புதுச்சேரி அரசு நிர்வாகத்தில் உள்ள 567 காலி பணியிடங்களை நிரப்ப அறிவிக்கை வெளியீடு

புதுச்சேரி அரசு நிர்வாகத்தில் உள்ள 567 காலி பணியிடங்களை நிரப்ப அறிவிக்கை வெளியீடு

First Published : 18 Dec 2011 04:23:39 PM IST


புதுச்சேரி: புதுச்சேரி அரசு நிர்வாகத்தில் உள்ள 567 காலி பணியிடங்களை நிரப்ப அறிவிக்கை வெளியிடப்பட்டுள்ளது.

புதுச்சேரி அரசின் பணியாளர் மற்றும் நிர்வாகச் சீர்திருத்தத்துறையின் கீழ் 400 இளநிலை எழுத்தர்கள் பணியில் அமர்த்தப்பட உள்ளனர்.

புதுச்சேரி அரசின் கணக்குகள் மற்றும் கருவூலத்துறையின் கீழ் 115 பண்டகக் காப்பாளர்கள் - கிரேடு 3 நிலையில் பணியில் அமர்த்தப்பட உள்ளனர்.நீதித்துறையில் இளநிலை எழுத்தர் 28 பணியிடங்களும், 24 தட்டச்சர் பணியிடங்களும் நிரப்பட உள்ளன. இந்தப் பணியிடங்கள் அனைத்தும் பொது போட்டி எழுத்துத் தேர்வு மூலம் நிரப்பப்பட உள்ளன.

விண்ணப்பிப்பது எப்படி: விண்ணப்பதாரர்கள் 14.12.2011 முதல் 13.1.2012-க்குள் ஆன்-லைன் மூலம் விண்ணப்பிக்க வேண்டும். அதற்கான இணையதள முகவரி www.pon.nic.in, http://dpar.puducherry.gov.in, https://recruitment.puducherry.gov.in மேலும் ஆன்-லைனில் இருந்து விண்ணப்பத்தை எடுத்து பூர்த்தி செய்து 23.1.2012-க்குள் அனுப்ப வேண்டும். ஒன்றுக்கும் மேற்பட்ட பணிக்கு விண்ணப்பிப்போர் ஆன்-லைன் விண்ணப்பத்தில் எந்தப் பணிக்கு முக்கியத்துவம் கொடுக்கப்போகிறார் என்று வரிசைப்படுத்தி பூர்த்தி செய்ய வேண்டும்.

அரசு துறைகள் மற்றும் அலுவலகங்களில் பணியாற்றுவோர் தங்கள் துறையின் தலைவர் மூலம் 23.1.2012-க்குள் விண்ணப்பங்களை அனுப்ப வேண்டும்.

இந்தப் பணியிடங்களுக்கான போட்டித் தேர்வு புதுச்சேரி, காரைக்கால், மாஹே, யேனம் ஆகிய 4 பிராந்தியங்களிலும் நடைபெறும். அதற்கான தேதி, தேர்வு மையம் போன்றவை பின்னர் அறிவிக்கப்படும்.

உதவிக்கு: இது தொடர்பாக எதாவது சந்தேகங்கள் இருந்தால் எல்லா வேலை நாள்களிலும் காலை 9.30 முதல் 5 மணி வரை தொடர்பு கொள்ள வேண்டிய தொலைபேசி எண் 0413- 2233215.

தினமணி