நியாய விலைக்கடைகள் பற்றி அறிந்து கொள்ளுங்கள்

பொது விநியோக திட்டத்தின் மூலம் குடும்ப அட்டைதாரருக்கு வழங்கப்படும் அத்தியாவசியப் பொருட்கள் நியாய விலைக் கடைகள் மூலம் வழங்கப்படுகிறது. நியாயவிலை கடைகளுக்கு கீழ்காணும் சேவையின் தரம் நிர்ணயிக்கப்பட்டுள்ளது

எந்த ஒரு குடும்ப அட்டைதாரரும் 2 கி.மீ தூரத்திற்கு மேல் செல்லாதவாறு கிராமம் / இடத்தில் நியாய விலைக்கடைகள் அமைக்கப்பட்டுள்ளன.

1 கி.மீட்டருக்கு தூரத்திற்கு மேல் உள்ள இடங்களில் பகுதி நேர நியாய விலைக் கடைகளை துவக்க அரசு இசைந்துள்ளது.

முழுநேர நியாய விலைக்கடைகள் அவற்றிற்கென அறிவிக்கப்பட்டுள்ள அரசு விடுமுறை நாட்கள் மற்றும் அரசு நிர்ணயித்துள்ள வார விடுமுறை நாளான ஞாயிற்றுக்கிழமை நீங்கலாக (நீலகிரி மாவட்டம் மற்றும் கோயம்புத்தூர் மாவட்டத்தில் வால்பாறை பகுதி நீங்கலாக. இப்பகுதிகளிலுள்ள நியாய விலைக்கடைகளுக்கு வெள்ளிக்கிழமை வாராந்திர விடுமுறையாகும்.) அனைத்து வேலை நாட்களிலும் திறந்திருக்கும்.

நியாயவிலைக்கடைகளின் அலுவல் நேர விபரம் பின்வருமாறு.

சென்னை மற்றும் புறநகர் பகுதிகள்: காலை 8.30 மணி - பி ப 12.30 மணி வரை , மாலை 3.00 மணி - மாலை 7.00 மணி வரை

இதரப் பகுதிகள்: காலை 9.00 மணி - பி ப 1.00 மணி வரை , மாலை 2.00 மணி - மாலை 6.00 மணி வரை


நியாயவிலை கடைகளுக்கு கீழ்காணும் சேவையின் தரம் நிர்ணயிக்கப்பட்டுள்ளது:

விற்பனையாளர்கள் அத்தியாவசியப் பொருட்களை மேற்கண்ட பணிநேரத்தில் மட்டுமே விற்பனை செய்ய வேண்டும்.

அத்தியாவசியப் பொருட்களை குடும்ப அட்டைதாரரின் விருப்பத்திற்கேற்ப எத்தனை தவணையிலும் வழங்கலாம்.

தினமும் காலையில் ஒவ்வொரு நியாய விலைக்கடை முகப்பிலும், ஒவ்வொரு அத்தியாவசியப் பொருட்களின் இருப்பு விவரம் இருப்பு பலகையில் எழுதி வைக்க வேண்டும்.

ஒவ்வொரு அத்தியாவசியப் பொருட்களின் மாதிரியும் நியாய விலை கடையில் மேசையின் மேல் பார்வைக்கு வைத்திருத்தல் வேண்டும்.

தரமற்ற பொருட்கள் அல்லது கெட்டுப்போன பொருட்கள் பெறப்பட்டிருந்தால் அவற்றை குடும்ப அட்டைதாரர்களுக்கு விற்பனை செய்யக்கூடாது.

நியாயவிலை கடை விற்பனையாளர்கள் குடும்ப அட்டைதாரர்களிடம் மரியாதையுடனும் பொறுமையுடனும் , தெளிவாகவும் பதிலளிக்க வேண்டும்.

குடும்ப அட்டைதாரர்கள் அறிந்து கொள்ள ஏதுவாக, விற்பனையாளர் அவசரமாக கடையை விட்டு செல்லும்போது அடுத்து கடை திறக்கப்படும் நேரம் அறிவிப்பு பலகையில் எழுதி வைத்துவிட்டு செல்ல வேண்டும்.

பகுதி நேரக் கடையாக இருப்பின் , நியாயவிலைகடையின் அறிவிப்பு பலகையில் ஒவ்வொரு வாரமும் கடை திறக்கப்படும் நாள், திறக்கப்படும் நேரம் ஆகிய விவரங்கள் எழுதி வைக்கப்பட வேண்டும்.

குடும்ப அட்டைதாரர்கள் நியாயவிலை கடைகளில் கட்டுபாடற்ற பொருட்களை வாங்க நியாய விலைக்கடை விற்பனையாளர்கள் கட்டாயப் படுத்தக் கூடாது.

விற்பனையாளர் அத்தியாவசியப் பொருட்களின் தேவைப்பட்டியலை குறிப்பிட்ட காலத்திற்குள் கொடுத்து, நியாயவிலை கடைகளில் இருப்பு இன்மை ஏற்படாதவாறு உறுதி செய்து கொள்ள வேண்டும்.

ஜுலை 2008ல் அனைத்து நியாயவிலைக் கடைகளிலும் மின்னணு எடை இயந்திரம் பொறுத்தப்படும்.விற்பனையாளர்கள் அத்தியாவசியப் பொருட்களை சரியான அளவு நிறுத்தல் செய்து, தவறு மற்றும் எடை குறைவு ஏற்படாதவாறு வழங்குதல் வேண்டும்.

குடும்ப அட்டைதாரரால் வாங்கப்படும் அத்தியாவசியப் பொருட்களின் அளவு மற்றும் தேதியினை குடும்ப அட்டையில் எவ்வித விடுதல் இன்றி விற்பனையாளரால் தெளிவாக பதிவு செய்யப்பட வேண்டும்.

குடும்ப அட்டைதாரர்கள் எவரையும் தேவையில்லாமல் காத்திருக்க செய்யாமல் அவருக்கு பொருட்களை வழங்கி 30 விநாடிக்குள் அனுப்பி வைக்க வேண்டும்.

நியாய விலைக்கடைகளில் பிரச்சனை இருந்தால் குடும்ப அட்டைதாரர் யாரை அணுக வேண்டும்

நியாய விலை கடையின் சேவை தொடர்பாக முறையீடு இருந்தால் கீழ்காணும் அலுவலர்களிடம் முறையிடலாம்.

உதவி ஆணையாளர் ( சென்னை) அல்லது வட்ட வழங்கல் அலுவலரின் செல்லிடைப் பேசி மூலமாக.

அப்பகுதியை சார்ந்த கூட்டுறவு சார் பதிவாளர்

அம்மாவட்டத்தைச் சார்ந்த துணை ஆணையாளர் ( நகரம்) வடக்கு, துணை ஆணையாளர் (நகரம்) தெற்கு / மாவட்ட வழங்கல் மற்றும் நுகர்வோர் பாதுகாப்பு அலுவலர்

அம்மாவட்டத்தைச் சார்ந்த இணை பதிவாளர் மற்றும் துணை பதிவாளர் (பொவிதி) அவர்களை அணுகலாம் (மாவட்ட கட்டுப்பாட்டு அறையின் மூலமாக)

மாவட்ட ஆட்சித்தலைவர்

ஆணையாளர், உணவு பொருள் வழங்கல் மற்றும் நுகர்வோர் பாதுகாப்புத்துறை அவர்களின் நேரடி குறைதீர் பதிவு திட்டம் மூலமாக.

பகிர்விக்கு நன்றி