சுற்றுச்சூழலை கண்காணிக்க புதிய வழி

**சிவா** · **சிவா** Thu Sep 24, 2009 4:49 am

மரம், செடி, கொடிகளுக்கு நோய்கள் வந்தால் வாடத் தொடங்கிய பிறகுதான் தெரியவரும். ஆனாலும் அவை பலன் தருபவையாக இருந்தால் மட்டுமே நாம் அவற்றை பராமரித்து சரிப்படுத்துகிறோம். ஆனால் மரங்கள் மனித இனத்துக்கு எல்லாவகையிலும் பலன்தரக் கூடியவையாகும். இதனால் அவற்றை கண்காணிப்பதன் மூலமும், பராமரிப்பதன் மூலமும் நாம் மேலும் நலமாக வாழலாம்.

சுற்றுச்சூழலை கண்காணிக்க பல்வேறு வழிகளை நாம் கையாளுகிறோம். தற்போது எலக்ட்ரானிக் சிப்கள் இயங்கத் தேவையான மின்சாரத்தை மரங்களில் இருந்தே பெற்றுக் கொள்ளலாம் என்று கண்டுபிடிக்கப்பட்டு உள்ளது. இதனால் இந்த சிப்களைக் கொண்டு சுற்றுச் சூழலையும் கண்காணிக்கலாம் என்று தெரியவருகிறது.

பள்ளிகளில் உருளைக் கிழங்கு, எலுமிச்சை பழத்தில் இருந்து மின்சாரம் எடுக்கலாம் என்று மாணவர்கள் கண்காட்சியில் விளக்கி காட்டுவார்கள். அதுபோன்ற ஓர் ஆய்வில் வாஷிங்டன் பல்கலைக்கழக ஆய்வுக்குழு ஒன்று ஈடுபட்டது. அப்போது மரங்களில் இருந்தும் குறைந்த அளவில் மின்சாரம் தயாரிக்க முடியும் என்று தெரியவந்தது. ஒரு மரத்தில் இருந்து 20 மில்லிவோல்ட் மின்சாரம் எடுக்க முடிந்தது. மில்லி வோல்ட் என்பது ஒரு வோல்ட் மின்சாரத்தில் ஆயிரத்தில் ஒரு பங்கு ஆகும்.
இந்த மின்சாரத்தை அதிகப்படுத்தி வழங்கும் ஒரு கன்வெர்ட்டரும் எலக்ட்ரானிக் சிப்புடன் இணைக்கப்பட்டு இருந்தது. கிடைக்கும் மின்சாரத்தை ஒரு வோல்ட்டாக அதிகரித்ததும் சர்க்கிïட் போர்டு செயல்பட ஆரம்பித்தது. எனவே இதேமுறையில் இயங்கும் சென்சார்களை காட்டுப்பகுதியில் பொருத்தலாம் என்று விஞ்ஞானிகள் தெரிவித்து இருக்கிறார்கள். அந்த சென்சார்கள் மூலம் மரங்களிடையே நோய்த் தாக்குதல் தென்பட்டாலோ, காட்டுத்தீ பரவினாலோ கண்டுபிடிக்கலாம். மேலும் சுற்றுச்சூழல் மாற்றங்களையும் கண்டுபிடிக்க முடியும்.