"ஹலோ, நான் ஜெயில்ல இருந்து பேசுறேன்...!': கைதிகளின் வசதிக்காக சிறைகளில் 56 "போன் பூத்'

கோவை : "ஹலோ, யாரு பேசறது? நான் ஜெயில்ல இருந்து மாயாண்டி பேசறேன். ம்ம்ம்... நான் நல்லா இருக்கேன்... என்னப்பத்தி கவலப்படாதே... அடுத்த மாசம் எப்படியும் ரிலீசாகி வெளியே வந்துடுவேன்; பிள்ளைய நல்லா பார்த்துக்க...' என்பது போன்ற குரல்கள், இனி தமிழக சிறைகளில் பலமாகவே ஒலிக்கும். ஆம், கைதிகள், தங்களது குடும்பத்தினருடன் பேச வசதியாக, 9 மத்திய சிறைகளில் 56 டெலிபோன் பூத்கள் அமையவிருக்கின்றன. இதற்கு அனுமதி அளித்துள்ள மாநில அரசு, டெலிபோன் பூத் அமைக்கும் பணியை "எல்காட்' நிறுவனத்திடம் ஒப்படைத்துள்ளது. தமிழகத்தில் கோவை, சேலம், திருச்சி, வேலூர், கடலூர், மதுரை, நெல்லை மற்றும் சென்னையில் 9 மத்திய சிறைகள் உள்ளன. தவிர மாநிலம் முழுவதும் மூன்று பெண்கள் சிறப்புச் சிறைகள், 12 பார்ஸ்டல் பள்ளிகள், ஐந்து சிறப்பு கிளைச் சிறைகள், ஒன்பது மாவட்ட சிறைகள், 94 கிளைச் சிறைகள், இரண்டு திறந்தவெளிச் சிறைகள் உள்ளன. இச்சிறைகளில் தண்டனைக் கைதிகள், விசாரணைக் கைதிகள் உள்பட 15 ஆயிரம் பேர் அடைக்கப்பட்டுள்ளனர். சமீபகாலமாக, சிறைக்குள் தடை செய்யப்பட்ட பீடி, சிகரெட், புகையிலை, போதை வஸ்துகள், மொபைல் போன்கள் கைதிகளிடம் அதிகளவில் புழங்குகின்றன. காவலர்களின் உதவியுடனும் சிறைக்குள் கடத்திச் செல்லும் கைதிகள், தங்களது "லாக்கப்'களில் பதுக்கி வைத்து முறைகேடாக பயன்படுத்துகின்றனர். சில கைதிகள், சிறைக்குள் "டெலிபோன் பூத்' நடத்தாத குறையாக நான்கு, ஐந்து மொபைல் போன்களை பதுக்கி வைத்து, சக கைதிகளுக்கு வாடகைக்கும் கொடுக்கின்றனர். நிமிடத்துக்கு 25 முதல் 50 ரூபாய் "கட்டணம்' நிர்ணயித்து வசூலிப்பதாகவும் கூறப்படுகிறது.

கோவை மத்திய சிறையில் இதுபோன்ற முறைகேடுகள் அதிகரித்துள்ளன. இதுபோன்ற முறைகேடுகளை தடுக்க, சிறைக் கண்காணிப்பாளர் முருகேசன் தலைமையிலான அதிகாரிகள், காவலர்கள் நேற்று காலை முதல் மாலை வரை சோதனையில் ஈடுபட்டனர். சிறைகளில் டெலிபோன் பூத்: சிறை கைதிகள் சட்ட விதிகளை மீறி மொபைல் போன் பயன்படுத்துவதை தடுக்கும் வகையில் தமிழகத்திலுள்ள மத்திய சிறை தோறும் சிறைத்துறை சார்பில் 56 "டெலிபோன் பூத்'களை துவக்க தமிழக அரசு அனுமதி அளித்துள்ளது. இதன்படி, கோவை சிறையில் 8 டெலிபோன் பூத்கள் அமைக்கப்படவுள்ளன. சிறை அதிகாரி ஒருவர் கூறுகையில், "மத்திய சிறைகளில் டெலிபோன் பூத் அமைப்பதற்கான பொறுப்பு, "எல்காட்' நிறுவனத்திடம் ஒப்படைக்கப்பட்டுள்ளது. ஆரம்ப கட்ட பணியை அந்நிறுவனம் துவக்கியிருப்பதாக தகவல்கள் கிடைத்துள்ளன. சிறையில் டெலிபோன் பூத் செயல்படத்துவங்கினால், சிறைக்குள் சட்ட விதிகளை மீறி கைதிகள் மொபைல் போன் பயன்படுத்துவது குறையும். டெலிபோன் பூத் அமைந்த பின், அவற்றை கைதிகள் பயன்படுத்துவது தொடர்பான விதிமுறைகள் எதுவும் இதுவரை எங்களுக்கு அரசு தரப்பில் தெரிவிக்கப்படவில்லை' என்றார்.


தின மலர்

நடக்கட்டும் நடக்கட்டும்