தாயின் இதயத்துக்கு ஸ்டெம் செல்களை தானம் செய்யும் சிசுக்கள்!

ஒவ்வொரு தாயும் தன் ரத்தத்தின் ஒரு பகுதியை பாலாக பிரித்து தங்கள் குழந்தைகளுக்கு கொடுத்து வளர்க்கிறார்கள். இதுவே அவர்களின் ஒப்பற்ற தியாகங்களுக்கு `ஒரு சோறு பதம்' எனலாம். அத்தகைய தாய்க்கு ஒரு பிள்ளை செய்யக்கூடிய நன்றிக்கடன், அவர்களின் தள்ளாத வயதில் அவர்களை ஒரு குழந்தையாக பாவித்து அன்புடனும், ஆதரவுடனும் பேணி பாதுகாப்பது. இது உங்களுக்கு எல்லாம் தெரிந்த செய்தி!

`ஆனால், ஒரு குழந்தைதான் சிசுவாக இருக்கும்போதே தன் தாய்க்கு நன்றிக்கடன் செய்ய முடியும்' என்று அடித்துச் சொல்கிறார் அமெரிக்காவின், நிïயார்க் நகரிலுள்ள மவுண்ட் சினாய் மருத்துவப் பள்ளியின் ஆய்வாளர் ஹினா சவுத்ரி.

இதுதொடர்பாக அவர் எலிகளின் மீது ஆய்வு நடத்தி இருக்கிறார். தொடக்கநிலை ஆய்வில், மாரடைப்பால் சேதம் அடைந்த தாய் எலியின் இதயத்தை குணப்படுத்த தங்களின் ஸ்டெம் செல்களை தானம் செய்கின்றன எலியின் சிசுக்கள் என்பது கண்டறியப்பட்டுள்ளது. இதன் மூலம், கர்ப்பம் தரித்திருக்கும்போது அல்லது கர்ப்பகாலம் முடிந்து தாய்மை அடைந்த உடனே இதய நோயால் பாதிப்படையும் தாய்மார்களில் பாதிப்பேர் தானாகவே குணமடைவதற்கான காரணம் விளங்குகிறது என்கிறார் ஹினா சவுத்ரி.

இந்த ஆய்வுக்காக, சாதாரண பெண் எலிகளை உடலில் உள்ள உயிரணுக்களில் எல்லாம் பச்சை நிற ஒளிரும் புரதமொன்றை உற்பத்தி செய்யும் வண்ணம் மரபணு மாற்றம் செய்யப்பட்ட ஆண் எலிகளுடன் உறவுகொள்ளச் செய்தார் ஹினா. அந்த பெண் எலியின் கர்ப்பத்தில் உருவான சிசுக்களில் பாதி பச்சை நிற ஒளிரும் புரதத்தை உற்பத்தி செய்தன. இதன்மூலம் தாய் எலியின் உடலில் உள்ள சிசுவின் திசுக்களை சுலபமாக அடையாளம் காண முடியும் என்பது குறிப்பிடத்தக்கது.

மாரடைப்பால் சேதமடைந்த கர்ப்பமான தாய் எலியின் இதய தசைகள் குணமடைவதற்கு அவற்றின் சிசுக்கள் எந்த வகையில் பங்களிக்கின்றன என்பதை கண்டறிய, எலிகளுக்கு முதலில் மாரடைப்பு ஏற்படுத்தப்பட்டது. அதன்பிறகு இரண்டு வாரங் களுக்கு பின் கர்ப்பிணி எலிகளின் இதய தசைகள் பரிசோதிக்கப்பட்டன. அப்போது, சிசுக்களின் உடலிலிருந்த பச்சை நிறத்தில் ஒளிரும் உயிரணுக்கள், சேதமடைந்த இதய தசைகள் குணமடைவதைக் காட்டும் இதய துடிப்புக்கு காரணமான கார்டியோமயோசைட்கள், ரத்த நாள உயிரணுக்கள் உள்ளிட்ட புதிய இதய உயிரணுக்கள் என பல உயிரணுக்கள் காணப்பட்டது குறிப்பிடத்தக்கது.

இத்தகைய உடலியல் மாற்றங்களுக்கு ஒரு பரிணாம வளர்ச்சிமுறைதான் காரணம் என்கிறார் ஆய்வாளர் ஹினா சவுத்ரி. அதாவது, ஒரு சிசுவானது தன் வளர்ச்சியை பாதுகாத்துக் கொள்வதற்காகவே தன் தாயின் இதயத்தை மாரடைப்பின் பாதிப்பிலிருந்து பாதுகாக்கிறது. மேலும், சிசுவின் உடலுக்கும் தாயின் உடலுக்கும் இடையிலான தொடர்பினை ஏற்படுத்தும் குழாய் வழியாக சிசுவின் ஸ்டெம் செல்கள் எந்தவித நோய் எதிர்ப்பு எதிர்வினையுமின்றி தாயின் உடலுக்குள் செல்ல முடியும் என்பதால், மாரடைப்பால் சேதமடைந்த தாயின் இதய தசைகளை குணப்படுத்த தேவையான ஸ்டெம் செல்களை தங்குதடையின்றி கொடுக்க சிசுக்களே சிறந்தவை என்கிறார் ஹினா சவுத்ரி.

மேலும், முந்தைய ஆய்வுகளில் கர்ப்பிணி உடலிலுள்ள சேதமடைந்த மூளை, கல்லீரல், சிறுநீரகம் மற்றும் நுரையீரல் ஆகிய பாகங்களிலும் சிசுவின் ஸ்டெம் செல்கள் கண்டறியப்பட்டிருக்கிறது என்பது குறிப்பிடத்தக்கது. இது தவிர, தாயை மார்பக புற்றுநோயிலிருந்து காக்கும் உயிரணுக்களையும் சிசுக்கள் உற்பத்தி செய்கின்றன என்கிறது மற்றொரு ஆய்வு.

ஆக, குழந்தைப்பருவம் முதல் இரவு பகலாக கண் விழித்து, நம்மை பாதுகாக்கும் நம் தாய்க்கு கர்ப்பகாலத்தின் போதோ அல்லது அதற்கு பின்னரோ மாரடைப்பு ஏற்பட்டால், நாம் சிசுவாக இருக்கும்போதே நம் ஸ்டெம் செல்களை கொடுத்து உதவுகிறோம் என்பதை ஆதாரங்களுடன் நிரூபிக்கிறது இந்த ஆய்வு.

தினதந்தி