பெட்ரோல் விலை லிட்டருக்கு ரூ.1.80 உயர்வு, நள்ளிரவு முதல் அமலுக்கு வந்தது

**சிவா** · **சிவா** Fri Nov 04, 2011 1:17 pm

பெட்ரோல் விலை லிட்டருக்கு ரூ.1.80 உயர்த்தப்பட்டது. இந்த விலை உயர்வு, நேற்று நள்ளிரவு முதல் அமலுக்கு வந்தது.

எண்ணெய் நிறுவனங்களுக்கு அதிகாரம்

பெட்ரோல் விலையை நிர்ணயிக்கும் அதிகாரத்தை பொதுத்துறை எண்ணெய் நிறுவனங்களிடம் மத்திய அரசு கடந்த ஆண்டு ஜுன் மாதம் ஒப்படைத்தது. அப்போதிருந்து, சர்வதேச சந்தையில் கச்சா எண்ணெய் விலை நிலவரத்துக்கு ஏற்ப பெட்ரோல் விலையை எண்ணெய் நிறுவனங்கள் மாற்றி அமைத்து வருகின்றன.

இருப்பினும், அதிகமான பண வீக்கம் காரணமாக, எண்ணெய் நிறுவனங்கள் தன்னிச்சையாக விலையை உயர்த்தாமல், மத்திய பெட்ரோலிய அமைச்சகத்தின் ஒப்புதலை பெற்ற பிறகே, விலையை உயர்த்தி வருகின்றன.

மீண்டும் விலை உயர்வு

கடைசியாக, கடந்த செப்டம்பர் 16-ந் தேதி, பெட்ரோல் விலையை எண்ணெய் நிறுவனங்கள் உயர்த்தின. அப்போது, லிட்டருக்கு 3 ரூபாய் 14 காசுகள் விலை உயர்த்தப்பட்டது. அமெரிக்க டாலருக்கு எதிரான ரூபாயின் மதிப்பு ரூ.48 ஆக வீழ்ச்சி அடைந்ததால், அப்போது பெட்ரோல் விலை உயர்த்தப்பட்டது.

இந்நிலையில், 2 மாதங்கள் கூட ஆகாத நிலையில், நேற்று மீண்டும் பெட்ரோல் விலை உயர்த்தப்பட்டது. லிட்டருக்கு ஒரு ரூபாய் 80 காசுகள் உயர்த்தப்பட்டது. நாடு முழுவதும் நேற்று நள்ளிரவு முதல் இந்த விலை உயர்வு அமலுக்கு வந்தது.

காரணம் என்ன?

நேற்று அமெரிக்க டாலருக்கு எதிரான ரூபாயின் மதிப்பு ரூ.49.15 ஆக வீழ்ச்சி அடைந்தது. ரூபாய் மதிப்பு வீழ்ச்சி காரணமாக, கச்சா எண்ணெய் இறக்குமதி செலவு அதிகரித்து இருப்பதால், அதை ஈடுகட்ட பெட்ரோல் விலை உயர்த்தப்பட்டு இருப்பதாக எண்ணெய் நிறுவனங்கள் தெரிவித்துள்ளன.

தினதந்தி

**சிவா** · **சிவா** Fri Nov 04, 2011 1:19 pm

பெட்ரோல் விலை உயர்வுக்கு பா.ஜனதா, இடதுசாரி கட்சிகள் கண்டனம்

பெட்ரோல் விலை உயர்வுக்கு பா.ஜனதா கடும் எதிர்ப்பு தெரிவித்துள்ளது. இது குறித்து அக்கட்சியின் செய்தித்தொடர்பாளர் ராஜீவ் பிரதாப் ரூடி கூறுகையில், `பெட்ரோல் விலை உயர்வு, ஐக்கிய முற்போக்கு கூட்டணியின் மற்றொரு நள்ளிரவு வஞ்சகம். பொருளாதாரவாதியான பிரதமர், நாட்டையே வெட்கப்பட வைத்து விட்டார். அரசின் ஆணவத்தை நசுக்க இதுவே உரிய நேரம்' என்றார்.

மார்க்சிஸ்ட் கம்ïனிஸ்டு கட்சி மூத்த தலைவர் நிலோத்பல் பாசு, இந்திய கம்ïனிஸ்டு கட்சி செயலாளர் டி.ராஜா ஆகியோரும் எதிர்ப்பு தெரிவித்துள்ளனர். விலை உயர்வை வாபஸ் பெறுமாறு கோரியுள்ள அவர்கள், விலை உயர்வை எதிர்த்து, நாட்டின் மூலை முடுக்கெல்லாம் போராட்டம் நடத்தப்படும் என்று அறிவித்துள்ளனர்.

**சிவா** · **சிவா** Fri Nov 04, 2011 1:20 pm

முக்கிய நகரங்களில் பெட்ரோல் விலை எவ்வளவு?

இந்தியா முழுவதும் நேற்று நள்ளிரவு முதல் பெட்ரோல் விலை லிட்டருக்கு ரூ.1.80 உயர்ந்தது. சென்னை உள்பட 4 பெருநகரங்களில் பெட்ரோல் விலை எவ்வளவு என்ற விவரம் கீழே தரப்பட்டு உள்ளது. அதில் பழைய விலையும், புதிய விலையால் எவ்வளவு விலை உயர்ந்துள்ளது என்ற விவரமும் வருமாறு:-

நகரம் பழைய விலை புதிய விலை விலை உயர்வு

டெல்லி ரூ.66.84 ரூ.68.64 ரூ.1.80

கொல்கத்தா ரூ.71.28 ரூ.73.15 ரூ.1.87

மும்பை ரூ.71.92 ரூ.73.81 ரூ.1.89

சென்னை ரூ.70.82 ரூ.72.73 ரூ.1.91