2ஜி ஊழல் வழக்கில் கனிமொழிக்கு ஜாமின்கிடைக்குமா? ஐந்து தொழிலதிபர்களுக்கு சுப்ரீம் கோர்ட் அனுமதி

புதுடில்லி:"2ஜி' ஸ்பெக்ட்ரம் வழக்கில் குற்றம் சாட்டப்பட்டவர்களில், ஐந்து பேருக்கு சுப்ரீம் கோர்ட் நேற்று ஜாமின் வழங்கியதையடுத்து, கனிமொழிக்கும் விரைவில் ஜாமின் கிடைக்கும் என்ற, எதிர்பார்ப்பு உருவாகியுள்ளது. அதற்கேற்ற வகையில், அவர்களின் ஜாமின் மனுவை, விரைவான விசாரணைக்கு பட்டியலிடும்படி, ஐகோர்ட்டில் வழக்கறிஞர்கள் கேட்டுக் கொண்டுள்ளனர்.

"2ஜி' ஸ்பெக்ட்ரம் ஒதுக்கீடு மோசடி வழக்கில் 14 பேர் மீது, சி.பி.ஐ., வழக்கு பதிவு செய்தது. இதைத் தொடர்ந்து, முன்னாள் அமைச்சர் ராஜா கடந்த பிப்ரவரியில் கைது செய்யப்பட்டார். அவரைத் தொடர்ந்து தி.மு.க., எம்.பி., கனிமொழி உள்ளிட்டோர், இந்த வழக்கு தொடர்பாக கைது செய்யப்பட்டு திகார் சிறையில் அடைக்கப்பட்டனர்.

பின்னர் அனைவருக்கும் எதிராக குற்றப் பத்திரிகை தாக்கல் செய்யப்பட்டதால், கனிமொழி, கலைஞர் "டிவி' நிர்வாக இயக்குனர் சரத்குமார் உட்பட ஆறு பேர், ஜாமின் கோரி சி.பி.ஐ., சிறப்புக் கோர்ட்டில் மனு தாக்கல் செய்தனர். இந்த மனுவை கோர்ட் நிராகரித்துவிட்டது. இதையடுத்து, டில்லி ஐகோர்ட்டில் அப்பீல் மனு தாக்கல் செய்தனர். அந்த மனுக்கள் மீதான விசாரணை, வரும் டிசம்பர் 1ம் தேதிக்கு ஒத்தி வைக்கப்பட்டுள்ளது.

இந்நிலையில், "2ஜி' ஸ்பெக்ட்ரம் வழக்கில் கைதான யுனிடெக் லிமிடெட் நிர்வாக இயக்குனர் சஞ்சய் சந்திரா, சுவான் டெலிகாம் இயக்குனர் வினோத் கோயங்கா, ரிலையன்ஸ் அனில் திருபாய் அம்பானி குரூப் நிறுவனங்களைச் சேர்ந்த அதிகாரிகளான கவுதம் டோஷி, ஹரி நாயர், சுரேந்திர பிபாரா ஆகிய ஐந்து பேர், ஜாமின் கோரி தாக்கல் செய்த மனுவை நேற்று விசாரித்த சுப்ரீம் கோர்ட், அவர்களுக்கு ஜாமின் வழங்கி உத்தரவிட்டது. இது தொடர்பாக பேசிய, யுனிடெக் லிமிடெட் நிர்வாக இயக்குனரின் வழக்கறிஞர் ராம் ஜெத்மலானி, ""சுப்ரீம் கோர்ட் ஜாமின் வழங்கி பிறப்பித்த உத்தரவின் மூலம், சரியான வழிகாட்டு முறைகள் கடைபிடிக்கப்பட்டுள்ளன. இதன் மூலம் கீழ்க்கோர்ட்களில் நீதியின் போக்கு மதிப்பு குறைந்த வகையில் காணப்படுகிறது,'' என்றார்.

ஸ்பெக்ட்ரம் வழக்கில் ஐந்து பேருக்கு சுப்ரீம் கோர்ட் ஜாமின் வழங்கியதன் மூலம், இந்த வழக்கில் கைதான கனிமொழி மற்றும் சரத்குமார் உட்பட ஆறு பேருக்கு விரைவில் ஜாமின் கிடைக்கும் வாய்ப்பு உருவாகியுள்ளது. அதற்கு ஏற்ற வகையில், "சுப்ரீம் கோர்ட்டின் தீர்ப்பு நல்ல நம்பிக்கையை ஏற்படுத்தியுள்ளது' என தி.மு.க., பார்லிமென்டரி கட்சித் தலைவர் டி.ஆர்.பாலு கூறியுள்ளார்.

அதே நேரத்தில், நேற்று காலை சுப்ரீம் கோர்ட் தீர்ப்பு வெளியானதும், கனிமொழி மற்றும் ஐந்து பேரின் வழக்கறிஞர்கள் டில்லி ஐகோர்ட் பதிவாளர் அலுவலகத்தை அணுகி, தங்கள் கட்சிக்காரர்களின் ஜாமின் மனுவை விரைவான விசாரணைக்கு பட்டியலிடும்படி வேண்டிக் கொண்டனர்.

தினமலர்

கனி விஷயத்தில் கோர்ட்டு ஒருதலைப் பட்சமாகச் செயல் படுவதாகத்தான் தோன்றுகிறது.