ஒரு விலைமாது விம்முகிறாள்.

பி.அமல்ராஜ் · பி.அமல்ராஜ் Tue Nov 01, 2011 1:34 am

கெட்டவளா நான்?
கேட்காமல்
கொட்டிவிடாதீர்கள்.

ஒரு வாய்
கஞ்சி கொடுத்து
கண்ணகியாய் இருக்கச் சொல்லுங்கள்
நல்லவளாய் இருக்கிறேன்.

போராட்டம் என்று
தீ மூட்டிப்போனவன்
திரும்பவே இல்லையே
இன்றுவரை..

போராட்டத்தில்
அவன் மரித்தான்.
பசியோடு
நாங்கள் மரிக்கிறோம்.

தேசத்திற்காய்
அவன் எரிந்தான் - தினம்
தேகத்திற்காய்
நான் எரிகிறேன்.

எனது
மூன்றும்
முனங்கியபடி
மூலையில் இருக்கிறதே
பசியோடு,
யாரறிவார்?

அவர்கள் என்னை
அசிங்கம் செய்தால்தான்
இவர்கள் இங்கு
அழகாய் அருந்துவார்கள்.

என்னமோ,
மானத்தை விட - என்
மக்கள் முக்கியம்
எனக்கு!

நானும் என்ன
காமத்திற்காகவா
காடையர்களை சுமக்கிறேன்?

என்
உணர்வுகள் செத்து
காலம் கடந்து போச்சு,
சுகமும் சூம்பி
சூடில்லாமல் போச்சு.

மரத்து விட்டதாய்
உரத்து ஏசுகிறார்கள்.
நீங்களே சொல்லுங்கள்,
காமத்திற்காகவா - நான்
கட்டில் விரிக்கிறேன்??
வெறும் காசிற்குத்தானே..

எல்லை மீறி
மழுவர் போகையில்
விட்டுவிட நினைப்பேன் - வலி
கொட்டிவிடும் வேளைகளில்..
இருந்தும்,
கொட்டும் பஞ்சத்தில்
குழந்தைகள் பாவமே??

சிலர் அஞ்சுவார்கள்
சிலர் மிஞ்சுவார்கள்
அதற்குள்ளும் சிலர்
கொஞ்சி கொஞ்சி மெச்சுவார்கள்..

எனது வலிகளை
வார்த்தைகளில்
வடிப்பதும்,
வந்துபோகும் சூரியனை
கிழக்கே மறைப்பதும்
நடைமுறையில் ஒன்றுதான்.
சாத்தியமற்றது...

நீங்கள் -
கறுமம் வேண்டாம் என
கருணைக் 'கொலை' செய்கிறீர்கள்.
நானோ
பட்டினிச்சா வேண்டாமென
கலாச்சார 'கொலை' செய்கிறேன்.

நீங்கள்
கொலை செய்தால் நல்லவர்கள்
நான் கொலை செய்தால்
கெட்டவளா??

**இளமாறன்** · **இளமாறன்** Tue Nov 01, 2011 1:41 am

எனது வலிகளை
வார்த்தைகளில்
வடிப்பதும்,
வந்துபோகும் சூரியனை
கிழக்கே மறைப்பதும்
நடைமுறையில் ஒன்றுதான்.
சாத்தியமற்றது...

நீங்கள் -
கறுமம் வேண்டாம் என
கருணைக் 'கொலை' செய்கிறீர்கள்.
நானோ
பட்டினிச்சா வேண்டாமென
கலாச்சார 'கொலை' செய்கிறேன்.

நீங்கள்
கொலை செய்தால் நல்லவர்கள்
நான் கொலை செய்தால்
கெட்டவளா??

மனதை சுடும் வரிகள் சோகம்

பி.அமல்ராஜ் · பி.அமல்ராஜ் Tue Nov 01, 2011 1:47 am

நன்றி இளமாறன் அண்ணா..

