இந்திய கடலோர காவல்படைக்கு ஜெயலலிதா கண்டனம்

மதுரை ஐகோர்ட்டு கிளையில் தாக்கல் செய்த மனுவில், இலங்கை கடல்பகுதியில், தமிழக மீனவர்கள் நுழைந்து மீன் பிடிக்க செல்கிறார்கள் என்று இந்திய கடலோர காவல்படை கூறியிருப்பதற்கு கடுமையான கண்டனம் தெரிவித்து, பிரதமர் மன்மோகன்சிங்குக்கு, முதல்-அமைச்சர் ஜெயலலிதா கடிதம் எழுதியுள்ளார்.

இதுகுறித்து நேற்று முதல்-அமைச்சர் ஜெயலலிதா, பிரதமர் மன்மோகன்சிங்குக்கு எழுதியுள்ள கடிதத்தில் கூறியிருப்பதாவது:-

பிரமாண வாக்குமூலம் தாக்கல்

பாக் ஜலஜந்தியில் தங்கள் பிழைப்புக்காக மீன்பிடிக்க செல்லும் தமிழக மீனவர்களுக்கு பாதுகாப்பு அளிக்க, இந்திய கடலோர காவல்படைக்கு உத்தரவிட வேண்டும் என்றுகூறி, சென்னை ஐகோர்ட்டின் மதுரை கிளையில் ஒரு பொதுநல வழக்கு தாக்கல் செய்யப்பட்டிருப்பதை உங்கள் கவனத்துக்கு கொண்டுவர விரும்புகிறேன்.

இந்த வழக்கில் கோர்ட்டில், இந்திய கடலோர காவல்படை ஒரு பதில் பிரமாண வாக்குமூலத்தை தாக்கல் செய்துள்ளது. அதில், தமிழக மீனவர்கள் சர்வதேச கடல் எல்லையை தாண்டி, இலங்கை கடல் பகுதிக்குள் சென்று அந்த நாட்டில் தடை செய்யப்பட்ட மீன் வலைகளை பயன்படுத்தி மீன் பிடிக்கிறார்கள் என்று கூறியுள்ளது.

நினைவுபடுத்த விரும்புகிறேன்

இதுமட்டுமல்லாமல், இந்திய-இலங்கை சர்வதேச கடல் எல்லையில் இருந்து 5 கடல் மைல் தூரத்தை மீன்பிடிக்க தடை மண்டலமாக தமிழ்நாடு அறிவிக்க வேண்டும் என்றும், இதை மீறுபவர்கள் மீது கடுமையான நடவடிக்கைகளை மேற்கொள்ள வேண்டும் என்றும், இந்த பிரமாண வாக்குமூலத்தில் இந்திய கடலோர காவல்படை தெரிவித்துள்ளது.

கோர்ட்டுக்கு முன்பு இந்திய கடலோர காவல்படை இப்படியொரு முரண்பாடான, இயற்கைக்கு விரோதமான, கொடுமையான ஒரு நிலைப்பாட்டை எடுத்ததற்கு, என்னுடைய எதிர்ப்பை தெரிவித்துக்கொள்கிறேன். இதுகுறித்து எனது அரசாங்கத்தின் நிலைப்பாட்டை டெல்லியில் உங்களிடம் 14.6.2011 அன்று கொடுத்த மனுவில் விரிவாக தெரிவித்திருக்கிறேன் என்பதை உங்களுக்கு நினைவுபடுத்த விரும்புகிறேன். அதை மீண்டும் நினைவுபடுத்த விரும்புகிறேன்.

கண்டனம்

காலாகாலமாக எந்த வித பூகோள அல்லது அரசியல் எல்லைகளும் இல்லாமல், பாக் ஜலஜந்தியில் தமிழக மீனவர்கள் பாரம்பரியமாக மீன்பிடித்து வருகிறார்கள். இந்திய மற்றும் இலங்கையின் அதிகாரிகளை கொண்ட இணை பணிக்குழுவில் விவாதித்து எடுத்த பரஸ்பர சம்மதத்தின் அடிப்படையில், இருதரப்புமே, இருநாடுகளின் கடல் பகுதியில் மீன்பிடிக்க அனுமதிக்கலாம் என்று நான் அறிகிறேன்.

நிலைமை இவ்வாறு இருக்க, இந்திய கடலோர காவல்படை இப்படியொரு கண்டனத்துக்குரிய நிலையை வெளிப்படையாக எடுத்திருப்பது உண்மையிலேயே மிகவும் ஆச்சரியமாக இருக்கிறது.

நடவடிக்கை எடுக்கவேண்டும்

இந்த நிலைப்பாடு நடைமுறைப்படுத்தப்பட்டால், தமிழக மீனவர்கள் மீன்பிடிப்பதை நிறுத்திவிட்டு, பட்டினியால்தான் கிடக்கவேண்டும். மத்திய அரசாங்கத்தின் எண்ணம் அதுவல்ல என்று நான் நம்புகிறேன்.

எனவே, திரும்ப சரிசெய்ய முடியாத ஒரு பாதிப்பு ஏற்படுவதற்கு முன்னால், சம்பந்தப்பட்ட கோர்ட்டில் உடனடியாக இந்த நிலைப்பாட்டை சரிசெய்ய தொடர்புடைய அதிகாரிகளுக்கு உத்தரவிடும்படி உங்களை நான் கேட்டுக்கொள்கிறேன்.

மேற்கண்டவாறு அந்த கடிதத்தில் முதல்-அமைச்சர் ஜெயலலிதா கூறியுள்ளார்.

தினதந்தி