளக்கமும் கொடுப்பார் அவர். பிரச்சனை அதுவல்ல இப்போது.


கடந்த சில தினங்களுக்கு முன்புதான் பாரதிராஜாவை கண்டித்து தீர்மானம் நிறைவேற்றியது நடிகர் சங்கம். எந்த பிரச்சனையாக இருந்தாலும் அதில் நடிகர்களை குறை சொல்வதே அவருக்கு வாடிக்கையாக இருக்கிறது. இனிமேல் அப்படி பேசுவதை அவர் நிறுத்திக் கொள்ள வேண்டும் என்றெல்லாம் சீறியிருந்தார்கள் நடிகர்கள்.
இதற்கு பிறகும் இந்த உண்ணாவிரத போராட்டத்தில் நடிகர்கள் கலந்து கொள்ள வேண்டும் என்று இவர் அழைப்பது புதுப்புது சங்கடங்களை ஏற்படுத்தப் போகிறது கோடம்பாக்கத்தில். முல்லை பெரியாறு பிரச்சனை தமிழனின் வாழ்வாதார பிரச்சனை என்பதை மறுப்பதற்கில்லை. இதை வைத்துக் கொண்டு ஒரு அரசியல் சுனாமி கிளம்புமே, அதை நினைத்துதான் அலறுகிறார்கள் கோடம்பாக்கத்தில்.
அஜீத் வரல, விஜய் வரல, போண்டா மணி வரலைன்னு கூக்குரல்கள் எழும். கண்டனங்கள் பறக்கும். எல்லாவற்றையும் ஏதாவத ஒரு சேனல் லைவ்வாக ஒளிபரப்பும். எனக்கு ஏன் அந்த ஒளிபரப்பு உரிமையை தரல என்று இன்னொரு சேனல் எகிறும். ஆக அடுத்த கலவரத்துக்கு விதை போட்டுட்டாங்கய்யா போட்டுட்டாங்க!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
தகவல் பகிர்வு - தமிழ் வாரஇதழ் செய்திகள், ARRKAY
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

பாரதிராஜாவை விமர்சிக்கும் தகுதி எந்த நடிகருக்கும் இல்லை...இல்லை...இல்லை...இல்லவே இல்லை...