9-ந் தேதி வேட்புமனு தாக்கல் தொடங்குகிறது: ஏப்ரல் 13-ந் தேதி தேர்தல்: மே 13-ந் தேதி ஓட்டு எண்ணிக்கை

தமிழக சட்டசபைக்கு ஒரே நாளில் ஓட்டுப்பதிவு: 19-ந் தேதி வேட்புமனு தாக்கல் தொடங்குகிறது: ஏப்ரல் 13-ந் தேதி தேர்தல்: மே 13-ந் தேதி ஓட்டு எண்ணிக்கை


தமிழக சட்டசபை தேர்தல், ஏப்ரல் 13-ந் தேதி ஒரே கட்டமாக நடைபெறுகிறது. வேட்புமனு தாக்கல், வருகிற 19-ந் தேதி தொடங்குகிறது. ஓட்டு எண்ணிக்கை, மே 13-ந் தேதி நடைபெறும்.

புதுடெல்லி, மார்ச்.2- தமிழக தற்போதைய சட்டசபையின் பதவிக்காலம், வருகிற மே மாதம் 16-ந் தேதியுடன் முடிவடைகிறது.

ஏப்ரல் 13-ல் தேர்தல்

அதைத் தொடர்ந்து தமிழக சட்டசபை தேர்தலுக்கான ஆயத்த பணிகளை தலைமை தேர்தல் கமிஷன் மேற்கொண்டு வந்தது. இந்த நிலையில், தமிழக சட்டசபை தேர்தல் தேதி பற்றிய அதிகாரபூர்வ அறிவிப்பு நேற்று வெளியிடப்பட்டது.

தலைமை தேர்தல் கமிஷனர் எஸ்.ஒய்.குரேஷி, தேர்தல் அட்டவணை தொடர்பான அறிவிப்பை டெல்லியில் வெளியிட்டார்.

அதன்படி, தமிழ்நாட்டில் ஏப்ரல் 13-ந் தேதி (புதன்கிழமை) அன்று தேர்தல் நடைபெறுகிறது.

ஒரே நாளில் ஓட்டுப்பதிவு

தமிழ்நாட்டில் உள்ள 234 தொகுதிகளிலும், ஒரே கட்டமாக ஏப்ரல் 13-ந் தேதி அன்றே ஓட்டுப்பதிவு நடத்தி முடிக்கப்படும்.

தமிழக தேர்தலுக்கான அதிகாரபூர்வமான அறிவிக்கை வருகிற 19-ந் தேதி (சனிக்கிழமை) அன்று வெளியிடப்படும்.

வேட்பு மனு தாக்கல்

அதிகாரபூர்வ தேர்தல் அறிவிக்கை வெளியாகும் வருகிற 19-ந் தேதி அன்றே வேட்பு மனு தாக்கல் தொடங்கிவிடும். வேட்பு மனுக்கள் தாக்கல் செய்வதற்கு கடைசி நாள், மார்ச் 26-ந் தேதி (சனிக்கிழமை) ஆகும். வேட்பு மனுக்கள் பரிசீலனை, மார்ச் 28-ந் தேதி (திங்கட்கிழமை) நடைபெறும்.

வேட்பு மனுக்களை வாபஸ் பெறுவதற்கு கடைசி நாள், மார்ச் 30-ந் தேதி (புதன்கிழமை). ஏப்ரல் 13-ந் தேதி புதன்கிழமை அன்று ஓட்டுப்பதிவு நடைபெறும்.

ஓட்டு எண்ணிக்கை

மே மாதம் 13-ந் தேதி (வெள்ளிக்கிழமை) அன்று ஓட்டு எண்ணிக்கை நடைபெறுகிறது. தேர்தல் நடைமுறை பணிகள், மே 16-ந் தேதி அன்று முடிவுக்கு வருகிறது. ஓட்டுப்பதிவு நடைபெற்று ஒரு மாதத்திற்குப்பிறகு தமிழ்நாட்டில் ஓட்டு எண்ணிக்கை நடைபெறுவது இதுவே முதல் முறை என்பது குறிப்பிடத்தக்கது.

தேர்தல் தேதி அட்டவணை வெளியான நேற்று முதலே, தமிழ்நாட்டில் தேர்தல் நடத்தை விதிகள் அமலுக்கு வந்துவிட்டன.

புதுச்சேரி

தமிழ்நாட்டைப்போல், புதுச்சேரி மாநிலத்திலும், ஏப்ரல் 13-ந் தேதி புதன்கிழமை அன்று சட்டசபை தேர்தல் நடைபெறும். புதுச்சேரி மாநிலத்தில் உள்ள 30 சட்டசபை தொகுதிகளுக்கும் அன்று ஒரே நாளில் தேர்தல் நடத்தி முடிக்கப்படும். புதுச்சேரி தேர்தலுக்கான வேட்பு மனு தாக்கல் மார்ச் 19-ந் தேதி தொடங்குகிறது.

தமிழ்நாடு, புதுச்சேரி தவிர, கேரளா, மேற்கு வங்காளம், அசாம் ஆகிய 3 மாநில சட்டசபை தேர்தலுக்கான தேதி விவரமும் அறிவிக்கப்பட்டு உள்ளது. கேரள மாநிலத்தில், தமிழ்நாட்டைப்போல் ஏப்ரல் 13-ந்தேதி ஒரே கட்டமாக தேர்தல் நடத்தப்படுகிறது.

மேற்கு வங்காளத்தில் 6 கட்ட தேர்தல்

அசாம் மாநிலத்தில், ஏப்ரல் 4 மற்றும் 11 ஆகிய தேதிகளில் இரண்டு கட்டமாக தேர்தல் நடைபெறுகிறது. மேற்கு வங்காள மாநிலத்தில் ஏப்ரல் 18, 23, 27, மே 3, 7 மற்றும் 10 ஆகிய தேதிகளில் 6 கட்டங்களாக தேர்தல் நடைபெறுகிறது.

மேற்கு வங்காள தேர்தல் முடிந்தபிறகுதான், தமிழ்நாடு உள்ளிட்ட 5 மாநிலங்களிலும் மே 13-ந் தேதி அன்று ஓட்டு எண்ணிக்கை நடைபெறும் என்பது குறிப்பிடத்தக்கது.

தினதந்தி