7-வது ஆண்டு சுனாமி நினைவு நாள்

**இளமாறன்** · **இளமாறன்** Sun Dec 25, 2011 11:01 pm

ஞாயிற்றுக்கிழமை, 25, டிசம்பர் 2011 (22:8 IST)

7-வது ஆண்டு சுனாமி நினைவு நாள்

நாளை சுனாமி 7-வது ஆண்டு நினைவு நாளை முன்னிட்டு பலியானவர்களுக்கு, நாகை கடலில் மலர் தூவி அஞ்சலி செலுத்தப்படுகிறது.

கடந்த 2004-ம் ஆண்டு டிசம்பர் 26-ந்தேதி நாகை மாவட்ட மக்களின் வாழ்வில் மிகப்பெரிய சோக வடுவை ஏற்படுத்திய நாள்.

இந்தோனேசியாவில் ஏற்பட்ட நில நடுக்கம், தமிழக கடற்கரை மாவட்டங்களில் சுனாமியாக தாக்கியது. சுமார் ஒரு பனைமரம் அளவுக்கு ஆர்ப்பரித்து வந்த கடல் அலைகளால் தமிழகத்தில் பல்லாயிரக்கணக்கான மக்கள் பலியானார்கள்.

குறிப்பாக நாகை மாவட்டத்தில் தான் சுமார் 6,065 பேர் பலியாகி அதிக அளவு உயிர் சேதமும், ரூ.700 கோடிக்கு பொருட்சேதமும் ஏற்பட்டது. நாகை மாவட்ட மக்களின் நெஞ்சத்தை சுனாமி கோர தாண்டவம் உலுக்கிவிட்டது.

நாகை மாவட்டத்தில் நாகை, நாகூர், வேளாங்கண்ணி, பூம்புகார், வானகிரி, தரங்கம்பாடி, நாகை, அக்கரைப்பேட்டை, கீச்சாங்குப்பம், புதுபட்டினம், திருமுல்லைவாசல் ஆகிய பகுதிகளில் சுனாமியின் அலையால் ஆயிரக்கணக்கான பெண்கள், குழந்தைகள் பலியானார்கள். தெருவெங்கும் ஏராளமான சடலங்கள் கண்டு எடுக்கப்பட்டன. எங்கும் மரண ஒலமே எதிரொலித்தது.

பல்லாயிரக்கணக்கான மக்களை ஒரே நேரத்தில் காவு வாங்கிய சுனாமி எனும் பேரலையை நாகை மாவட்ட மக்களால் தற்போதுவரை மறக்க முடியவில்லை. இன்றுவரை சுனாமியால் பலியான தங்களது குடும்பத்தினர் மற்றும் உறவினர்களை நினைத்து வேதனையுடன் கண்ணீர் விட்டு வருகின்றனர்.

நாளை (26-ந்தேதி) சுனாமி பேரலையின் 7-வது ஆண்டு நினைவு நாள் ஆகும். இதனால் நாளை காலையில், சுனாமியால் உயிரிழந்த தங்களது குடும்பத்தினர் மற்றும் உறவினர்களுக்கு நாகை மாவட்ட மக்கள் கடலில் மலர்தூவி அஞ்சலி செலுத்துகின்றனர்.

உறவினர்கள் மட்டுமின்றி, ஏராளமான பொதுமக்களும் சுனாமியால் பலியானவர்களுக்கு மலர் தூவி கண்ணீர் அஞ்சலி செலுத்துவார்கள். இதில் அரசியல் கட்சியினர் மற்றும் பலர் கலந்து கொள்கிறார்கள்.