வாழ்க்கை

yarlpavanan · yarlpavanan Tue Dec 27, 2011 6:00 am

வாழ்க்கையின் தொடக்கமும் முடிவும்
நான் அறிந்ததில்லை...
வாழ்க்கையில் பிறப்பும் இறப்பும்
இயற்கையின் நிகழ்ச்சி நிரலென
வழிகாட்டிகள் சொல்கிறார்களே...
ஆனால்
எங்கும் எவரும் வாழ்க்கை பற்றி
சொல்லித் தர முன் வந்ததில்லையே!
அப்பா, அம்மா பெற்றெடுத்த பின்
படிக்கவும் உழைக்கவும் தூண்டினரே...
ஆனால்
நான் பள்ளியில் துள்ளித் திரிந்தேன்
இளம் கன்று பயம் அறியாதென
நல்லது, கெட்டது எல்லாவற்றிலும்
தலையை நீட்டிய போதெல்லாம்
கெட்டதைச் சுட்டி வெட்டி விட்ட
ஆசிரியர்களின், உறவுகளின்
கம்படியும் கண்டிப்பும் தான்
நான்
நல்ல பக்கம் நடைபோட வைத்ததே!
பதினொன்று தொட்டு பத்தொன்பது வரை
ஆண்டவனே வந்து தடுத்தாலும் - அந்த
அகவை(வயது)க் கோளாறு முட்டி மோத
நம்மாளுகளின் தெளிவான முடிவிலேயே
நல்லவராவதும் கெட்டவராவதும்
உறுதிப்படுத்தப்படுவதை உலகம் அறியுமே!
ஆண், பெண் உறவை உணர
காதல் வந்து முட்டிமோதும் வேளை
அண்ணன் பத்து வேண்டினால்
நான் இருபது வேண்டணுமென
ஆண்களில் பலர் ஒதுங்கிப் போக...
கண்ட கழுதைகளையும் நம்பிக் கெட்டு
ஊரொதுக்க முன் தானொதுங்க வேண்டிவருமென
பெண்களில் பலர் ஒதுங்கிப் போக...
எஞ்சியோர் மோதிய காதலின் அறுவடையை
நானறியாவிட்டாலும்
உலகம் சொல்லி எல்லோரும் அறிவோமே!
மணவாழ்க்கை வெறும் போலியென
துறவு வாழ்க்கை நாடியோர் இருக்கையில்
இல்வாழ்வில் இறங்கி வெறுத்து ஒதுங்கிய
ஆணும் பெண்ணும் பிரிந்து இருக்கையில்
துன்பங்களைக் கண்டு துயருறும்
கண்ணீர் வடிக்கும் குடும்பங்களின் முன்னிலையில்
துன்பங்களைத் தூக்கி எறிந்து போட்டு
மகிழ்வோடு வாழ்க்கை நடத்துவோரும் உள்ளனரே!
வாழ்க்கை பற்றிச் சொல்லித் தராவிட்டாலும்
வாழ்கின்றவர்களுக்கு வாழ்ந்தவர்கள் பாடமென்றும்
பெரிதாய் எண்ணியும் சிறிதாய்க் கிடைத்தாலும்
கிடைத்ததை மகிழ்வோடு ஏற்பது நன்றென்றும்
காலவோட்டத்தை எவராலும் நிறுத்த முடியாமையால்
சமகாலம் கரையுமுன் வாழவேணும் என்றால்
காலநேர முகாமையே மகிழ்வைத் தருமென்றும்
ஆளுக்காள் அறிவுரை தருவதில் குறைவில்லையே!
போதாக்குறைக்கு "வாழ்; வாழ விடு" என்று
கோட்பாடு(தத்துவம்) ஒன்றையும் சொல்கிறார்களே...
'வாழ்; மாற்றாருக்கு இடையூறின்றி வாழ்' என்றும்
'வாழ விடு; மாற்றாரையும் மகிழ்வோடு வாழ விடு' என்றும்
கோட்பாடு இதுவென்று விளக்குவதையும் பாருங்களேன்!
வாழ்க்கை என்றால் ஆயிரம் இருக்குமாம்
எனக்குள் எண்ணுகிறேன்
என் வாழ்விலும் - இன்னும்
எத்தனை ஆயிரம் இருக்குமென்று தானே!