கோச்சடையான் - ரஜினிகாந்த் நடிக்கும் புதிய படம் - சவுந்தர்யா டைரக்டு செய்கிறார்

`ராணா' படத்துக்கு முன்பாக ரஜினிகாந்த், `கோச்சடையான்' என்ற புதிய படத்தில் நடிக்கிறார். இந்த படத்தை அவருடைய மகள் சவுந்தர்யா டைரக்டு செய்கிறார்.

`ராணா'

ரஜினிகாந்த் மூன்று வேடங்களில் நடிப்பதாக இருந்த `ராணா' படம், கடந்த ஏப்ரல் மாதம் தொடங்கப்பட்டது. படப்பிடிப்பு தொடங்கிய முதல்நாளே அவருக்கு உடல்நலக்குறைவு ஏற்பட்டது. 2 மாதங்கள் சிங்கப்பூரில் தங்கி சிகிச்சை பெற்றபின், அவர் குணம் அடைந்தார்.

`ராணா' படத்தில், குதிரை சவாரி உள்பட கடினமான சண்டை காட்சிகள் இடம்பெற்றிருப்பதால், இப்போதைக்கு அந்த படத்தில் ரஜினிகாந்த் நடிப்பது அவருடைய உடல்நலனுக்கு உகந்தது அல்ல என்று கருதுகிறார்கள். எனவே, `ராணா' படத்துக்கு முன்பாக வேறு ஒரு படத்தில் நடிக்க ரஜினிகாந்த் முடிவு செய்திருக்கிறார்.

`கோச்சடையான்'

இந்த படத்துக்கு, `கோச்சடையான்' என்று பெயர் சூட்டப்பட்டு இருக்கிறது. இது, இந்தியாவில் தயாராகும் `நடிப்பை பதிவிறக்கம்' செய்யும் முதல் 3டி படம் ஆகும்.

உலகிலேயே அதிக வசூலை வாரிக்குவித்த, ஜேம்ஸ் கேமரூன் டைரக்ஷனில் வெளியான `ஹாலிவுட்' திரைப்படம், `அவதார்' மற்றும் தற்போது உலகம் முழுவதும் பரபரப்பாக ஓடிக்கொண்டிருக்கும் ஸ்டீவன் ஸ்பீல்பெர்க் டைரக்டு செய்த திரைப்படம் `டின் டின்' ஆகிய படங்கள் இதே புதிய தொழில்நுட்பத்த்தில் உருவாக்கப்பட்டது என்பது குறிப்பிடத்தக்கது.

கே.எஸ்.ரவிகுமார்

சரித்திர பின்னணியில் உருவாகும் இந்த படத்தின் கதை-திரைக்கதை-வசனம் எழுதி, டைரக்ஷன் மேற்பார்வையை கே.எஸ்.ரவிகுமார் ஏற்றுள்ளார்.

இந்த படத்தை ஈராஸ் நிறுவனத்துடன் இணைந்து மீடியா ஒன் குளோபல் எண்டர்டெய்ன்மென்ட் நிறுவனத்தினர் தயாரிக்கிறார்கள்.

டைரக்ஷன் பொறுப்பை ரஜினிகாந்தின் மகள் சவுந்தர்யா அஸ்வின் ஏற்றுள்ளார். ஆகஸ்டு 2012-ல் திரைக்கு வர இருக்கும் இந்த படத்தின் படப்பிடிப்பு விரைவில் தொடங்க இருக்கிறது.

கோச்சடையான்' படத்தை தொடர்ந்து ரஜினிகாந்த், `ராணா' படத்தில் நடிப்பார் என்று ஈராஸ் நிறுவனமும், சவுந்தர்யா அஸ்வினும் ரஜினிகாந்த் சார்பாக தெரிவித்தனர்.