மீண்டும் புற்றீசலாய் கிளம்பியுள்ள சேனல்கள்

**சிவா** · **சிவா** Fri Nov 11, 2011 7:56 pm

:தமிழகத்தில், செப்., 2ம் தேதி, அரசு கேபிள், "டிவி' ஒளிபரப்பு சேவை துவங்கியது. 70 ரூபாய் கட்டணத்தில், 90 சேனல்களை பார்க்கும் வசதியை தமிழக முதல்வர் ஏற்படுத்தி கொடுத்தார். அனுமதியின்றி செயல்பட்டு வந்த பல உள்ளூர் சேனல்களுக்கு மூடு விழா நடத்தப்பட்டது. இந்நிலையில், மீண்டும் ஒளிபரப்பை துவக்க உள்ளூர் சேனல்கள், அரசிடம் மன்றாடி வந்தன. உள்ளாட்சித் தேர்தல் நடத்தை விதிகள் அமலில் இருந்ததால், ஒளிபரப்புக்கு அனுமதி மறுக்கப்பட்டது.

இதனிடையே, நிர்வாக இயக்குனராக இருந்த ஜெயராமனுக்கும், கேபிள், "டிவி' கார்ப்பரேஷன் தலைவர் ராதாகிருஷ்ணனுக்கும் இடையே மோதல் உருவானது. டெண்டர் முறையை அமல்படுத்தி, அதன் மூலம் உள்ளூர் சேனல் ஒளிபரப்பை உரிய கட்டுப்பாடு விதிகளுடன் அனுமதிக்கலாம் என, ஜெயராமன் தரப்பில் கூறப்பட்டது. இதில் ஏற்பட்ட மனக்கசப்பால், ஜெயராமன் பதவியில் இருந்து தூக்கியடிக்கப்பட்டார். நிர்வாக இயக்குனர் பொறுப்பையும், ராதாகிருஷ்ணனே கவனித்தார்.

அதன்பின், எவ்வித உத்தரவுமின்றி உள்ளூர் சேனல் ஒளிபரப்புக்கு அனுமதி வழங்கப்பட்டது. செய்தியைத் தவிர்த்து, விளம்பரம், சினிமா, பாடல் போன்றவை அச்சேனல்களில் ஒளிபரப்பானது. மாவட்டங்களில் ஒன்று, இரண்டு என, இருந்த உள்ளூர் சேனல்கள், 15, 20 என்ற வகையில் உயரத் துவங்கியுள்ளன. அரசு எந்தவித கட்டுப்பாடும் விதிக்காததால், சாதாரண கேபிள் ஆபரேட்டர்கள் கூட, உள்ளூர் சேனல் உரிமையாளர்களாக ஆனார்கள். அ.தி.மு.க., பிரமுகர்களும், ஆளுக்கொரு சேனலை துவக்கிக் கொண்டனர்.

தினமலர்