"இன்று விளைந்த முத்துக்கள்"

**rameshnaga** · **rameshnaga** Wed Oct 19, 2011 8:02 pm

பள்ளிக்கூடத்துச் சுவர்கள்
வெறுப்பில் வளைந்து நெளிகிறது....
அதன் முதுகில் எல்லாம்
"வயது வந்தவர்களுக்கு மட்டும்".
*********************************
இரவு
தொலைத்துவிடுவது
வெளிச்சத்தை மட்டும் இல்லை.
**********************************
கோவில் தூண்கள்
காதைத் தீட்டிக் கொள்கின்றன...
"ஊர் வம்பு"...ஆரம்பம்.
************************************
சுதந்திர தேசம்...
யார் அனுமதியும் தேவை இல்லை...
"மூச்சு விட" மட்டும்.
***********************************
மரங்களின் அழுகையை
பறவைகள் மொழிபெயர்க்கின்றன...
இலையுதிர்காலம்.
************************************
நீ விலகிய பின்னும்
என்னோடு வந்து கொண்டிருக்கிறது
"என்னுடைய" காதல்.
*************************************
வெறும் கயிறுதான்..
பாம்பாய்த் தெரிகிறது.
கொத்திவிட்டதாய் பயமுறுத்தியும் விடுகிறது.
***************************************
தற்கொலையல்ல! கொலைதான்.
அம்மாவைச் சுற்றிவருகிறது
குழம்பில் கொதித்த கோழியின் ஆவி.
***************************************
பிச்சைக்காரர்களின் "அம்மா....."
வீதியில் உலவும் கடவுள்கள்
காசு போடுகின்றன மகத்தான கருணையோடு.
****************************************
"ஹைக்கூ" எழுத ஆசை.
ஒரு வரி முடிந்துவிட்டது.
கடைசி வரி சிரிக்கிறது என் "ஹைக்கூ"வைப் பார்த்து.
******************************************

aathma · aathma Wed Oct 19, 2011 8:32 pm

இன்று விளைந்த முத்துக்கள் யாவும் பொக்கிஷமாய் விளைந்துள்ளன
மகிழ்ச்சி

**rameshnaga** · **rameshnaga** Wed Oct 19, 2011 8:34 pm

aathma wrote:இன்று விளைந்த முத்துக்கள் யாவும் பொக்கிஷமாய் விளைந்துள்ளன

ரொம்பவும் நன்றி! ஆத்மா.

**Aathira** · **Aathira** Wed Oct 19, 2011 9:30 pm

பள்ளிக்கூட சுவர்கள் வெறுத்து நெளிவது, கோவில் சுவர்கள் காதை தீட்டிக்கொள்வது.... யாரும் சிந்திக்காக சிந்தனைகள்.

நானும் இவற்றை சிந்தித்ததுண்டு. கவியாக எழுத திறமை வேண்டுமே....
நல்முத்துகள் ரமேஷ் நாகா..