ஈசல் சிறகுகள்

அனந்தம் ஜீவ்னி · 03/11/2011

First topic message reminder :

முளைத்தவுடனே உதிரத்தொடங்கும்
ஈசல் சிறகுகளாய்
இன்றைய காதல்கள்

காதலின் இன்றைய வேர்கள்
ஊன்றப்படுவது
உள்ளத்தில் அல்ல
உடல் மினுக்கத்தில்

காதலை ஆரத்தியெடுத்த
தட்டுக்கள் தவிக்கின்றன
வரவேற்பின் அர்த்தம்
அனர்த்தமாகி விட்டது

பெரும்பாலான காதல்கள்
கல்யாணத்தை சந்திக்கும் முன்பே
கருக்கலைப்பை சந்திக்கிறது.

கர்ப்பம் தரித்த பிறகு
கணவனை வரிப்பது கூட
கௌரவமாகி வருகிறது...

மும்தாஜை பிரிந்ததால்
இன்றைய ஷாஜகான்கள்
மாளிகை கட்டவில்லை
மளிகை கடையில்
பொட்டலம்தான் கட்டுகிறார்கள்..

எப்போதுமே யதார்த்தம்
சுமையானது மட்டுமல்ல
சோகமானது

நாழிகைக் கணக்கில் ஆயுள் உள்ள
சிறகுகளை நம்பி
வானத்தையே குத்தகை எடுத்ததைப் போல்
குதித்தவர்கள்-
யாதார்த்த வெம்மையில் சிறகுகள் பொசுங்க
மண்புழுதியை முத்தமிடுகிறார்கள்-

வளைந்த நாணல்களில்
புல்லாங்குழல் ஊதப்போய்
புண்ணாக்கிக் கொள்வது போலவே!

அரங்கேற்றத்திற்கு முன்பே
பல அவசர கால்கள் ஊனமாகி விடுகின்றன

படிப்பதற்கு முன்பே
பல பக்கங்கள் களவாடப்படுகின்றன

முளைப்பதற்கு முன்பே
பல விதைகள்
நசுக்கப் படுகின்றன.

பழுக்கும் ஆவலில்
பல காய்கள் வெதும்பி போகின்றன.

வாழ்கை மைதானத்தில்
வேடமிடுதலே விளையாட்டாகி விட்டது..

காதலை ஆரத்தியெடுத்த
தட்டுக்கள் தவிக்கின்றன
வரவேற்பின் அர்த்தம்
அனர்த்தமாகி விட்டது