உதயசுதா · உதயசுதா Tue Nov 01, 2011 9:42 am

குழந்தைகளை காக்க இந்த வேலைக்குதான் வர வேண்டும் என்பதில்லையே.
அப்படி பார்த்தால் கணவனை இழந்த எல்லா பெண்களும் இந்த வேலையா செய்கிறார்கள்.இந்த தொழில் பார்த்துதான் குழந்தைகள் வளர வேண்டும் என்றால் அந்த குழந்தைகளை அநாதை இல்லத்தில் சேர்த்துவிட்டு கூலி வேலை பார்த்தாவது தன்னை காத்து கொள்ளலாமே.சகதியில் விழுந்து புரண்டு கொண்டு விம்மல் எதுக்கு?

ஹர்ஷித் · ஹர்ஷித் Tue Nov 01, 2011 11:09 am

நீங்கள் -
கறுமம் வேண்டாம் என
கருணைக் 'கொலை' செய்கிறீர்கள்.
நானோ
பட்டினிச்சா வேண்டாமென
கலாச்சார 'கொலை' செய்கிறேன்.

மிகவும் அருமையான வரிகள் "விலை மாதர் எனும் சொல் வர நாம் அனைவரும் தான் காரணம்" நாம் என்றால் நம். சமுதாயம்.கணவ்னை இழந்தவள்,கைவிடப்பட்டவள்,நாசமாக்கப்பட்டவள் இன்னும் எவ்வளவோ பேரின் மொத்த உருவாக இவர் தெரிகிறார்.
அதற்காக விபச்சாரம் சரியான பாதை என்பதை நான் முற்றிலுமாக மறுக்கிறேன்.

பி.அமல்ராஜ் · பி.அமல்ராஜ் Tue Nov 01, 2011 8:38 pm

உதயசுதா wrote:குழந்தைகளை காக்க இந்த வேலைக்குதான் வர வேண்டும் என்பதில்லையே.
அப்படி பார்த்தால் கணவனை இழந்த எல்லா பெண்களும் இந்த வேலையா செய்கிறார்கள்.இந்த தொழில் பார்த்துதான் குழந்தைகள் வளர வேண்டும் என்றால் அந்த குழந்தைகளை அநாதை இல்லத்தில் சேர்த்துவிட்டு கூலி வேலை பார்த்தாவது தன்னை காத்து கொள்ளலாமே.சகதியில் விழுந்து புரண்டு கொண்டு விம்மல் எதுக்கு?

நிச்சயமாக குழந்தைகளைக் காக்க இந்த தொழிலுக்குத்தான் வரவேண்டும் என்பது இல்லை. ஆனால் வரலாம்.. அது அவரவரைப் பொறுத்தது. இதற்கு சான்று இங்குவந்தால் (வடக்கில்) தாராளமாக காணலாம். அவ்வாறானதொரு பெண்ணை 'நீ செய்வது தவறு?' என்று என நாம் சொல்லும் பொழுது அவள் எப்பொழுதுமே தன்னை நியாயப்படுத்திக்கொள்ளவே முற்படுவாளே தவிர தான் உடனடியாகவே தவறு என ஏற்றுக்கொள்ள மாட்டாள். ஆகவே, இது அவ்வாறானதொரு சந்தர்ப்பத்தை பிரதிபலிக்கின்ற ஒரு கவிதையே தவிர வேறொன்றும் இல்லை. இதைக்கொஞ்சம் கவிதையாகவும், இப்படி நடக்கிறது என்றும் நீங்கள் நோக்கினால் உங்கள் கருத்தை கொஞ்சம் திருத்திக்கொள்வீர்கள் என நம்புகிறேன்... உங்கள் கருத்துக்கு நன்றி..

Sponsored content · Sponsored content

ஒரு விலைமாது விம்முகிறாள்.

ஒரு விலைமாது விம்முகிறாள்.

Re: ஒரு விலைமாது விம்முகிறாள்.

Re: ஒரு விலைமாது விம்முகிறாள்.

Re: ஒரு விலைமாது விம்முகிறாள்.

Re: ஒரு விலைமாது விம்முகிறாள்.

Re: ஒரு விலைமாது விம்முகிறாள்.

Re: ஒரு விலைமாது விம்முகிறாள்.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக