தானே புயல் கேரளாவை நோக்கி நகர்ந்தது

**இளமாறன்** · **இளமாறன்** Sat Dec 31, 2011 2:32 pm

சனிக்கிழமை, 31, டிசம்பர் 2011 (10:52 IST)

தானே புயல் கேரளாவை நோக்கி நகர்ந்தது

தமிழகத்தை மிரட்டிய தானே புயல் புதுச்சேரிக்கும், கடலூருக்கும் இடையே நேற்று காலை கரையை கடந்தது.

அதிகபட்சமாக புயல் கரையை கடந்தபோது புதுச்சேரியில் 120 கிலோ மீட்டர் வேகத்திலும், கடலூரில் 90 கிலோ மீட்டர் வேகத்திலும் சூறைக்காற்று வீசியது. இதில் மரங்கள் வேரொடு சாய்ந்து விழுந்தது. மின்கம்பங்கள், கட்டிட கூரைகள் அனைத்தும் பறந்து பெரிய சேதம் ஏற்பட்டது.

இதனால் மின்சார தடை, தொலை தொடர்பு தடை ஏற்பட்டு பொதுமக்கள் வீடுகளுக்குள் ளேயே முடங்கி கிடந்தனர். மேலும் ரெயில் போக்குவரத்தும் தமிழகத்தில் பாதிக்கப்பட்டது.

மேலும் தானே புயல் படிபடியாக நகர்ந்து சேலத்தில் காற்றழுத்த தாழ்வு மண்டலமாக மாறும் என்றும் வானிலை ஆய்வு மையம் அறிவித்தது. அதே போல் சேலம் மாவட்டத்தில் நேற்று காலை முதல் லேசாக பெய்து வந்த மழை திடீரென மதியம் முதல் அதிகளவில் சுழன்று சுழன்று காற்று வீசியபடி பலத்த மழை கொட்டியது.

இதனால் காற்றழுத்த தாழ்வு மண்டலம் சேலத்தில் மையம் கொண்டு இருப்பதை உணர முடிந்தது. தொடர்ந்து இடைவிடாமல் மழை கொட்டி தீர்த்தது.

தானே புயல் காரணமாக சேலம்,தர்மபுரி மாவட்டங்களுக்கும் எச்சரிக்கை விடுக்கப்பட்டு இருந்தது. இதனால் வருவாய்த் துறையினர், காவல் துறையினர், மருத்துவ துறையினர், தீயணைப்பு துறையினர் தயார் நிலையில் வைக்கப்பட்டு இருந்தனர். சேலம் மாவட்ட கலெக்டர் மகரபூசணம் புயல் நிலவரங்களை கண்காணித்து வந்தார்.

இந்நிலையில் நேற்று இரவு தானே புயல் சேலத்தில் இருந்து கேரளாவை நோக்கி நகர்ந்து விட்டதாக வானிலை ஆய்வு மையம் அறிவித்துள்ளனர். இந்த புயல் படிபடியாக வலுவிழக்கும். புயல் வலுவிழந்தாலும் தொடர்ந்து மழை இருக்கும் என்று அறிவிக்கப்பட்டு இருக்கிறது. எனவே மழை நீடிக்கும் என்று கூறப்படுகிறது.

தானே புயல் மேற்கு நோக்கி நகர்ந்து விட்டதால் சேலத்துக்கு புயல் அச்சம் நீங்கியது. சேலம் மாவட்டத்தில் அதிகபட்சமாக நேற்று 45 கிலோ மீட்டர் வேகத்தில் சூறாவளி காற்று வீசியது. இதனால் தென்னை மரங்கள், அனைத்தும் ஒடிந்து விழுவது போல் ஆடியது. இருசக்கர வாகன ஓட்டிகள் வாகனங்களை ஓட்ட முடியாமல் அவதியடைந்தனர்.

நக்கீரன்