விஜயகாந்த் கைதாகி விடுதலை

**சிவா** · **சிவா** Tue Dec 27, 2011 6:54 pm

முல்லைப் பெரியாறு உள்பட அனைத்து பிரச்சினைகளிலும் மத்திய அரசு தமிழ்நாட்டிற்கு விரோதமாக செயல்படுவதால் சென்னை வந்த பிரதமருக்கு எதிர்ப்பு தெரிவித்து கறுப்பு கொடி ஆர்ப்பாட்டம் நடத்திய தே.மு.தி.க. தலைவர் விஜயகாந்த் மற்றும் 8 எம்.எல்.ஏ.க்கள் உள்பட ஆயிரக்கணக்கானவர்கள் கைது செய்யப்பட்டு பின்னர் விடுவிக்கப்பட்டனர்.

விஜயகாந்த் ஆர்ப்பாட்டம்

முல்லைப் பெரியாறு அணை பிரச்சினை, கூடங்குளம் அணுமின் நிலையம், தமிழக மீனவர்கள் மீதான தாக்குதல், காவிரி பிரச்சினை என அனைத்து பிரச்சினைகளிலும் மத்திய அரசு தமிழக நலனில் மாற்றாந்தாய் போக்கை கடைப்பிடிக்கிறது. இதனை கண்டிக்கும் வகையில் சென்னை வரும் பிரதமருக்கு எதிர்ப்பு தெரிவித்து கறுப்பு கொடி ஆர்ப்பாட்டம் நடத்தப்படும் என்று எதிர்க்கட்சித் தலைவரான தே.மு.தி.க. தலைவர் விஜயகாந்த் அறிவித்திருந்தார்.

சென்னையில் ராஜ்பவனில் தங்கியிருந்த பிரதமர் மன்மோகன் சிங் அங்கிருந்து சென்னை பல்கலைக்கழக வளாகத்தில் நடந்த விழாவுக்கு செல்லும் நேரத்தில் இந்த போராட்டத்தை நடத்த தே.மு.தி.க.வினர் முடிவு செய்தனர். அதன்படி நேற்று காலை 9 மணியளவில் சென்னை சைதாப்பேட்டை பனகல் மாளிகை அருகில் தே.மு.தி.க. ஆர்ப்பாட்டம் நடந்தது. இதில் கலந்து கொண்ட விஜயகாந்த் உள்பட பலரும் கறுப்பு சட்டை அணிந்து வந்தனர். கையில் கறுப்பு கொடியுடன் மத்திய அரசை கண்டித்து கோஷங்களை எழுப்பினார்கள்.

விஜயகாந்த் கைது

பனகல் மாளிகையில் இருந்து அவர்கள் விஜயகாந்த் தலைமையில் ராஜ்பவனை நோக்கி ஊர்வலமாக சென்றனர். சின்னமலை அருகே சென்ற போது போலீசார் அவர்களை தடுத்து கைது செய்தனர். விஜயகாந்தை கைது செய்து பஸ்சில் ஏற்றியதும் அந்த பஸ்சில் ஏறுவதற்கு தே.மு.தி.க. தொண்டர்களும் போட்டிபோட்டு முந்திச் சென்றனர். இதனால் அந்த பகுதியில் தள்ளுமுள்ளு ஏற்பட்டது.

போலீசார் அவர்களை ஒழுங்குபடுத்தினார்கள். இதில் சில தொண்டர்கள் ரோட்டின் நடுவில் அமர்ந்து மறியல் போராட்டத்திலும் ஈடுபட்டனர். பின்னர் ஒவ்வொரு வாகனமாக கொண்டுவந்து அவர்களை கைது செய்து அருகில் இருந்த திருமண மண்டபங்களுக்கு கொண்டு சென்று தங்க வைத்தனர்.

8 எம்.எல்.ஏ.க்களும் கைது

விஜயகாந்துடன், உயர்மட்டக்குழு உறுப்பினர் எல்.கே.சுதீஷ், பொருளாளர் ஆர்.சுந்தர்ராஜன் எம்.எல்.ஏ. மற்றும் எம்.எல்.ஏ.க்கள் மாபா க.பாண்டியராஜன், பார்த்தசாரதி, சந்திரகுமார், சி.எச்.சேகர், அருண் சுப்பிரமணியன், மைக்கேல் ராயப்பன், கு.நல்லதம்பி, துணை பொதுச் செயலாளர்கள் ஆஸ்டின், ஏ.ஆர்.இளங்கோவன், தொழிற்சங்க தலைவர் சவுந்தரபாண்டியன் உள்பட ஆயிரக்கணக்கானவர்கள் கைது செய்யப்பட்டனர். பின்னர் அவர்கள் பிற்பகலில் விடுவிக்கப்பட்டனர்.

போராட்டம் நடந்த இடத்தில் ஏராளமான போலீசார் குவிக்கப்பட்டிருந்தனர். அலுவலகம் செல்லும் நேரத்தில் போராட்டம் நடந்ததாலும், பிரதமர் வருகை காரணமாக கடற்கரை சாலையில் வாகனங்கள் அனுமதிக்கப்படாததாலும் அண்ணா சாலையில் கடுமையான போக்குவரத்து நெரிசல் ஏற்பட்டது.

18 ஆயிரம் பேர்

சென்னையில் விஜயகாந்த் கைது செய்யப்பட்டதை தொடர்ந்து, தமிழ்நாடு முழுவதும் தே.மு.தி.க. கட்சி தொண்டர்கள் மறியலில் ஈடுபட்டனர். மறியலில் ஈடுபட்டவர்களை போலீசார் கைது செய்தனர். பிறகு மாலையில் அனைவரும் விடுவிக்கப்பட்டனர்.

சென்னையில் விஜயகாந்த் உள்பட 700 பேரும், தமிழகம் முழுவதும் 18 ஆயிரம் பேரும் கைதாகி, பின்னர் விடுதலை செய்யப்பட்டதாக போலீஸ் தரப்பில் நேற்று இரவு தெரிவிக்கப்பட்டது.

திருச்சியில் கறுப்புக் கொடி போராட்டம்

இதேபோல பிரதமர் மன்மோகன் சிங் திருச்சி வரும்போது திருச்சி விமான நிலையம் அருகில் 26-ந் தேதி தே.மு.தி.க சார்பில் கறுப்புக் கொடி காட்டும் போராட்டம் நடத்தப்படும் என அறிவிப்பு வெளியிடப்பட்டு இருந்தது. இதையொட்டி திருச்சியில் பலத்த போலீஸ் பாதுகாப்பு ஏறபாடுகள் செய்யப்பட்டு இருந்தது.

இதற்காக தே.மு.தி.க.வினர் மாநகர் மாவட்ட செயலாளர் விஜயராஜன், வடக்கு மாவட்ட செயலாளர் நடராஜன், தெற்கு மாவட்ட செயலாளர் செந்தில்குமார் எம்.எல்.ஏ ஆகியோர் தலைமையில் நேற்று காலை திருச்சி மத்திய பஸ் நிலையம் அருகில் கறுப்பு கொடி மற்றும் தே.மு.தி.க கொடியுடன் திரண்டு நின்றனர். கறுப்பு கொடியுடன் விமான நிலையம் புறப்பட்டு செல்ல தயாரான அவர்களை போலீசார் அங்கிருந்து கலைந்து செல்லும்படி கூறினார்கள். ஆனால் அவர்கள் கலைந்து செல்ல மறுத்து சாலையில் அமர்ந்து மறியல் போராட்டம் நடத்தினார்கள்.

இதைத் தொடர்ந்து போலீசார் அவர்கள் அனைவரையும் கைது செய்து வேனில் ஏற்றி சென்றனர். கைது செய்யப்பட்ட அனைவரும் மாலையில் விடுதலை செய்யப்பட்டனர்.

தினதந்தி