மதுரையில் பயங்கரம். பெட்ரோல் ஊற்றி தங்கை எரித்துக்கொலை, அண்ணன் தீக்குளித்து தற்கொலை

First topic message reminder :

மதுரை, டிச.21- தனியார் ஆஸ்பத்திரிக்கு சிகிச்சைக்கு வந்த தங்கையை பெட்ரோல் ஊற்றி எரித்துக் கொன்ற அண்ணன், தானும் தீக்குளித்து தற்கொலை செய்து கொண்டார்.

சிகிச்சை

சிவகங்கை மாவட்டம் காரைக்குடி அருகே உள்ள மேலவூரணி வக்கீல் தெருவைச் சேர்ந்தவர், கணேசன். இவர் தங்க நகை செய்யும் வேலை செய்து வருகிறார். இவருக்கும், அதே பகுதியை சேர்ந்த நடராஜனின் மகள் தனலட்சுமிக்கும் (30) 7 ஆண்டுகளுக்கு முன்பு திருமணம் ஆனது. இவர்களுக்கு 6 வயதில் ஒரு மகள் உள்ளார். இந்த நிலையில் திடீரென்று தனலட்சுமிக்கு மன நிலை பாதிக்கப்பட்டது. இதற்காக அவர் மதுரை அண்ணா பஸ்நிலையம் பின்புறம் உள்ள தனியார் ஆஸ்பத்திரியில் தங்கி சிகிச்சை பெற்று வருகிறார்.

அவருக்கு உதவியாக தனலட்சுமியின் அண்ணன் ராஜ்குமார்(32) உடனிருந்து கவனித்து வந்தார். எவ்வளவு தான் சிகிச்சை அளித்தாலும் தனிலட்சுமிக்கு மனநிலை பாதிப்பு கூடிக்கொண்டே இருந்தது. இதனால் தங்கை படும் வேதனையை கண்டு அண்ணன் ராஜ்குமார் பெரிதும் வருத்தம் அடைந்தார்.

பெட்ரோல் ஊற்றி தீ வைப்பு

இந்த நிலையில் ராஜ்குமார் நேற்று முன்தினம் இரவு ஒரு பாட்டிலில் பெட்ரோல் வாங்கிக் கொண்டு ஆஸ்பத்திரிக்கு வந்தார். இரவு எல்லோரும் தூங்கி விட்ட பிறகு நேற்று அதிகாலை 3 மணிக்கு எழுந்த ராஜ்குமார் தனது தங்கையின் உடல் மீது பெட்ரோலை ஊற்றி தீயை வைத்தார்.

பிறகு தனது உடலிலும் பெட்ரோல் ஊற்றி தீவைத்துக் கொண்டார். அவர்கள் அலறல் சத்தம் கேட்டு வெளியே வந்த நோயாளிகள் மற்றும் உறவினர்கள் தீயில் அண்ணன், தங்கை எரிந்து கொண்டு இருப்பதை கண்டு அதிர்ச்சி அடைந்தனர். உடனே அவர்களை காப்பாற்ற பல்வேறு முயற்சிகளை மேற்கொண்டனர்.

அண்ணன், தங்கை பலி

ஆனால் இதில் உடல் வெந்து அதே இடத்தில் தனலட்சுமி பரிதாபமாக இறந்து போனார். ஆனால் ராஜ்குமார் காப்பாற்றப்பட்டு சிகிச்சைக்காக மதுரை பெரிய ஆஸ்பத்திரிக்கு கொண்டு செல்லப்பட்டார். ஆனால் அங்கு சிகிச்சை பலன் அளிக்காமல் நேற்று காலை 8.50 மணிக்கு ராஜ்குமார் இறந்தார்.

இந்த சம்பவம் குறித்து போலீசார் வழக்கு பதிவு செய்து விசாரணை நடத்தினர்.

விசாரணையில் ராஜ்குமாரின் அம்மா மனநிலை பாதிக்கப்பட்டு கடந்த சில ஆண்டுகளுக்கு முன்பு இறந்து போனார். அம்மா போன்று தங்கையும் மனநிலை பாதிக்கப்பட்டதால் ராஜ்குமார் வேதனை அடைந்தார். இதற்கிடையில் ராஜ்குமார் திருமணத்திற்கு பெண் பார்க்க பல இடங்களுக்கு சென்றார். அங்கு ராஜ்குமாரின் குடும்பநிலை அறிந்து யாரும் பெண் கொடுக்க முன்வரவில்லை. இதனால் மனவருத்தம் அடைந்த அவர் தனது தங்கையை கொன்று விட்டு, தானும் தற்கொலை செய்து கொண்டார் என்று தெரியவந்துள்ளது.

தினதந்தி

இப்படியெல்லாம் கொடுமைகள் நடக்கின்றவே, மிக கவலையாக இருக்கிறது.