பகவத் கீதை தடை குறித்த சர்ச்சைக்கு ரஷியா வருத்தம்

**சிவா** · **சிவா** Wed Dec 21, 2011 4:47 pm

பகவத் கீதைக்கு தடை விதிப்பது தொடர்பாக எழுந்துள்ள சர்ச்சைக்கு ரஷியா வருத்தம் தெரிவித்துள்ளது.

கோர்ட்டில் வழக்கு

இந்துக்களின் புனித நூலான பகவத் கீதைக்கு தடை விதிக்க கோரி ரஷியாவில் உள்ள டோம்ஸ்க் நகர கோர்ட்டில் வழக்கு தொடரப்பட்டுள்ளது. `கிறிஸ்டியன் ஆர்தோடக்ஸ் சர்ச்' சார்பாக தொடரப்பட்ட இந்த வழக்கின் தீர்ப்பை 28-ந் தேதிக்கு கோர்ட்டு ஒத்திவைத்தது.

ரஷியாவின் இந்த செயலுக்கு `இஸ்கான்' உள்ளிட்ட இந்து அமைப்புகள் கடும் கண்டனம் தெரிவித்துள்ளன. மேலும், இந்திய பாராளுமன்றத்திலும் எதிர்க்கட்சி எம்.பி.க்கள் நேற்று முன்தினம் கடும் அமளியில் ஈடுபட்டனர். இதனால், பாராளுமன்றம் ஒத்திவைக்கப்பட்டது.

இந்த நிலையில், பகவத் கீதை விவகாரத்தை கோர்ட்டுக்கு கொண்டு சென்றதற்காக ரஷ்யா வருத்தம் தெரிவித்துள்ளது. இது தொடர்பாக ரஷிய தூதர் அலெக்சாண்டர் எம் கடக்கின் வெளியிட்ட அறிக்கையில் கூறியுள்ளதாவது:-

அனுமதிக்க முடியாது

அழகான பல்கலைக்கழகங்களின் நகரான சைபீரியாவில் இத்தகைய சம்பவங்கள் நிகழ்ந்திருப்பது வித்தியாசமானது. மத சார்பின்மைக்கும் மத சகிப்புதன்மைக்கும் பெயர் பெற்ற டோம்ஸ்க் நகரில் இந்த சம்பவங்கள் நிகழ்ந்துள்ளன. இது மிகவும் வருத்தம் அளிக்கிறது. எந்தவொரு புனித நூலையும் கோர்ட்டுகளுக்கு கொண்டு செல்வதை அனுமதிக்க முடியாது. இத்தகைய நூல்களை மிகவும் புனிதமானதாக கோடிக்கணக்கானோர் நம்புகின்றனர்.

மத புத்தகங்களை ஆய்வுக்காக இதுபோன்று நீதிபதிகளிடம் அனுப்புவது வழக்கம் அல்ல. அறிவியாளர்கள், கருத்தரங்கங்கள் போன்றவற்றில் தான் அறிவுப்பூர்வமான ஆய்வுகள் நடத்த வேண்டும். கோர்ட்டுகளில் அல்ல.

ரஷியா மதசார்பற்ற ஜனநாயக நாடு என்பதை அனைவரும் அறிவார்கள். அனைத்து மதத்தினரும் சம உரிமை பெற்று வாழ்கின்றனர். பைபிள், குரான், டோரா, அவெஸ்தா, பகவத் கீதை போன்ற பல்வேறு மத புனித நூல்களுக்கும் இது பொருந்தும்.

இவ்வாறு அலெக்சாண்டர் தெரிவித்தார்.

இந்திய தூதர் தகவல்

இதற்கிடையே, இந்த விவகாரத்தை ரஷிய அரசு உயர் அதிகாரிகள் கவனத்துக்கு கொண்டு செல்ல இந்தியா முடிவு செய்துள்ளது. இந்த தகவலை ரஷியாவில் உள்ள இந்திய தூதர் மல்கோத்ரா தெரிவித்தார்.

அவர் கூறுகையில், "ரஷிய அரசின் உயர்மட்ட அதிகாரிகள் அளவில் இந்த விவகாரத்தை இந்திய தூதரகம் எடுத்துச் செல்லும். இந்த பிரச்சினையில் சாதகமான அளவில் தலையிடுமாறு கோரிக்கை விடுக்கப்படும். தனிப்பட்ட முறையில், `இஸ்கான்' வெளியிட்ட பகவத் கீதை புத்தகத்துக்கு ஆதரவு அளிக்கிறோம்'' என்றார்.

தினதந்தி