கண்டம்பாக்கம் கிராம நிர்வாக அதிகாரிக்கு சரமாரி அடி-உதை

ஆற்றில் திருட்டுத்தனமாக மணல் எடுத்த பள்ளத்தில் மூழ்கி 2 மாணவர்கள் பலியானதால் ஆத்திரம் அடைந்த பொதுமக்கள் கிராமநிர்வாக அதிகாரியை சரமாரி அடித்து உதைத்தனர்.

ஆற்றில் குளிக்க சென்றனர்

விழுப்புரம் அருகே உள்ள கண்டம்பாக்கம் கிராமத்தை சேர்ந்தவர் ஆறுமுகம். இவருடைய மகன் பரமசிவம் (வயது 19). இவர் விழுப்புரம் ரங்கநாதன் ரோட்டில் மெக்கானிக் கடை வைத்து வேலை செய்து வந்தார். அதே பகுதியை சேர்ந்தவர்கள் ராஜலிங்கம் (18) பிரதாப் (19), சிலம்பரசன் (19), தட்சிணாமூர்த்தி (22) .

நண்பர்களான இவர்கள் 5 பேரும் நேற்று மதியம் 1 மணிக்கு குளிப்பதற்காக தங்களது மோட்டார் சைக்கிளில் அருகில் உள்ள மரகதபுரம் தென்பெண்ணையாற்றுக்கு சென்றனர். அங்கு பரமசிவம் உள்பட 5 பேரும் ஆற்றில் இறங்கி குளித்துக் கொண்டிருந்தனர். அப்போது திடீரென ஆற்றில் மணல் உள்வாங்கியதால் 5 பேரும் ஆற்றில் மூழ்கினர். அதில் பிரதாப் மட்டும், அய்யோ... காப்பாற்றுங்கள், காப்பாற்றுங்கள் என்று அலறினார்.

2 பேர் பலி

சத்தம் கேட்டதும் அருகில் நின்றிருந்த கிராம மக்கள், ஆற்றில் குதித்து 5 பேரையும் காப்பாற்ற முயன்றனர். இதில் பிரதாப், சிலம்பரசன், தட்சிணாமூர்த்தி ஆகிய 3 பேர் மீட்கப்பட்டனர். தண்ணீரில் மூழ்கிய பரமசிவம், ராஜலிங்கத்தை காணவில்லை. அவர்கள் இருவரும் ஆற்றுக்குள் சிக்கியிருந்தனர். அவர்கள் இருவரையும் தேடும் பணியில் கிராம மக்கள் ஈடுபட்டனர்.

இதுகுறித்து விழுப்புரம் தீயணைப்பு துறையினருக்கும், தாலுகா போலீசாருக்கும் தகவல் தெரிவிக்கப்பட்டது. அதன் பேரில் நிலைய அலுவலர் கிருஷ்ணன் தலைமையில் தீயணைப்பு துறையினரும், தாலுகா போலீஸ் இன்ஸ்பெக்டர் தமிழ்மாறன் தலைமையில் போலீசாரும் சம்பவ இடத்திற்கு விரைந்து வந்தனர்.

உடல் மீட்பு

இதற்கிடையில் மாலை 3.15 மணிக்கு ஆற்றில் சிக்கிய பரமசிவத்தின் உடலை பிணமாக பொதுமக்கள் மீட்டனர். ராஜலிங்கத்தை கிராம மக்கள் மற்றும் தீயணைப்பு துறையினர் தொடர்ந்து ஆற்றில் தேடி வருகின்றனர்.

ஆற்றில் மூழ்கி பலியான ராஜலிங்கம் திருநாவலூரில் உள்ள ஒரு கல்லூரியில் பி.எஸ்.சி 2-ம் ஆண்டு படித்து வந்தார்.

கிராம நிர்வாக அலுவலர் மீது தாக்குதல்

ஆற்றில் மூழ்கி 2 பேர் இறந்த சம்பவம் பற்றிய தகவல் அறிந்ததும் மரகதபுரம் கிராம நிர்வாக அதிகாரி (பொறுப்பு) வேலு, சம்பவ இடத்திற்கு வந்தார். அப்போது அங்கிருந்த பொதுமக்கள், வேலுவிடம் சென்று திருட்டு மணல் அள்ளுவதற்கு அனுமதி கொடுத்ததால் தான் ஆற்றில் அதிகளவில் பள்ளம் தோண்டப்பட்டு இந்த உயிர் சேதம் ஏற்பட்டது எனக்கூறி வேலுவை திடீரென கையால் தாக்கினர்.

உடனே பொதுமக்களை போலீசார் தடுத்து நிறுத்தினர். அவர்களை சமாதானப்படுத்தி கிராமநிர்வாக அதிகாரியை மீட்டு பத்திரமாக அழைத்து சென்றனர். இதனால் அங்கு சிறிது நேரம் பெரும் பரபரப்பு ஏற்பட்டது.

தினதந்தி