3 ஆயிரம் கி.மீ. தூரம் பாயும் அக்னி ஏவுகணை சோதனை வெற்றி

புதுடெல்லி, நவ.15-

இந்தியாவின் பாதுகாப்புக்காக அக்னி ரக ஏவுகணைகளை மத்திய அரசு தயாரித்து ராணுவத்தில் சேர்த்து வருகிறது. அமெரிக்கா, ரஷியா, பிரான்ஸ், சீனாவுக்கு அடுத்தப்படியாக இந்தியாவிடம்தான் இத்தகைய நவீன ஏவுகணைகள் இருப்பது குறிப்பிடத்தக்கது.

அக்னி ஏவுகணைகள் 1989-ம் ஆண்டு முதல் வெற்றிகரமாக பரிசோதித்து பார்க்கப்பட்டு ராணுவத்தின் முப்படைகளிலும் சேர்க்கப்பட்டு வருகிறது. அக்னி-1 ஏவுகணை சுமார் 800 கி.மீ. தூரம் சென்று தாக்கக்கூடியது. அக்னி-2 ஏவுகணை 2500 கி.மீ. தூரமும், அக்னி-3 ஏவுகணை 3500 கி.மீ. தூரமும் பாயக்கூடியது.

இந்த நிலையில் அக்னி-2ன் நவீனமாக்கப்பட்ட புதிய ஏவுகணை உருவாக்கப்பட்டது. இந்த ஏவுகணை கடந்த டிசம்பர் மாதம் முதன்முதலாக பரிசோதிக்கப்பட்டபோது தோல்வி அடைந்தது.

இந்த நிலையில் இன்று அந்த ஏவுகணை ஒரிசாவின் வீலர் தீவில் சோதித்து பார்க்கப்பட்டது. நகரும் வாகன ஏவுதளத்தில் இருந்து சீறிப்பாய்ந்த அந்த அக்னி ஏவுகணை வெற்றிகரமாக 3 ஆயிரம் கி.மீ. பறந்து சென்று குறிப்பிட்ட இலக்கை தாக்கி யது. இந்த ஏவுகணை 20 மீட்டர் நீளம் உடையது. 17 டன் பிரமாண்ட எடை கொண்டது. இந்த ஏவுகணையில் ஒரு டன் அணு ஆயுதத்தை வைத்து செலுத்தி தாக்குதல் நடத்த முடியும்.

அக்னி-2 தரம் மேம்படுத்தப்பட்ட ஏவுகணை வெற்றி பெற்றதால் ராணுவ உயர் அதிகாரிகள் மகிழ்ச்சி அடைந்தனர். இந்த வகை ஏவுகணைகள் அக்னி-4 என்றழைக்கப்படும் என்று அறிவிக்கப்பட்டுள்ளது. இந்த நவீன வகை ஏவுகணை மூலம் சீனாவின் முக்கிய நகரங்களான பீஜிங், ஷாங்காய் நகரங்களை இந்திய ராணுவத்தால் மிக எளிதாக தாக்க முடியும்.

அடுத்து அக்னி-5 ரக ஏவுகணையை இந்தியா தயாரித்து வருகிறது. இது அணு ஆயுதங்களை தாங்கி கண்டம் விட்டு கண்டம் பறந்து சென்று 6 ஆயிரம் கி.மீ. தூரத்துக்கு அப்பால் உள்ள இலக்கையும் தாக்கக் கூடியது. அக்னி ஏவுகணைகளின் அடுத்தடுத்த வெற்றி, இந்தியாவை உலக வல்லரசு நாடுகளில் ஒன்றாக மாற்றியுள்ளது.

மாலைமலர்