காதலரின் பிறந்த நாள் பரிசை, அப்படியே விழுங்கிய காதலி!

ரேவதி · ரேவதி Mon 12 Dec 2011 - 12:32

சீனாவின் ஷாங்டாங் மாகாணத்தை சேர்ந்த, ஷாயோ லி என்ற இளைஞர், வாங் ஷி என்ற பெண்ணை காதலித்தார். காதலியின் பிறந்த நாளுக்கு, வித்தியாசமான, விலை உயர்ந்த பொருளை பரிசாக கொடுக்க வேண்டும் என்றும், அது மிகவும் சஸ்பென்சாக இருக்க வேண்டும் என்றும் விரும்பினார், ஷாயோ. பிறந்த நாளுக்கு முந்தைய நாள், நகைக் கடைக்கு சென்று, 40 ஆயிரம் ரூபாய் மதிப்புள்ள சிறிய தங்க நெக்லஸ் ஒன்றை வாங்கினார்.
அந்த நெக்லசை அப்படியே கொடுக்காமல், புதுமையாக ஏதாவது செய்ய வேண்டும் என நினைத்தார். சாக்லேட், கேக் ஆகியவற்றின் கலவையை தயார் செய்து, நெக்லஸ் வைக்கப்பட்டிருந்த சிறிய உறை மீது நன்றாக பூசினார்.
நன்றாக காய்ந்தவுடன், அது, ஏதோ விஷேசமாக தயாரிக்கப்பட்ட சிறிய கேக் போல் தோற்றமளித்தது. அதற்குள் நெக்லஸ் இருப்பது கொஞ்சம் கூட வெளியில் தெரியவில்லை. அடுத்த நாள், தன் காதலியிடம் சென்று, பிறந்த நாள் வாழ்த்து தெரிவித்து, தான் கையோடு கொண்டு வந்திருந்த அன்பு பரிசை வழங்கினார்.
அந்த பெண்ணும், ஆசை, ஆசையாய், அதை வாங்கி, ஒரு வார்த்தை கூட பேசாமல், அதை, ஏதோ விலை உயர்ந்த கேக் என நினைத்து, மாத்திரை விழுங்குவதைப் போல் விழுங்கி விட்டார். அந்த கேக்கிற்குள் நெக்லஸ் உள்ளது என, ஷாயோ கூறுவதற்குள், எல்லாம் நடந்து முடிந்து விட்டது. மருத்துவ மனையில், எக்ஸ்ரே எடுத்துப் பார்த்ததில், வாங் ஷியின் வயிற்றுக்குள், நெக்லஸ் இருப்பது தெரிய வந்தது. என்டோஸ்கோபி சர்ஜரி மூலம், நெக்லஸ் வெளியில் எடுக்கப்பட்டது. இப்போதெல்லாம், நெக்லஸ் என்ற வார்த்தையை யாராவது பேசினாலே, வாங் ஷிக்கு, பீதியில் காய்ச்சலே வந்து விடுகிறது.

தினமலர்