கார்த்திகை தீபத் திருவிழா

Print | E-mail
திங்கட்கிழமை, 28, நவம்பர் 2011 (23:36 IST)


கார்த்திகை தீபத் திருவிழா; நாளை கொடியேற்றம்

திருவண்ணாமலை அருணாசலேஸ்வரர் கோவில் கார்த்திகை தீப திருவிழா நாளை (செவ்வாய்க்கிழமை) கொடியேற்றத்துடன் தொடங்குகிறது.

காலையில் கோவில் நடை திறக்கப்பட்டு சாமி அம்மனுக்கு சிறப்பு அபிஷேகம், அலங்காரம், தீபாராதனை செய்யப்படுகிறது.

தொடர்ந்து சாமி சன்னதியில் உள்ள தங்க கொடிமரத்தின் அருகே பஞ்சமூர்த்திகள் எழுந்தருள்வார்கள்.

பின்னர் காலை 5.30 மணி முதல் 7 மணிக்குள் தங்க கொடிமரத்தில் கொடியேற்றப்படுகிறது. கார்த்திகை தீப திரு விழாவை முன்னிட்டு கொடியேற்றத்திற்கு முன்பு 3 உற்சவம் நடைபெறும்.

முதல் நாள் உற்சவமான துர்க்கையம்மன் உற்சவம் நேற்று முன்தினம் இரவு நடந்தது. நேற்று இரவு பிடாரியம்மன் உற்சவம் நடந்தது.

இன்று (திங்கட்கிழமை) இரவு விநாயகர் உற்சவம் நடக்கிறது. கொடியேற்றத்தை அடுத்து பஞ்சமூர்த்திகள் கண்ணாடி விமானங்களில் மாடவீதியை சுற்றி வந்து பக்தர்களுக்கு அருள் பாலிக்கிறார்கள். இரவில் மூஷிகம், மயில், வெள்ளி அதிகார நந்தி, ஹம்சம், சிம்ம வாகனங்களில் வீதி உலா வருகிறார்கள்.

தொடர்ந்து தினமும் காலையில் விநாயகர், சந்திரசேகரர் வீதிஉலாவும், இரவில் பஞ்ச மூர்த்திகள் வீதி உலா நடை பெறும். திருவிழாவின் 6-வது நாளான 4-ந் தேதி காலையில் 63 நாயன்மார்கள் வீதிஉலாவும், இரவில் வெள்ளி ரதத்தில் பஞ்சமூர்த்திகள் வீதி உலாவும் நடக்கிறது. 5-ந் தேதி காலை முதல் இரவு வரை தேரோட்டம் நடக்கிறது.

ஒரே நாளில் 5 தேர்கள் இழுக்கப்படும். இரவு அம்மன் தேரை பெண்களே இழுப்பது சிறப்பாகும். கார்த்திகை தீபதிருவிழாவின் சிகர நிகழ்ச்சியாக 10-வது நாள் மகா தீபம் ஏற்றப்படுகிறது. அன்று காலை 4 மணிக்கு கோவிலில் பரணி தீபமும், மாலை 6 மணிக்கு 2668 அடி உயர மலை உச்சியில் மகாதீபமும ஏற்றப்படுகிறது.

மகாதீபத்தை காண அன்று ஒரேநாளில் சுமார் 20 லட்சம் பக்தர்கள் திருவண்ணாமலையில் கூடுவார்கள் என்று எதிர்பார்க்கப்படுகிறது.

இந்த மகாதீபம தொடர்ந்து 11 நாட்கள் மலை உச்சியில் காட்சி தரும். மகா தீபத்திற்கு பக்தர்கள் நெய்காணிக்கை செலுத்த கோவில் நிர்வாகம் ஏற்பாடுகள் செய்துள்ளது. நெய்காணிக்கை செலுத்தும் பக்தர்களுக்கு மகா தீபத்தில் இருந்து எடுக்கப்படும் அண்ணாமலையார் மை பிரசாதமாக வழங்கப்படும்.

நக்கீரன்