சுயம்வரத்தில் தேர்வு: ஊனமுற்ற பெண்ணுக்கு மாலைசூடும் வாலிபர்; “ஊன்று கோலாக இருப்பேன்”

கல்யாணி..... பெயரில் கல்யாணம் இருந்தாலும் கால்களை இழந்த நம்மை யார் கல்யாணம் செய்து கொள்வார்கள் என்ற ஏக்கத்தோடு 30 ஆண்டுகளை கடந்து விட்டார்.

சிரித்த முகம், கலகலப்பான பேச்சு, எல்லோரிடமும் அன்பாக பழகும் குணம் இவைதான் கல்யாணியின் சொத்து.

தாராபுரத்தில் பின்னலாடை நிறுவனத்தில் தொழிலாளியாக வேலை பார்க்கும் கல்யாணிக்கு இப்போது கல்யாணம் கைகூடி உள்ளது. ஏகப்பட்ட சந்தோஷ கனவுகளை சுமந்து கொண்டு கல்யாணி சென்னை வந்துள்ளார். அவருக்கு மாலை சூடப்போகும் வாலிபர் ஸ்ரீனிவாசன்.

இவர்களின் திருமணம் நிச்சயிக்கப்பட்டது சுவாரஸ்யமானது. ஊனமுற்றவர்களுக்காக சென்னையில் நடந்த சுயம்வர நிகழ்ச்சியில் கல்யாணி கலந்து கொண்டார். கல்யாணியின் சாந்த பேச்சும், கவர்ந்திழுக்கும் சிரிப்பும் ஸ்ரீனிவாசனை கவர்ந்தது. ஊனமுற்ற பெண்ணையே திருமணம் செய்ய வேண்டும் என்ற தனது லட்சியம் ஈடேற போவதாக ஸ்ரீனிவாசன் நினைத்தார்.

தனது எண்ணங்களை கல்யாணியிடம் தெரிவித்தார். பின்னர் இரு குடும்பங்களும் சேர்ந்து திருமண பேச்சுவார்த்தை நடத்தி நிச்சயம் செய்தார்கள். சுயம்வரத்துக்காக ஏற்பாடு செய்த கீதாபவன் டிரஸ்ட், தமிழக ஊனமுற்றோர் டிரஸ்ட் நிர்வாகிகள் ஸ்ரீனிவாசனை பாராட்டினார்கள். அதே நேரத்தில் திடுதிடுப்பென்று முடிவெடுத்து விடாதீர்கள். ஊனமுற்ற பெண்ணை மணப்பதால் எதிர்காலத்தில் என்னென்ன பிரச்சினைகளை எதிர் கொள்ள வேண்டியிருக்கும் என்பது பற்றி ஸ்ரீனிவாசனுக்கு கவுன்சிலிங் கொடுக்கப்பட்டது.

எதையும் தாங்குவேன். என் மனைவியாக அவள் வந்ததும் அவளுக்கு நான் ஊன்றுகோலாக இருப்பேன் என்று ஸ்ரீனிவாசன் உறுதியுடன் கூறினார். அவரது தியாகத்தையும், மனஉறுதியையும் அனைவரும் பாராட்டினார்கள். இவர்களது திருமணம் வருகிற 8-ந்தேதி ஓட்டலில் நடக்கிறது.

மணமக்களுக்கு கீதாபவன் டிரஸ்ட் சார்பில் ரூ.1 லட்சம் மதிப்புள்ள சீதன பொருட்கள் பரிசாக வழங்கப்படுகிறது. வாழ்க்கைக்கு ஊனம் தடையில்லை என்ற லட்சியத்தோடு புதுவாழ்க்கை தொடங்க இருக்கும் மண மக்களை வாழ்த்த உறவினர்கள், உற்றார்கள் நண்பர்கள் தயாராகி வருகிறார்கள்.

மாலைமலர்