டெல்லியில் கறுப்பு பணத்தை பதுக்கிய 22 பேர் சிக்கினார்கள்: ரூ.80 கோடி வரி வசூல்

**இளமாறன்** · **இளமாறன்** Tue Nov 22, 2011 12:21 am

புதுடெல்லி, நவ. 21-

வெளிநாட்டு வங்கிகளில் இந்திய கறுப்பு பண முதலைகள் பலர் முதலீடு செய்துள்ளனர். இப்படி வெளிநாட்டு வங்கிகளில் முதலீடு செய்யப்பட்டுள்ள இந்தியர்களின் பணம் ரூ.25 லட்சம் கோடி இருக்கும் என்று கூறப்படுகிறது.

இந்த பணம் முழுவதையும் இந்தியாவுக்கு கொண்டு வரவேண்டும் என்று நீண்ட காலமாகவே வலியுறுத் தப்பட்டு வருகிறது. எதிர்க் கட்சிகள் மட்டு மின்றி பொது நல அமைப்புகளும் இதில் முனைப்பு காட்டியுள்ளன. இதைத் தொடர்ந்து வெளிநாட்டு வங்கிகளில் முதலீடு செய்யப்பட்டுள்ள கறுப்பு பணத்தை மீட்டு இந்தியாவுக்கு கொண்டு வர சம்பந்தப்பட்ட நாடுகளுடன் ஒப்பந்தம் செய்து கொள்ள இந்தியா முயற்சி எடுத்து வருகிறது.

ஏற்கனவே ஜெர்மனி, சுவிட்சர்லாந்து உள்பட 48 நாடுகளுடன் இந்தியா ஒப்பந்தம் செய்து கொண்டுள்ளது. இப்போது, மேலும் 42 நாடுகளுடன் ஒப்பந்தம் செய்து கொள்ள இருக்கிறது. இந்த நிலையில் ஜெனிவாவில் உள்ள எச்.எஸ்.பி.சி. வங்கி அளித்த ரகசிய கணக்கு பட்டியலின் அடிப்படையில் டில்லியில் உள்ள தொழில் அதிபர்கள், வர்த்தகர்கள் உள்ளிட்ட 22 பேரின் அலுவலகங்கள், வீடுகளில் வருமான வரித்துறை அதிகாரிகள் சோதனை நடத்தினர்.

அப்போது கணக்கில் வராத பணம் குறித்த விபரங்கள் அதிகாரிகளுக்கு கிடைத்தன. இதையடுத்து நடத்தப்பட்ட விசாரணையில் வெளிநாட்டு வங்கிகளில் கறுப்பு பணம் பதுக்கி வைத்திருப்பதை அவர்கள் ஒப்புக்கொண்டனர். வெளிநாட்டு வங்கிகளில் அவர்கள் பதுக்கி வைத்துள்ள கறுப்பு பணத்தின் மதிப்பு சுமார் ரூ.500 கோடி என்று கண்டறியப்பட்டது.

பிரான்ஸ் அரசு அளித்த தகவல்களின்படி 700-க்கும் மேற்பட்ட எச்.எஸ்.பி.சி. வங்கிகளில் இந்தியர்கள் கறுப்பு பணத்தை பதுக்கி வைத்துள்ளது தெரியவந்தது. இதையடுத்து நடைபெற்ற சோதனைகளுக்கு பிறகு, ரூ.18 கோடி வருமான வரியாக, வருமான வரித்துறையிடம் சம்பந்தப்பட்டவர்களால் செலுத்தப்பட்டது. சோதனையின்போது கைப்பற்றப்பட்ட ஆவணங்களை வருமானவரித்துறை அதிகாரிகள் ஆராய்ந்து வருகின்றனர்.

அதன் அடிப்படையில் பட்டியலை தயாரித்து வருகின்றனர். கடந்த 2 ஆண்டுகளுக்கான வருமான வரி கணக்கு தகவல்கள், அது தொடர்பான ஆவணங்களை தாக்கல் செய்யுமாறு உத்தரவிடப்பட்டுள்ளது. டில்லியில் 22 தொழில் அதிபர்களின் வீடுகள், அலுவலகங்களில் நடத்தப்பட்ட சோதனைகள் மிகவும் ரகசியமாக மேற்கொள்ளப்பட்டதாக வருமான வரித்துறையினர் தெரிவித்தனர்.

இவர்களில் எவரும் அரசியல்வாதிகள் இல்லை என்று கூறப்படுகிறது. சோதனை நடத்தப்பட்ட தொழில் அதிபர்களிடம் இருந்து வரி செலுத்தாத காரணத்துக்காக, ரூ.80 கோடியை வரியாக செலுத்திய மத்திய நேரடி வரிகள் ஆணையம் உத்தரவிட்டுள்ளது. அவர்களும் இதை செலுத்த ஒப்புக்கொண்டுள்ளதாக அதிகாரிகள் தெரிவித்தனர். மத்திய நிதி அமைச்சகத்தின் தகவலின்படி, பல்வேறு நாடுகளில் இருந்து இந்தியர்களின் 9900 கறுப்பு பண கணக்கு விபரங்களை இந்திய அரசு பெற்றுள்ளது.

கடந்த ஒரு மாதத்துக்கு முன்பு வரை கிடைத்த தகவல்கள் இவை ஆகும். இது பற்றிய விசாரணை மற்றும் நடவடிக்கைகள் பல்வேறு நிலைகளில் மேற்கொள்ளப்பட்டு வருகின்றன.

மாலைமலர்