இபூலீஷு பேசுகிறான்

இபுலீசு பேசுகிறான் !
பீ. எம். கமால், கடையநல்லூர்)

தோழனே ! வா !
உன்
தோல்விகள்தானே
என்
வெற்றிப் படிக்கட்டுக்கள் ?
கல்லெறிந்து என்னைக்
கழற்றி விட்டதாய்க்
கனவு காண்பவனே !
உன்
உள்ளத்தின் மூலையில்
உட்கார்ந்து உன்மீது
கல்லெறிந்து
உன்செயலைக்
காயப்படுத்துபவன்
நான்தானே !

நீ
எந்தக் கல்லெறிந்து
என்னை விரட்டுவாய் ?
விரட்டப்பட்ட ஷைத்தான் என்று
வீராப்புப் பேசுபவனே !
பொய் பொறாமை
புறம்கூறும் புத்தி
வட்டி விபச்சாரம்
வாரி வழங்காத
கருமித் தனமென்று
கல்லெறிந்து உன்னைக்
காயப் படுத்தினாலும்
பூவென்றுதானே நீ
புளகாங்கிதப் படுகின்றாய் ?
வீரமாய்க் கல்லெறிந்து
விரட்டுபவனா நீ ?
சகோதர மாமிசம்
சாப்பிடும் நீ என்
சகோதரன் அல்லவா ?
நான் இருட்டுத்
தெரு விளக்கை உன்
இருகையில் திணித்து விட்டு
ஒளியான இருவிளக்கை
உன்னிடமிருந்து
பிடுங்கிக் கொண்டேன் !
அதனால்தான்
நீ
மாற்றான் தோட்டத்தில்
மல்லிகையாய் ஆகாமல்
உன் தோட்டத்திலேயே
அழகிழந்த அரளிப்பூவாய்
ஆகிப் போனாய் !
கள்ளிப்பூ மணக்கு மென்று
கதை பேச வைத்துன்னை
புள்ளிக்கும் உதவாத
புள்ளியாய் ஆக்கி விட்டேன் !

நானிலம் போற்றுகின்ற
நபிகளை அவர்தம்
நிழலைப் பின்பற்றி
நீடு புகழ் பெற்றவரை
நீ
இழித்துப் பேசுவது
என் வழி அல்லவா ?
எப்படியப்பா அது
நபிவழியாகும் ?

உன்
கடிவாளம் என்கையில்
இருக்கின்ற காரணத்தால்
பிடிவாதமாக உன்னைப்
பேசவைத்து நரகத்து
விறகாக்கி நான்
விலா நோகச்
சிரிக்கின்றேன் !

என் வழி நடக்கின்ற
இனிய என் தோழனே !
உன்னைப் போராளியாகப்
புறப்பட்டு வரச் செய்து
தீவிர வாதியாகத்
தெருவில் நிற்க வைத்தேன் !
நீயா என்னைக்
கல்லெறிந்து விரட்டுகிறாய் ?

உன்
தொப்பியைக் கழற்றித்
தூர எறிந்தவன்
நான்தான் !
உன்
ஒழுங்கற்ற தாடியில்
உட்கார்ந்திருப்பதும்
நான் தான் !

என் வழியைப் பின்பற்றி
எல்லாம் செய்துவிட்டு
நபிவழி என்றுநீ
நாப்பறை சாற்றுகின்றாய் !
மெத்த மகிழ்ச்சி !
நான் சொல்லிக் கொடுப்பதனை
அட்சர சுத்தமாய்
அப்படியே செய்கின்றாய் !
நீதான் எனது
கொள்கை பரப்பு
குலக் கொழுந்து !

உன்பெயரை எல்லோரும்
உச்சரிக்க வேண்டுமென்று
தனி தனியாய்க் கொடிகளை
தலைக்குமேல் பிடிக்கின்றாய் !
ஒற்றுமையின் கயிற்றை
உதறித் தள்ளிவிட்டு
வேற்றுமை யோடுதானே
வெளியில் வருகின்றாய் !

முஸ்லிம் பெயர்களால்
முக்காடு போட்டுக் கொண்டு
இஸ்லாத்தை ஒழிக்க
என்வழியில் நடக்கின்றாய் !
என்
உபதேச வார்த்தைகளில்
உளம் மகிழும் சோதரனே !
என் வாய் மொழிகள்
நரகத்தில் வேர்விட்டு
உங்கள்
நாவுகளில் கிளை பரப்பும் !
பரமனுக்கு உங்களை
பரம எதிரிகளாய்
ஆக்குகின்றவரை
அடியேன் ஓயமாட்டேன் !

நண்பனே !
நரக நெருப்புக்கு
விறகு கொடுக்கின்ற
வியாபாரி நான்தான் !
உன்னைக்
கொள்முதல் செய்யக்
கும்பிட்டு வருகின்றேன் !
நண்பனே ! நீ இருக்க
எனக்கென்ன நஷ்டமா
வந்து விடும் ?

இறைவனுக்கு உருவம்
இருக்குதென்று நான்கூட
எப்போதும் சொன்னதில்லை !
உருவத்தைத் தொழுகின்ற
ஒருவரும் சொன்னதில்லை !
நீயோ
என்னையே விஞ்சிவிட்டாய் !
என்
பல்கலைக் கழகத்தில்
உனக்குத்தான்
தலைமைப் பொறுப்பைத்
தரப்போ கின்றேன் !
ஞானிகளும் சூபிகளும்
ஒளியாய்க் கண்ட
ஒப்பற்ற இறைவனை
உருவத்தால் காண
உபதேசிக் கின்றவனே!
உன் பேச்சை
உண்மையென்று
ஒப்புக் கொள்ளுகின்ற
துப்பற்ற கூட்டத்தை
என்னோடு இணைக்க
இலவச சேவை செய்கின்றாய் !
உனக்கு என்
ஒருகோடி நன்றிகள் !
உனக்கு
இபுலீஷு விருது
எப்படியும் கிடைத்துவிடும் !
வா ! வா !
என் இரத்தத்தின் இரத்தமான
என் உடன் பிறப்பே!
நரகத்து வாசலில்
நானுக்காய்க் காத்திருப்பேன் !

கவிதைகளை பதிவு செய்யும் முன்னர் கவிதைகளின் பகுதியில் புதுக்கவிதையா மரபு கவிதையா இல்லை சொந்த கவிதையா அல்லது ரசித்த கவிதையா என்று பகுதி பார்த்து பதிவிடுங்கள் நண்பரே