தமிழனே!...

ஆயிரம் அறைகூவல்களை
சந்தித்துவிட்டது
உன் அறியாமை


துளிர்க்கும் சிறகுகளை
வெட்டி விடுகிறது
உன் நீடிய சுயநலம்


நீ எழுதிய தீர்ப்பின்
திராவக நெடி
சூழ்கிறது
கருவறையிலும்


தந்திர நரிகள்
உன்னைச் சுற்றி
நீயோ
மலைச்சுற்றலில்.

வீரப்பரம்பரையென
சிரம் நிமிரும்
உன் முகத்தில்
இன்றைய அசிங்கங்கள்


கூச்செறியும்
உன் பிடறியில்
தொங்குகிறது
பூஜைமணி


வாள் பிடித்த
உனது கை
கணக்கு சொல்கிறது
பாதரேகைகளை


எவரெவரோ ஆரோகணிக்க
இன்று நீ
அவரோகணமாக


அரியின் கர்ஜனை
எதிரொலித்த
உன் சுவர்களில்
நரியின் ஊளை


விருந்தோம்பலுக்கு
பெயர் பெற்ற
உன் வாயிலில்தான்
எதிர்ப்படுகின்றன
ராஜபாளையத்தின் கோரப்பற்கள்


கண்ணகிக்கு சிலையெடுத்த
உன் தெருமுனை மறைவில்தான்
அதிபக்த சிரத்தையோடு நடந்தபடி உள்ளன
விபச்சாரிணி தேவிக்கு
ராக்கால பூஜைகள்


திரையோடு தோலும்
கிழிக்கப் பட்ட ரணக் கஸிவில்
நனைகிறது உன் பக்கங்கள்


உனக்காகவே ஏற்றப்பட்ட சுடர்கள்
அணைந்துவிட்டன காலக் காற்றில்
இன்னும் நீ இருளில்


கதிரவனை திரைமூடிவிட்டு
எரிகல்லின் வெளிச்சத்தில்
எழுதபடுகிறது
உன் இருண்ட சரித்திரம்




அர்த்தம் தெரியாமல் நீ பாடும்
தமிழ்த்தாய் வாழ்த்தை
மிஞ்சியொலிக்கின்றன
முள்ளிவாய்க்காலின் மரண ஓலங்கள்


நீ நீரூற்ற தவறிய
வேர்களின் பிம்பங்கள்
உன் தொண்டையில் நிகழ்த்தும்
துக்க முடிச்சுகளை உதாசீனப்படுத்தி விட்டுத்தான்
நீ விழுங்கும் உணவின் கவளங்கள் நகர்கின்றன


கதறி ஓலித்த அழுகுரல்களை ஏந்தியக் காற்று
வாசல் முன் வந்து நிற்கும் போது
ரிங்டோன்களை மாற்றுவது குறித்து
பேசிக் கொண்டிருக்கிறோம் நாம்


வெற்றியின் மமதையில்
இருளின் தேவதைகள் நிகழ்த்திய
கோர வெறியாட்டங்கள்
திரையிடப் படுகின்றன நம் முன்
ஐயோ ..சீக்கிரம் பார்த்து முடி
முடிந்து விடப் போகின்றன
முடியாமல் நீளும் தொலைக்காட்சி சீரியல்கள்.




-அனந்தம் ஜீவ்நி

எல்லாம் சுப்பார்.

நன்றி...ஹிஷாலீ...

அருமையான கவிதைகள் anandham jiivni

மகிழ்வூட்டும் தங்களின் எதிர்வினைக்காக மிக்க நன்றி

இன்றைய தமிழனின் நிலையைத் தெளிவாகக் கூறியுள்ளீர்கள்.

சிவா wrote:இன்றைய தமிழனின் நிலையைத் தெளிவாகக் கூறியுள்ளீர்கள்.

மிக்க நன்றி

சிறந்த வரிகள்....தங்களை பற்றிய அறிமுகம் தாருங்களேன். முகப்பில் உள்ள அறிமுக பகுதியில் சென்று.

உமா wrote:சிறந்த வரிகள்....தங்களை பற்றிய அறிமுகம் தாருங்களேன். முகப்பில் உள்ள அறிமுக பகுதியில் சென்று.

நன்றி உமா !என்னைப் பற்றிய சுய அறிமுகத்தை தளத்தில் இணைந்த அன்றே செய்திருக்க வேண்டும் .சொல்லப்போனால் இது போன்ற தளங்கள் அவற்றின் வழமைகள் இவற்றின் உடனான எனது பரிச்சியம் மிகக் குறைவே. பொதுவில் என்னை வெளிப்படுதிக்கொள்வதில் கூச்சமுறுபவனும் கூட ... அதனாலேயே அவ்வாறான அறிமுகத்தில் விருப்பம் இல்லாதிருந்தேன் .இப்போது நீங்கள் கேட்டுக்கொண்டதால் என்னைப் பற்றி சொல்லிக்கொள்ளும் படியான வரிகள் ஏதேனும் இருக்கிறதா என தேடிக்கொண்டிருக்கிறேன் ....

மிக்க நன்றிகள் அனந்தம்...நீங்கள் கூச்சம் கொள்ள தேவையே அல்ல. இங்கே உள்ள அனைவருமே தங்களின் நண்பர்கள் மற்றும் உடன் பிறப்புக்கள் தான். அறிமுகம் என்பது தங்களை பற்றி தெரிந்து கொள்ளவே... அதன் மூலம் நமக்குள் எந்த இடைவெளிகளும் இல்லாமல் சகஜமாக பழகலாம்....இங்கே நீங்கள் பயம் கொள்ள தேவையே அல்ல..

தங்களை எப்படி அழைப்பது அனந்தம் (அ) ஜீவ்நி.