அன்னிய முதலீடு முடிவை வாபஸ் பெற்றது மத்திய அரசு: பார்லிமென்டில் அமைதி :)

சம்பந்தப்பட்ட அனைத்து தரப்பினருடனும், பேச்சு வார்த்தை நடத்தி ஒருமித்த கருத்து ஏற்படும் வரை, சில்லரை வர்த்தகத்தில் அன்னிய முதலீடு முடிவை ஒத்தி வைப்பதாக மத்திய அரசு அறிவித்தது. இதையடுத்து பார்லிமென்ட் நேற்று ”முகமாக நடந்தது.

சில்லரை வர்த்தகத்தில் அன்னிய முதலீடு முடிவை அரசு அறிவித்தது முதல், எதிர்க்கட்சிகள் அனைத்தும் ஓரணியாகத் திரண்டு எதிர்த்து வந்தன. பார்லிமென்ட் குளிர்கால கூட்டத்தொடர் கடந்த மாதம் 22ம் தேதியன்று துவங்கியது. அன்று முதல் இந்தப் பிரச்னையை கையில் எடுத்து, எம்.பி.,க்கள் ரகளையில் இறங்கியதால், சபை நடவடிக்கைகள் முடங்கின.

இந்நிலையில், நான்கு நாள் விடுமுறைக்கு பின் நேற்று மீண்டும் பார்லிமென்ட் கூடியது. முன்னதாக காலை 10 மணிக்கு, நிதியமைச்சர் பிரணாப் முகர்ஜி தலைமையில், அனைத்துக் கட்சிக் கூட்டம் நடைபெற்றது. இந்தக் கூட்டத்தில், எதிர்க்கட்சிகளின் கோரிக்கையை ஏற்று சில்லரை வர்த்தகத்தில் அன்னிய முதலீட்டை கொண்டு வரும் முடிவை, தற்காலிகமாக நிறுத்தி வைப்பது என்றும், இது தொடர்பாக சபையில் அறிக்கை தாக்கல் செய்வது என்றும் முடிவெடுக்கப்பட்டது.

லோக்சபா காலையில் கூடியதும், அமைச்சர் பிரணாப் முகர்ஜியை அறிக்கை தாக்கல் செய்யும்படி, சபாநாயகர் மீரா குமார் அழைத்தார். அப்போது பேசிய பிரணாப் முகர்ஜி, "சில்லரை வர்த்தகத்தில் அன்னிய முதலீட்டை கொண்டு வரும் முடிவை நிறுத்தி வைப்பதாக உறுதியளிக்கிறேன். இவ்விஷயத்தில் சம்பந்தப்பட்ட அனைத்து தரப்பினருடனும், தொடர்ந்து பேச்சுவார்த்தை நடத்தி ஒருமித்த கருத்து உருவாகும் வரை, இந்த முடிவு ஒத்தி வைக்கப்படுகிறது. மாநில முதல்வர்களின் ஒத்துழைப்பு இல்லாமல், இம்முடிவை அமல் செய்திட இயலாது. எனவே, இந்த முடிவை அரசு எடுத்துள்ளது' என்றார். இதன் பின் பேசிய எதிர்க்கட்சித் தலைவர் சுஷ்மா சுவராஜ், "அரசின் முடிவை முழு மனதுடன் வரவேற்கிறேன்' என்றார். இதையடுத்து, கேள்வி நேரம் துவங்கியது. 15 நாட்களுக்கு முன் குளிர்கால கூட்டத்தொடருக்காக துவங்கிய பார்லிமென்ட், ஒருவழியாக நேற்று தான் அமைதியாகச் செயல்படத் துவங்கியுள்ளது.

ஒத்திவைப்பு தீர்மான நோட்டீஸ் தள்ளுபடி: பிரணாப் முகர்ஜி அறிக்கை தாக்கல் செய்ததும், சபாநாயகர் மீரா குமார், "சில்லரை வர்த்தகத்தில் அன்னிய முதலீடு பிரச்னை குறித்து பாசுதேவ் ஆச்சார்யா, தம்பிதுரை, குருதாஸ் தாஸ் குப்தா உள்ளிட்டோர் நோட்டீஸ் அளித்து இருந்தனர். தற்போது நிதியமைச்சர் இவ்வாறு அறிவித்ததன் மூலம், விதி எண் 256ன் கீழ் மிகவும் அவசர முக்கியத்துவம் வாய்ந்த பிரச்னையாக அதை கருதிட முடியாது. எனவே, இந்த தலைவர்கள் அளித்த ஒத்திவைப்பு தீர்மான நோட்டீஸ்களை தள்ளுபடி செய்கிறேன்' என்றார். இந்த முடிவை கண்டித்து, பகுஜன் சமாஜ் கட்சி எம்.பி.,க்கள் வெளிநடப்பு செய்தனர்.