உறவுகள், உணர்வுகள்!

"என்னப்பா இப்படி சர்வ சாதாரணமா சொல்றே? உன் சீனியரும், அவரோட வீட்ல வேலை செஞ்ச பொண்ணும் ஒரே நேரத்துல கர்ப்பமா? டாமிட்! எப்படிம்மா இதை உன் சீனியர் எடுத்துக்கிட்டா? ஜீரணிக்கவே முடியலையேடி!'

"டாக்டர் ஆன்டி! கிட்டத்தட்ட இதே வார்த்தைகளால் இதே கேள்வியை என் சீனியர்கிட்டே கேட்டேன். உடனே வானத்தைப் பார்த்தா ஏதோ சிந்தனை வயப்பட்டா. முதல்ல தன்னோட கட்டுப்பாட்டுலதான் அவளோட உணர்ச்சிகளை வச்சிருந்தா. அப்புறம் கொஞ்ச நேரத்துல உடைஞ்சு போன ஆணி மாதிரி கட்டுப்பாடே இல்லாம கண்ணீராக் கொட்டினா.'

"இந்த விஷயத்தை யார் கிட்டயாவது சொல்லி அழணும்போல இருக்குடி. யார் கிட்டடி இந்த மானங்கெட்ட விஷயத்தைப் போய்ச் சொல்வேன்? ஒவ்வொரு பொண்ணுக்கும் ஆத்மார்த்தமான வடிகால் அம்மா. அவுங்ககிட்ட பகிர்ந்துக்க முடியாத விஷயமாயிடுச்சுடி இது!'

"ஏன்? சொல்ல வேண்டியதுதானே?'- இது நான்.

"நான் கர்ப்பமானதுக்கே ஷாக் ஆனாங்கடி! நம்புவியா இதை? எங்கம்மா சற்று மாடர்ன். ஏண்டி இப்படி இவ்வளவு சீக்கிரமா வாந்தியும் வயிறுமா நிக்கிறேன்னாங்க.' - அப்படீன்னா என் சீனியர்.

"உங்கம்மாவை புரிஞ்சுக்க முடியலை!'

"எனக்குத் தெரியும். அவுங்களை. மாடர்ன் லேடி அவுங்க. பதிலுக்கு என்ன சொல்றாங்க தெரியுமா? நிறைய டூர் போகணும் சுத்தணும். ஒன்றுக்கு இரண்டா ஹனிமூன் போகணும். ஃபாரின் டிரிப் அடிக்கணும். பிள்ளை பெத்துக்கிட்டா இதெல்லாம் முடியாது'ன்னு சொல்வாங்க.

"பிள்ளைங்கிறது உறவைப் பலப்படுத்துற விஷயம்தான். இல்லைங்கலை. ஆனா மானசீகமா கணவனுக்கும், மனைவிக்கும் இடையே இடைவெளி ஏற்படுத்துற சக்திடி அது. ஒருத்தரை ஒருத்தர் புரிஞ்சுக்கிற அன்னியோன்யம் இருக்கே அதுக்கு இணை எதுவுமே இல்லை. புது மனைவியோட கவலையெல்லாம் இப்ப வந்த குழந்தைமேல திரும்பிடுச்சேன்னு ஆம்பிளைங்க ஏங்குவாங்களாம். பெயருக்குத்தான் குழந்தைமேல பாசம் அவனுக்கு. 25-30 வருஷம் பெத்து வளர்த்து ஆளாக்கின பையன் திருமணமான 25-30 நாளில் அடியோட மாறிப்போயிட்டான்கிற வருத்தம் எத்தனை அம்மாக்களுக்கு இருக்கு தெரியுமா?'

லேனா தமிழ்வாணன்