ஆஸி., தொடரில் பங்கேற்பேன்: சேவக் நம்பிக்கை

மும்பை: ""ஆஸ்திரேலிய அணிக்கு எதிரான ஒருநாள் தொடரில் பங்கேற்பேன்,'' என இந்திய வீரர் சேவக் நம்பிக்கை தெரிவித்துள்ளார்.
சமீபத்தில் தென் ஆப்ரிக்காவில் நடந்த இரண்டாவது ஐ.பி.எல்., தொடரின் போது, டில்லி டேர்டெவில்ஸ் அணியின் கேப்டனாக சேவக் விளையாடினார். இத்தொடரின்போது இவரது தோள்பட்டையில் காயம் ஏற்பட்டது. இதனால், இவர் வெஸ்ட் இண்டீஸ், "டுவென்டி-20' உலக கோப்பை (இங்கிலாந்து), இலங்கை, சாம்பியன்ஸ் டிராபி உள்ளிட்ட முக்கிய தொடர்களில் பங்கேற்கவில்லை. தற்போது காயம் ஓரளவு குணமடைந்த நிலையில் அடுத்து வரவிருக்கும் இரானி கோப்பை (அக். 1-5) மற்றும் சாம்பியன்ஸ் லீக் (அக். 8-23) தொடரில் பங்கேற்க உள்ளார். இதுகுறித்து சேவக் கூறுயதாவது: சர்வதேச போட்டியில் விளையாட இன்னும் முழுஉடற்தகுதி பெறவில்லை. எல்லைக்கோட்டிலிருந்து பந்தை எறிவது மிகவும் கடினமாக உள்ளது. இருப்பினும், ஆஸ்திரேலியாவுக்கு எதிரான ஏழு போட்டிகள் கொண்ட ஒருநாள் தொடரில் (அக். 25-நவ. 11) பங்கேற்பேன் என்ற நம்பிக்கை உள்ளது.
தற்போது அடுத்த மாதம் நடக்கவுள்ள இரானி கோப்பை மற்றும் சாம்பியன்ஸ் லீக் உள்ளிட்ட தொடர்களில் விளையாடுவதற்கு தேவையான பயிற்சி மேற்கொண்டு வருகிறேன். இப்போட்டியில் "சிலிப்' பகுதியில் பீல்டிங் செய்ய தீர்மானித்துள்ளேன்.
கேப்டன் ஆசை:
ஒருபோது இந்திய அணியின் கேப்டனாக செயல்பட விருப்பமில்லை என கூறியது கிடையாது. துணைக் கேப்டன் பொறுப்பு தேவையில்லை என்றுதான் கூறினேன். ஏனெனில், வளரும் இளம் வீரர்கள் துணைக் கேப்டனாக செயல்படும் பட்சத்தில், பின்வரும் நாட்களில் சிறந்த அனுபவம் கிடைக்கும்.
ராசியில்லை:
கடந்த இரண்டு ஐ.பி.எல்., தொடரில் டில்லி டேர்டெவில்ஸ் அணியை பைனலுக்கு கொண்டு சென்றது கிடையாது. ஐ.பி.எல்., போட்டியில் கேப்டன் பொறுப்பு ராசியில்லை என நினைக்கிறேன். எனவே தான், டில்லி அணியின் கேப்டன் பொறுப்பிலிருந்து விலகினேன். டில்லி டேர்டெவில்ஸ் அணிக்கு காம்பிரை கேப்டனாக தேர்வு செய்தது, அணி நிர்வாகத்தின் சிறந்த முடிவு. இவர் சிறந்த கிரிக்கெட் வீரர். கேப்டனுக்கு தேவையான அனைத்து தகுதியும் இவரிடம் உள்ளது.
சிறந்த வாய்ப்பு:
சாம்பியன்ஸ் லீக் கிரிக்கெட் தொடர் இளம் வீரர்களுக்கு சிறந்த அனுபவம் கொடுக்கும். இத்தொடரின் மூலம் இவர்கள் டிவி மற்றும் நேரடி ரசிகர்கள் முன்னிலையில் போட்டியில் பங்கேற்கும் வாய்ப்பு கிடைக்கும். ஐ.பி.எல்., மற்றும் சாம்பியன்ஸ் லீக் தொடரில் இளம் வீரர்கள் சாதிக்கும் பட்சத்தில், இனிவரும் நாட்களில் தேசிய அணியில் இடம் பிடிக்கலாம்.
இவ்வாறு சேவக் கூறினார்.

சேவக் வந்தால் டீம் இன்னும் கொஞ்சம் நல்லா இருக்கும்......