போயஸ் கார்டனை மனநல மருத்துவமனையாக ஜெயலலிதா மாற்றுவார்: மு.க.ஸ்டாலின்!

கடலூர் : ஜெயலலிதா ஆட்சியில் போயஸ்
கார்டனை ஜெயலலிதா மனநல மருத்துவமனையாக மாற்றினாலும் ஆச்சரியப்படுவதற்கு
இல்லை என்று மு.க.ஸ்டாலின் கூறினார்.
நில அபகரிப்பு மற்றும் திருவாரூர்
பொதுக்கூட்டத்தில் ஜெயலலிதாவை அவதூறாக பேசியதாக தொடரப்பட்ட வழக்கில் திமுக
முன்னாள் அமைச்சர் பொன்முடி கைது செய்யப்பட்டு கடலூர் மத்திய சிறையில்
அடைக்கப்பட்டுள்ளார். திமுக பொருளாளர் மு.க.ஸ்டாலின் நேற்று கடலூர் மத்திய
சிறையில் பொன்முடியை சந்தித்து பேசினார்.

முன்னாள் அமைச்சர்கள்
எம்.ஆர்.கே. பன்னீர்செல்வம், எ.வ. வேலு, சாத்தூர் ராமச்சந்திரன் ஆகியோர்
உடனிருந்தனர். மு.க.ஸ்டாலின் நிருபர்களிடம் கூறியதாவது:
கடந்த திமுக
ஆட்சியில் கருணாநிதியால் நிறைவேற்றப்பட்ட திட்டங்களான கலைஞர் மருத்துவ
காப்பீட்டு திட்டம், கலைஞர் வீடு வழங்கும் திட்டம் உள்ளிட்ட ஏழை, எளிய
மக்களுக்கான பல்வேறு திட்டங்கள் அதிமுக ஆட்சியில் அடியோடு நிறுத்தப்பட்டன.

புதியதாக
உருவாக்கப்பட்ட தலைமை செயலகத்தை தொடர்ந்து அண்ணா நூற்றாண்டு நூலகத்தை
குழந்தைகள் நல மருத்துவமனையாக மாற்றும் அறிவிப்பை ஜெயலலிதா
வெளியிட்டுள்ளார். 13,500 மக்கள்நல பணியாளர்களின் வேலையை பறிக்கும் ஆணையை
அறிவித்து இருப்பது கண்டிக்கத்தக்கது. இந்த ஆட்சியின் ஆணவ போக்கை கண்டித்து
பல்வேறு அமைப்புகள், பல்வேறு கட்சியினர் போராட்டம் நடத்தி வருகிறார்கள்.

திமுக
இளைஞர் அணி நடத்தும் கண்டன ஆர்ப்பாட்டம் ஒவ்வொரு மாவட்ட தலைநகர்களிலும்
15ம் தேதி நடக்க உள்ளது. அவரது துக்ளக் ஆட்சியில் போயஸ் கார்டனை கூட மனநல
மருத்துவமனையாக மாற்றினால் ஆச்சரியப்படுவதற்கு இல்லை. இவ்வாறு மு.க.
ஸ்டாலின் கூறினார்.


தினகரன்