தண்டனை

ஓநாய் ஒன்று பசியோடு அலைந்து கொண்டிருந்தது. கொளுத்தும் வெயிலில் ஒரு பாறையின் பக்கமாக வந்தது. அப்போது பாறை இடுக்கில் நாரைகள் எல்லாம் முட்டைகள் வைத்திருப்பதைப் பார்த்தது. உடனே அந்த முட்டைகளை எடுத்துக் குடித்து பசியைப் போக்கி கொள்ள வேண்டும் என்று முடிவு செய்தது.

ஒன்றிரண்டு நாரைகள் அந்தப் பாறை இடுக்கில் இருந்ததால், அந்த நாரைகள் எல்லாம் அந்த இடத்தை விட்டு எப்போது செல்கிறதோ, அப்போது முட்டைகளைக் குடிக்கலாம் என்று பொறுமையுடன் காத்திருந்தது, ஓநாய்.

சிறிது நேரத்தில், நாரைகள் எல்லாம் அந்த இடத்தை விட்டு அருகில் இருந்த காட்டாங்குளக்கரைக்கு சென்று விட்டன.

ஓநாய் மெல்ல நாரைகளின் இருப்பிடத்தை நெருங்கியது. முட்டையைப் பார்த்ததும், ஓநாயின் நாக்கில் எச்சில் ஊறியது. மின்னல் வேகத்தில் அந்த பாறை இடுக்குகளின் இடையே பாய்ந்து சென்றது. அந்த நேரத்தில் அதன் கால் பாறை இடுக்கில் மாட்டிக் கொண்டது. தன் கால்களை வெளியே எடுக்க முடியாமல், ஓநாய் கதறியது. இந்த சப்தத்தைக் கேட்டு நாரைகள் எல்லாம் வேகமாக பறந்து வந்தன.

ஓநாயின் நிலைமையை பார்த்த நாரைகள் மனவருத்தம் அடைந்தன. எப்படியாவது ஓநாயைக் காப்பாற்ற வேண்டும் என்று முடிவு செய்தன.

நாரைகள் எல்லாம் ஒன்று சேர்ந்து ஆலோசித்தன. உடனே அவை மெதுவாக பாறைகளை தங்கள் அலகுகளால் நகர்த்தின. பாறையின் இடுக்கில் சிக்கியிருந்த ஓநாயின் காலை விடுவித்தன. அப்போது ஒருசில நாரைகளின் வாயில் இருந்து ரத்தம் வழிந்தது. என்றாலும், அவை, ஓநாயைக் காப்பற்றும் முயற்சியில் இருந்து பின்வாங்கவில்லை.

தன்னைக் காப்பாற்றிய நாரைகளை வணங்கியது, ஓநாய்.

"நாரைகளே உங்கள் முட்டைகளை குடிக்க வேண்டிய நான் வேகமாக ஓடோடி வந்தேன். ஆனால், நல்ல மனம் படைத்த உங்களுக்கு துரோகம் செய்ய வந்ததன் விளைவால், எனக்கு இந்த ஆபத்து ஏற்பட்டது.நீங்களும், பெரிய மனது பண்ணி, என்னைக் காப்பாற்றி விட்டீர்கள். நல்லவர்களுக்கு துன்பம் செய்ய நினைத்தால், உடனே தண்டனை கிடைத்து விடும் என்பதை இப்போது நான் உணர்ந்து கொண்டேன். என்னை மன்னித்து விடுங்கள். இனி நான் யாருக்கும், கெடுதல் செய்ய நினைக்க மாட்டேன்'' என்று கூறி, ஓநாய் சென்றது.

- எம்.எஸ்.மயில்

கதை என்னமோ நல்லா தான் இருக்கு.ஆனா இன்னிக்கு நல்லது செய்தா அவங்களுக்கு தொடர்ந்து தீமை தான் நடந்துட்டு இருக்கு.