ஆடம்பரமில்லா வாழ்க்கையே இறை வாழ்க்கையாகும்.

இன்று உலகெங்குமுள்ள கிறிஸ்தவர்களால் நத்தார் தினம் வெகு விமரிசையாகக் கொண்டாடப்படுகின்றது. பாவ வாழ்விலிருந்து மனிதனை மீட்கவே இறை மகன் 2000 ஆண்டுகளுக்கு முன்னே மனித உருவெடுத்தார்.

அன்புக்கு இருக்கும் மகத்தான சக்தியை உணர்த்தவே இவ்வுலகில் இயேசுபிரான் அவதரித்தார். மனித குலத்துக்குச் செய்யும் சேவை தெய்வத்துக்குச் செய்யும் சேவை என்பதை அவரது போதனைகள் நமக்கு உணர்த்துகின்றன. "உங்கள் பகைவரை அன்பு செய்யுங்கள். உங்களைச் சபிப்பவர்களுக்கு ஆசி கூறுங்கள். உங்களைத் தூற்றுவோருக்காகச் செபியுங்கள். மன்னியுங்கள் மன்னிக்கப்படுவீர்கள். கொடுங்கள் உங்களுக்குக் கொடுக்கப்படும். உன்னைப் போல் உன் அயலானையும் நேசி". இவையெல்லாம் இயேசு பிரான் மனித குலத்துக்களித்த நற்போதனைகள். இப்போதனைகளைக் கைக்கொண்டால் வாழ்வில் முழு மனிதனாக நாம் மாறலாம்.

கிறிஸ்தவர்களாகிய நாம், புத்தாடை அணிவதும் வெடி கொளுத்துவதும் நத்தார் மரம் அலங்கரிப்பதும் சிற்றுண்டிகளை உண்டு மகிழ்வதும் திருப்பலிப் பூஜைகளில் கலந்துகொள்வதுமாக பெரு விழாவாக மகிழ்ச்சிகரமான இப்பண்டிகையைக் கொண்டாடுகிறோம். இவ்வாறு செய்வதால் கிறிஸ்தவர்களாகி விட முடியாது. இயேசுவின் போதனைகளின் படி வாழவும் வேண்டும்.

உலக மக்கள் அனைவரையும் நாம் நமது சகோதரர்களாக மதிப்பதன் மூலமே உலகில் அமைதியை ஏற்படுத்த முடியும். பகைவனையும் அன்பினாலேயே திருத்த முடியும். தீமையைத் தீமையால் வெல்ல முடியாது. தீமையை நன்மையால் தான் வெல்ல முடியும் என்பதை இயேசுவின் போதனைகள் வழியாக நாம் அறிகின்றோம்.

பாவம் பெருகி உலகம் அழிவுப் பாதையில் சென்று கொண்டிருப்பதைப் பார்த்த தேவன் மனிதர்களின் பாவத்தை தன் புனித இரத்தத்தால் கழுவி இரட்சிக்கும் இயேசு பாலகனாக வந்துதித்தார். அவர் இவ்வுலகில் உதித்தது ஓர் அரச குடும்பத்திலோ அன்றி பணக்கார வம்சத்திலோ அல்ல. ஒரு சாதாரண ஏழைக் குடும்பத்தைச் சேர்ந்த கன்னித் தாய் மரியாளுக்கும் யோசேப்பு(சூசை)க்கும் மகனாகப் பிறந்தார். அன்று மாட்டுத் தொழுவத்தில் அவதரித்த இயேசு கிறிஸ்து இன்று ஒவ்வொரு மானிடரின் இதயத்திலும் அவதரிக்க விரும்புகிறார். அதற்கு ஒவ்வொருவரின் மனமும் தூய்மையாய் இருக்க வேண்டியது முக்கியம்.

ஆடம்பரமில்லாத வாழ்க்கையே இறை வாழ்க்கையாகும். அதனை உணர்த்தவே தேவ மைந்தன் மாட்டுத் தொழுவத்தில் நடுங்கும் குளிரில் பிறப்பெடுத்தார்.

நத்தார் தினம் என்பது வெறும் களியாட்டமல்ல. எங்களுக்காக எங்கள் மீது வைத்த உண்மை அன்புக்காக எம்மைப் பாவத்திலிருந்து இரட்சிப்பதற்கென இப்பூவுலகில் இயேசுபிரான் பிறப்பெடுத்த உன்னத நாளான இத்தினத்தை மிகவும் பக்தி சிரத்தையுடன் கொண்டாடுவதன் மூலமே நத்தார் தினத்தின் உள்ளார்ந்த அர்த்தத்தை மகிமைப்படுத்த முடியும்.

இயேசு நாதர் அவதரித்த புனித தினமாகிய நத்தார் தினம் எமது உள்ளத்தில் அன்பை மலர்விக்கவும் தெய்வ நினைவுகளால் உள்ளத்தைத் தூய்மை செய்யவும் உகந்த தினமாகும். பிரார்த்தனையின் மூலமும் தூய அன்பின் மூலமும் கிறிஸ்துவின் போதனைகளின் படியும் நாம் வாழ்வோம். தேவகுமாரன் பிறந்த இன்றைய தினத்தை மிகுந்த பயனுள்ள நாளாக்கி மகிழ்வோம்