சென்னையில் சமையல் கியாஸ் கடும் தட்டுப்பாடு: பதிவு செய்து 40 நாட்கள் கழித்தே சிலிண்டர் கிடைக்கிறது

சென்னை, நவ 2-

சென்னையில் பெரும்பாலான இடங்களில் இன்டேன் சமையல் கியாஸ் சிலிண்டர்களுக்கு கடும் தட்டுப்பாடு ஏற்பட்டுள்ளது. இதனால் பெண்கள் கடும் அவதிக்குள்ளாகியுள்ளனர். பதிவு செய்த நாளில் இருந்து 10 நாட்களுக்குள் சப்ளை செய்யப்பட்டு வந்த கியாஸ் சிலிண்டர்கள் தற்போது 40 நாட்களுக்கு பின்னரே சப்ளை செய்யப்படுவதாக பொதுமக்கள் குற்றம் சாட்டுகிறார்கள்.

குறிப்பாக வட சென்னை பகுதியில் கியாஸ் கிலிண்டர்கள் தட்டுப்பாடு அதிகமாக உள்ளது. கொடுங்கையூர், மாதவரம் மற்றும் அதனை சுற்றியுள்ள பகுதிகளில் கியாஸ் சிலிண்டர்கள் கிடைக்காமல் பொது மக்கள் திண்டாடி வருகின்றனர்.

மாதவரம் பகுதியில் உள்ள ஒரு கியாஸ் ஏஜென்சியில் சிலிண்டர்களை பெறுவதற்காக பொது மக்கள் கூட்டம் கூட்டமாக காத்திருப்பதை தினமும் காண முடிகிறது. கடந்த சில நாட்களுக்கு முன்பு சிலிண்டர் லாரி டிரைவர்கள் கூலி உயர்வு கேட்டு திடீர் போராட்டத்தில் ஈடுபட்டனர். இதனால் கியாஸ் ஏஜென்சிகளுக்கு சிலிண்டர்களின் வரத்து அடியோடு நின்று போனது. இதுவே தற்போதைய தட்டுப்பாட்டுக்கு காரணம் என்று கியாஸ் ஏஜென்சி ஊழியர் ஒருவர் தெரிவித்தார்.

வாடிக்கையாளர்களின் எண்ணிக்கையை பொறுத்து தேவையான அளவு சிலிண்டர்கள் ஏஜென்சிகளுக்கு சப்ளை செய்யப்படுவது வழக்கம். மாதவரத்தில் உள்ள ஒரு ஏஜென்சியில் தினமும் 2 லாரிகளில் 600-க்கும் மேற்பட்ட சிலிண்டர்கள் வருவதுண்டு.

சில நாட்களாக தடைபட்டதே தட்டுப்பாட்டுக்கு காரணமாக அமைந்துள்ளது. பதிவு செய்து 30 நாட்களுக்கு மேலாகியும் சிலிண்டர் வராததால் அப்பகுதி பெண் ஒருவர், தினமும் 40 ரூபாய் செலவு செய்து ஆட்டோவில் அலையாய் அலைந்த வண்ணம் உள்ளார். இவரைப் போல பல பெண்களும் அவதிப்பட்டு வருகிறார்கள். சிலிண்டர்களின் வரத்து சீரானால்தான் தட்டுப்பாடு விலகும் என்று கியாஸ் ஏஜென்சி ஊழியர்கள் தெரிவித்தனர்.

மாலைமலர்