எதிர்பாராத ஆச்சரியங்களை கொண்டதுதான் வாழ்க்கை ?

நம்பிக்கைதான் வாழ்க்கை. எதை இழந்தாலும் திரும்ப பெற்று விடலாம். நம்பிக்கையை இழந்தால் எது இருந்தாலும் பயனில்லை. கடன் தொல்லையால் குடும்பத்தோடு தற்கொலை செய்ய முடிவு செய்திருக்கிறார் கேரள வியாபாரி ஒருவர்.
இந்த நேரத்தில் அவருக்கு லாட்டரியில் ரூ. 40 லட்சமும், ஒரு காரும் பரிசாக கிடைத்தது. வாழ்க்கையே தலைகீழாக மாறிப்போய் விட்டது. கேரள மாநிலம் வெள்ளறடை வேங்கோடு பகுதியை சேர்ந்தவர் விஜயகுமார். மனைவி ரமா. அகில் விஜய், அருண் விஜய் என 2 மகன்கள்.

ஏழ்மை நிலையில் இருந்த விஜய குமார், சில ஆண்டுகளுக்கு முன் நண்பருடன் சேர்ந்து வீட்டுக்கு அருகே ஸ்டேஷனரி கடை நடத்தினார். அதில் நஷ்டம் ஏற்பட்டதால் விஜயகுமாரின் நண்பர் தற்கொலை செய்து கொண்டார். விஜயகுமாரும் தொடர்ந்து கடையை நடத்த முடியாமல் பூட்டினார். இதனால் பல லட்சம் கடன் ஏற்பட்டது. குடும்பத்துடன் தற்கொலை செய்ய தீர்மானித்தார். இதையறிந்த நண்பர்கள் அவருக்கு அறிவுரை கூறி தற்கொலை எண்ணத்தை மாற்றினர். தொடர்ந்து நண்பர்கள் 5 பேர் சேர்ந்து வீட்டின் அருகில் இன்ஜின் ஆயில் விற்பனை கடையை நடத்தி வருகின்றனர்.

இந்நிலையில், விஜயகுமார் கடந்த வாரம் கேரள அரசின் பாக்கிய நிதி என்ற லாட்டரி சீட்டை வாங்கினார். 11.11.11 அன்று குலுக்கல் நடந்தது. இதில் முதல் பரிசான ரூ.40 லட்சமும் இன்னோவா காரும் விஜய குமாருக்கு கிடைத்தது. ‘கடன் தொல்லையால் தற்கொலை முடிவில் இருந்த எனக்கு லாட்டரியில் பரிசு கிடைத்தது பிரமிப்பாக உள்ளது. இந்த பணத்தின் மூலம் கடன்களை அடைத்து விட்டு ஒரு தொகையை குழந்தைகளின் எதிர்காலத்துக்காக சேமிப்பேன்Õ எனக் கூறியிருக்கிறார் அவர்.

எந்த நேரமும் எதுவும் நடக்கும். நாளை நடப்பதை யாரறிவார்? நஷ்டப்பட்டவர்கள் எல்லாம் தற்கொலை செய்து கொண்டால், யாரும் உலகில் வாழ முடியாது. கஷ்டம் வரும்போதெல்லாம், இதுவும் கடந்து போகும் என நம்பிக்கையோடு காத்திருக்க வேண்டும். சில லட்சங்கள் நஷ்டத்துக்காக அவர் உயிரை விட்டிருந்தால், இப்போது 40 லட்சத்தை பார்த்திருக்க முடியுமா? அதுதான் வாழ்க்கை. எதிர்பாராத ஆச்சரியங்களை கொண்டதுதான் வாழ்க்கை. அதை புரிந்து கொண்டால் யாருக்கும் தற்கொலை எண்ணம் வரவே வராது.


நன்றி : http://www.gnanamuthu.com/2011/11/blog-post_5111.html