தேடி சிரமப்பட வேண்டியதில்லை: தேங்காய் பறிக்க ஆட்கள் தேவையா? ஆன்லைனில் தேர்வு செய்து கொள்ளலாம்

கேரளா, நவ. 9-

தென்னை மரம் ஏறுபவர்களின் பெயர், விவரங்களை கேரள தென்னை அபிவிருத்தி வாரியம் தனது இணையதள முகவரியில் வெளியிட்டுள்ளது. கேரளாவில் பிரதான தொழில் தென்னை விவசாயம் ஆகும். இந்தியாவிலேயே இங்குதான் தென்னை மரம் அதிகமாக உற்பத்தி செய்யப் படுகிறது. தென்னை உற்பத்தி பொருள்களை மையமாக வைத்து நிறைய தொழிற்சாலைகள் அங்கு உள்ளன.

அமோகமாக நடந்து வந்த தென்னை விவசாயம், சில வருடங்களாக பல்வேறு சோதனைகளை சந்தித்து வருகிறது. தேங்காய் விலை வீழ்ச்சி அடைந்து விட்டதே இதற்கு காரணம். பூச்சிகள் தாக்குதல் காரணமாகவும் பெரும் நஷ்டத்தை தென்னை விவசாயிகள் சந்தித்து வருகின்றனர். இவற்றை விட எல்லாம் அவர்களுக்கு பெரிய பிரச்சினையாக இருப்பது, தேங்காய் பறிக்க ஆட்கள் கிடைக்காதது தான்.

தென்னை மரம் ஏறும் தொழிலாளர்கள் மாற்று தொழிலை நாடிச் செல்வதால், தேங்காய் பறிக்க ஆள் பற்றாக்குறை ஏற்பட்டுள்ளது. இந்த தொழிலில் தொடர்ந்து ஈடுபட்டு வருபவர்களும், ஆங்காங்கே உள்ளதால், அவர்களை தேடிக் கண்டுபிடிப்பதும் தென்னை விவசாயிகளுக்கு சிரமமாக உள்ளது. இந்நிலையில், தென்னை விவசாயிகளின் சிரமங்களை போக்க கேரள தென்னை அபிவிருத்தி வாரியம் முன் வந்துள்ளது.

அதாவது மாநிலத்தில் உள்ள தென்னை மர தொழிலாளர்களின் பெயர், விவரங்களை போன் நம்பருடன் சேகரித்துள்ளது. மாவட்ட வாரியாக பிரித்து அவர்கள் பற்றிய விவரங்களை ஆன்-லைனில் வெளியிட்டுள்ளது. தென்னை அபிவிருத்தி வாரிய இணையதள முகவரியில் சென்று பார்த்தால் அவர்கள் பற்றிய விவரங்கள் கிடைக்கும். நேரில் சென்று அழைக்க தேவையில்லை. அவர்களின் போன் நம்பரிலேயே தொடர்பு கொண்டு தேவையான ஆட்களை வேலைக்கு அழைத்துக் கொள்ள முடியும்.

ஆன்லைனில் வெளியிடப்பட்டுள்ள மாவட்ட வாரியான தென்னை மரம் ஏறும் தொழிலாளர்கள் எண்ணிக்கை வருமாறு:- காசர்கோடு-97, கண்ணூர்-166, கோழிக்கோடு-162, மலப்புரம்-52, பாலக்காடு-205, திரிச்சூர்-120, எர்ணாகுளம்-97, ஆலப்புழா-61, கோட்டயம்-61, பத்தனம்திட்டா-20, கொல்லம்-136, திருவனந்தபுரம்-104.

இதுபற்றி தென்னை அபிவிருத்தி வாரிய அதிகாரி கே.முரளிதரன் கூறுகையில், தென்னை மரம் ஏறுபவர்களின் எண்ணிக்கை குறைந்து வருகிறது. இதை ஈடுகட்ட 5 ஆயிரம் பேரை தேர்ந்தெடுத்து அவர்களுக்கு தென்னை மரம் ஏறும் பயிற்சி அளிக்க உள்ளோம்.

மரம் ஏறும் தொழில் நுட்பம் தவிர, தென்னம் பாளையை சுத்தம் செய்வது, பூச்சிக் கொல்லி மருந்து தெளிப்பது உள்ளிட்ட பயிற்சிகளும் கொடுக்கப்படும் என்று தெரிவித்தார்.