பைரவர்

ஜோதிடக் கலை பலவகை. ஒவ்வொன்றும் மனிதனின் வாழ்வியலை- அதன் சிக்கலைத் தீர்க்க வழிகாட்டி வருகின்றன. இத்தகைய ஜோதிடக் கலையில் புதிய பரிணாமமாக கால் பெருவிரல் ரேகை ஜோதிடம் திகழ்கிறது. தமிழகத்துக்கு மட்டுமல்லாமல், கேரளம், ஆந்திரம் என பல்வேறு மாநிலங்களில் உள்ள மிகப்பெரிய ஜோதிட மகான்களை சந்தித்து, ஆசி பெற்று, கால் பெருவிரல் ரேகை ஜோதிடத்தில் தனக்கென தனிமுத்திரை பதித்தவர் கே.பி.எஸ். விஜய்.

ஆண்டவன் படைப்பில் ரேகைகள் ஒரு வரப்பிரசாதமாகும். ஆயுள் ரேகை, இதய ரேகை, புத்தி ரேகை மனிதர்களுக்கு ஏற்படுகின்ற விதி ஆகியவற்றிற்கான விஷயங்கள் பலவற்றையும் கால் பெருவிரல் ரேகையால் அறிய முடியும்.

பல்வேறு மனிதர்களின் பாதங்களில் முக்கிய பங்கு வகிக்கிற பெருவிரல் ரேகைகளை அச்சு எடுத்து பல ஆண்டுகளாக ஆராய்ச்சி செய்து, அந்த ரேகை எவ்வாறு அமைந்துள்ளது- அந்த ரேகையை உடையவர் வாழ்க்கை முன்பு எப்படி இருந்தது, தற்போது எப்படி உள்ளது என்பதைக் கண்டறிந்து தீர்வினைத் தருகிறார் விஜய்.

கால் பெருவிரல் ரேகைகளில் வில்வக் கோடுகள், வாகைக் கோடுகள், நகைக் கோடுகள், சங்குக் கோடுகள், சூரியக் கோடுகள், வருணக் கோடுகள், சக்கரக் கோடுகள் என வகை பிரித்து, இத்தகைய கோடுகளைக் கொண்டவர்கள் வாழ்க்கை எப்படி அமையும்- அதிலிருக்கும் பலாபலன்கள்- விளைவுகள்- பரிகாரங்கள் என வாழ்வியல் சிக்கலைத் தீர்த்து வைக்கும் ஜோதிடராகத் திகழ்கிறார்.

பைரவ உபாசகரான இவர், பைரவருக்கென்று சிறப்பான ஒரு ஆலயம் அமைக்கத் தீர்மானித்து, அதன்படி ஈரோடு மாவட்டம், அவல்பூந்துறை பகுதியில் திருப்பணிகளை மேற்கொண்டு வருகிறார். சொர்ண ஆகர்ஷண பைரவர் மூலவராகப் பிரதிஷ்டை ஆகவுள்ள இந்தக் கோவிலில், கருவறைக்கு முன் நூறு அடி நீளமுள்ள மிகப்பெரிய மண்டபம் அமையவுள்ளது. நுழைவாயிலின் மேலே ராஜகோபுரம் அமைப்பது வழக்கம். இங்கு அதற்கு மாற்றாக 33 அடி உயரமுள்ள பிரம்மாண்ட பைரவரின் திருவுருவம் அமையவுள்ளது. இது இந்தியாவிலேயே முதல் மிகப்பெரிய பைரவர் திருவுருமாக இருக்குமாம்.

சிவபெருமானின் மறுவுருவமாகத் திகழ்பவர் பைரவர். எல்லா துன்பங்களிலிருந்தும் பக்தர்களை உடனே காத்தருளும் இவர், வேண்டும் வரங்களை வாரி வழங்குவதில் கருணைக் கடல்! அத்தகைய பைரவருக்கென்று அமையும் இந்த ஆலயம் பக்தர்களால் கொண்டாடப்படும் தலமாக அமையும் என்று நம்பலாம்.
----------------------------