கேரளா சிப்ஸ் கம்பெனிகளில் தமிழக சிறுவர்களுக்கு கொடுமை

மதுரை : கேரளா மாநிலத்தில் சிப்ஸ் கம்பெனிகளில் கொத்தடிமைகளாக உள்ள தமிழக சிறுவர்களை மீட்கக்கோரிய வழக்கில் நேரில் சென்று விசாரிக்க சிவகாசி டிஎஸ்பிக்கு ஐகோர்ட் கிளை உத்தரவிட்டுள்ளது. சிவகாசி அருகே திருத்தங்கலை சேர்ந்த முனியம்மாள், ஐகோர்ட் கிளையில் தாக்கல் செய்த மனுவில் கூறியிருப்பதா
வது:

என் மகன் பாலமுருகனை (14), மாரிமுத்து என்பவர் ஏப்ரல் மாதம் கேரள மாநிலம் கண்ணணூரில் உள்ள சிப்ஸ் கம்பெனிக்கு வேலைக்கு அழைத்து சென்றார். அதிக சம்பளம், சாப்பாடு அளிப்பதாக சொல்லி, முன்பணமாக ஸீ3 ஆயிரம் கொடுத்து மகனை கேரளாவுக்கு கூட்டி சென்றார். ஜூலை 13ல் திடீரென மாரிமுத்து, பாலமுருகனுடன் ஊருக்கு வந்தார். பாலமுருகன் உடலில் பல இடங்களில் காயங்கள் இருந்தது.

சிப்ஸ் கம்பெனியில் பாலமுருகனை கடுமையாக வேலை வாங்கியுள்ளனர். தூங்கவிடாமல் 24 மணி நேரம் வேலை செய்ய சொல்லி கொடுமைப்படுத்தியுள்ளனர். ஜூலை 5ல் தூங்கி கொண்டிருந்த அவனை எழுப்பி வேலை செய்ய சொல்லி அடித்துள்ளனர். கொதித்துக் கொண்டிருந்த எண்ணெய்யை அவன் மீது ஊற்றியுள்ளனர். அவனை கொடுமைப்படுத்தியவர்கள் மீது நடவடிக்கை எடுக்கக்கோரி அரசுக்கும், போலீஸ் உயர் அதிகாரிகளுக்கும் மனு கொடுத்தேன்.

நடவடிக்கை எடுக்கவில்லை. தமிழகத்தை சேர்ந்த ஏராளமான சிறுவர்கள், கேரள சிப்ஸ் கம்பெனிகளில் கொத்தடிமை தொழிலாளர் களாக உள்ளனர். அவர்களை மீட்க உத்தரவிட வேண்டும். என் புகாரின் பேரில் வழக்குப்பதிவு செய்து, உரிய நடவடிக்கை எடுக்கவும் உத்தரவிட வேண்டும். இவ்வாறு மனுவில் கூறப்பட்டிருந்தது.

மனுவை நீதிபதி வி.ராமசுப்பிரமணியன் விசாரித்து, “மனுதாரரின் புகாரின் பேரில் சிவகாசி டிஎஸ்பி வழக்குப்பதிவு செய்து, கண்ணணூருக்கு நேரில் சென்று விசாரணை நடத்தி, கோர்ட்டில் இறுதி அறிக்கை தாக்கல் செய்ய வேண்டும்“ என்று உத்தரவிட்டார். வரும் 8ம் தேதி மீண்டும் இவ்வழக்கு விசாரிக்கப்படும் என்றும் நீதிபதி கூறினார்.

தினகரன்