அமெரிக்க கூட்டுப்படை குண்டுவீசி தாக்கியதில் பாக்.வீரர்கள் 25 பேர் பலி

**சிவா** · **சிவா** Sun Nov 27, 2011 11:45 am

பாகிஸ்தானுக்குள் அமெரிக்க கூட்டுப்படை ஹெலிகாப்டர்கள் அத்துமீறி புகுந்து குண்டு வீசி தாக்குதல் நடத்தியது. இதில் ராணுவ தளபதிகள் உள்பட 25 வீரர்கள் பலியானார்கள். இதற்கு பதிலடியாக அமெரிக்க படைகளுக்கு செல்லும் முக்கிய பொருட்கள் சப்ளை செய்வதை பாகிஸ்தான் தடை செய்துள்ளது.

உறவில் விரிசல்

ஆப்கானிஸ்தான், பாகிஸ்தான் ஆகிய நாடுகளில் தீவிரவாதிகளை ஒழிப்பதில் அமெரிக்க கூட்டுப்படைகள் ஈடுபட்டு வருகின்றன. தீவிரவாதிகளை ஒழிக்கும் நடவடிக்கையில் அமெரிக்காவுடன், பாகிஸ்தானும் கைகோர்த்து களம் இறங்கியது.

ஆனால் கடந்த சில மாதங்களுக்கு முன்பு அமெரிக்க அதிரடிப்படை பாகிஸ்தானுக்குள் ரகசியமாக சென்று அல்கொய்தா இயக்க தலைவர் பின்லேடனை கொன்றது. அதன்பிறகு தீவிரவாத ஒடுக்கும் நடவடிக்கையில் சிறிது தொய்வு ஏற்பட்டது.

இதற்கிடையில் நேற்று முன்தினம் பாகிஸ்தான் ராணுவ தளபதி ஆசிப் பர்வேஷ் கயானியும், ஆப்கானிஸ்தானில் உள்ள கூட்டுப்படை தளபதி ஜான் அல்லினும் இஸ்லாமாபாத்தில் சந்தித்து தீவிரவாதிகளை ஒடுக்கும் ஒத்துழைப்பு பற்றி பேசினார்கள்.

திடீர் தாக்குதல்

இந்த சந்திப்பு நடைபெற்ற மறுநாளே அமெரிக்க கூட்டுப்படை பாகிஸ்தானின் பகுதிக்குள் நுழைந்து தாக்குதல் நடத்தும் சம்பவம் அரங்கேறியது. பாகிஸ்தான் நாட்டின் வடமேற்கு எல்லையில் மலைவாசி மக்கள் வசிக்கும் பகுதியில் ராணுவ சோதனை சாவடி ஒன்று உள்ளது. இந்த சோதனை சாவடியின் மீது அமெரிக்க கூட்டுப்படை ஹெலிகாப்டர்கள் குண்டு வீசி தாக்குதல் நடத்தியது.

ஆப்கானிஸ்தானில் இருந்து ஹெலிகாப்டர்களில் சென்று இந்த தாக்குதலில் ஈடுபட்டதாக கூறப்படுகிறது.

25 வீரர்கள் பலி

இந்த தாக்குதலில் 2 ராணுவ மேஜர்கள், ஒரு கேப்டன் உள்பட 25 வீரர்கள் கொல்லப்பட்டனர். மேலும் 15 பேர் காயம் அடைந்தனர். இவர்களில் பலரது உடல்நிலை கவலைக்கிடமாக உள்ளது. இதை பாகிஸ்தான் உளவுப்பிரிவு அதிகாரிகள் உறுதி செய்தனர்.

இதுபற்றி ராணுவ அதிகாரிகள் கூறுகையில், ``இந்த தாக்குதல் நடைபெற்ற இடம் ஆப்கானிஸ்தான் எல்லையில் இருந்து 21/2 கிலோ மீட்டர் தொலைவில் இருக்கிறது. முதலில் கிடைத்த தகவல்படி 25 பேர் வரை பலியாகி இருப்பதாக தெரிகிறது. அது மலைபிரதேசமாக இருப்பதால் சாவு எண்ணிக்கை பற்றிய முழுவிவரம் கிடைப்பதில் தாமதம் ஏற்படுகிறது'' என்று தெரிவித்தனர்.

ஆனால் இந்த தாக்குதல் பற்றி ஆப்கானிஸ்தான் தலைநகர் காபூலில் உள்ள கூட்டுப்படை அதிகாரி கூறுகையில், இது தற்செயலாக ஏற்பட்ட சம்பவம். இதன் விவரத்தை சேகரித்து வருகிறோம்'' என்றார்.

பாகிஸ்தான் பதிலடி

இந்த தாக்குதல் சம்பவத்தை அடுத்து பாகிஸ்தான் பதிலடி கொடுத்தது. ஆப்கானிஸ்தானில் உள்ள அமெரிக்க கூட்டுப்படைக்கு முக்கிய பொருட்கள் செல்வதை தடை செய்தது.

இதுபற்றி பாகிஸ்தான் உயர் அதிகாரி கூறியதாவது:-

அமெரிக்க படைகளுக்கு பொருட்களை ஏற்றிய 40 லாரிகள் வந்தன. அவற்றை நிறுத்தி வைத்துள்ளோம். பிறகு அவை ஜம்ரூட் என்ற இடத்தில் உள்ள சோதனை சாவடிக்கு திருப்பி அனுப்பப்பட்டன.

இவ்வாறு அவர் கூறினார். ஆனால் பாதுகாப்பு காரணமாகவே இந்த நடவடிக்கை எடுத்துள்ளோம் என்று மற்றொரு அதிகாரி விளக்கம் அளித்தார்.

தினதந்தி