ஊற்று

**ரா.ரா3275** · **ரா.ரா3275** Tue Jan 03, 2012 5:47 pm

இப்போதெல்லாம்
மனசுக்குள்
சின்னதாய் ஒரு வலி

மனசின் மண்பரப்பில்
தடவிப் பார்த்ததில்
ஏதோ தட்டுப்படுகிறது...

என்ன அது?

விசாரிக்கப்போனால்
வேர்க்கிறது
மூளைக்குள்
அம்பெய்தும் அரிப்பு
நெஞ்சுக்குழியில்
நெருப்பைச் சுரக்கும் கோபம்

முடிக்காமல் விட்ட
பட்டப்படிப்பைப் போல்
அவமானத்தையே
அப்பிவிடுகிறது முகத்தில்

முகவரி கண்டுபிடிக்கும் முயற்சி
தோல்வியைச் சுமக்க...
இப்போதெல்லாம் மனசுக்குள்
சின்னதாய் ஒரு வலி

***

தனிமையைக்
குடித்துக் குடித்தே
ஒரு புள்ளியில்
தேடல் தாகம் உச்சிக்குப் போக

'உடைந்த துண்டுகளாய்ச்
சிதறிக் கிடக்கிறோமோ?'

சிந்தனைத் தீவில்
படகாய் ஒதுங்க
மரக்கிளைகளில்
மனசு தொங்க
பசுமை தேசத்தில்
மூளை இளைப்பாற...
உயிர்ச் செல்களில்
ஒரே குதூகலம்‌

"அப்பாடா!"
என்றிருக்கையில்
தோள்களில் ஏதோ
கனக்கிறது

சுயம் தேடி அலைந்ததில்
தோள்களில் அமர்ந்தது
வெற்றியாம்!

கண்களும் மனசும்
பிறந்ததன் பயனை
இமையோரங்களில்
ஈர அணையைத் தேக்க...

இப்போதெல்லாம் மனசுக்குள்
சின்னதாய் ஒரு வலி
மீண்டும்
மனசின் மண்பரப்பில்
தடவிப் பார்த்ததில்
ஏதோ தட்டுப்படுகிறது

என்ன அது?

விசாரிக்கப் போனால்...

'தேடு!
தேடல்தான் வேர்க்கவைக்கும்
அந்த வேர்வையில்தான்
வெற்றிக் குளிக்கும்!'

அசரீரியின் குரலுக்கு அர்த்தம்?
மீண்டும் தேடல்தானா?!